 |
| លោក តាហា ម៉ាក់ហ្វឺសាន់ ( Taha Macpherson) ឯកអគ្គរាជទូតប្រទេសណូវែលហ្សេឡង់ដ៍ (New Zealand) ពេលជួបសួរសុខទុក្ខ លោក កឹម សុខា ដល់ផ្ទះ នៅខណ្ឌទួលគោក ក្រុងភ្នំពេញ នៅព្រឹកថ្ងៃទី១៧ ខែធ្នូ ឆ្នាំ២០១៩។ រូប៖ RFA |
ដោយ អាស៊ីសេរី RFA 2019-12-17
ឯកអគ្គរាជទូតប្រទេសណូវែលហ្សេឡង់ដ៍ (New Zealand) លើកឡើងថា រដ្ឋាភិបាលប្រទេសមួយនេះ នឹងបន្តតាមដានការវិវឌ្ឍ ចំពោះករណីប្រធានគណបក្សសង្គ្រោះជាតិ ដែលតុលាការរបបក្រុងភ្នំពេញ រំលាយចោល គឺលោក កឹម សុខា។ ការបញ្ជាក់ជំហរបែបនេះ ធ្វើឡើងក្នុងពេលឯកអគ្គរាជទូត ប្រទេសណូវែលហ្សេឡង់ដ៍ បានទៅជួបសួរសុខទុក្ខ លោក កឹម សុខា នៅក្នុង ផ្ទះរបស់លោក ស្ថិតនៅខណ្ឌទួលគោក ក្រុងភ្នំពេញ នៅព្រឹកថ្ងៃទី១៧ ខែធ្នូ។
ឯកអគ្គរាជទូតប្រទេសណូវែលហ្សេឡង់ដ៍ ទទួលបន្ទុកប្រទេសកម្ពុជា ថៃ និងឡាវ គឺលោក តាហា ម៉ាក់ហ្វឺសាន់ ( Taha Macpherson) អះអាងថា រដ្ឋាភិបាលប្រទេសណូវែលហ្សេឡង់ដ៍ នឹងបន្តតាមដាន ការវិវឌ្ឍចំពោះសំណុំរឿងរបស់ប្រធានគណបក្សសង្គ្រោះជាតិ លោក កឹម សុខា ដែលតុលាការកម្ពុជាគ្រោងជំនុំជម្រះនៅពាក់កណ្ដាលខែក្រោយនេះ។
ចំណែកនាយខុទ្ទកាល័យ លោក កឹម សុខា គឺលោក មុត ចន្ថា វិញ សរសេរនៅក្នុងហ្វេសប៊ុកថា លោក កឹម សុខា បង្ហាញការចាប់អារម្មណ៍យ៉ាងខ្លាំង ចំពោះប្រទេសណូវែលហ្សេឡង់ដ៍ ដែលបានប្ដេជ្ញាចិត្តខ្ពស់ជួយគាំទ្រដល់ដំណើរការប្រជាធិបតេយ្យ ការគោរពសិទ្ធិមនុស្ស និងសេរីភាពជាមូលដ្ឋាននៅក្នុងប្រទេសកម្ពុជា។
ការទទួលជួបជាមួយអ្នកការទូតបរទេសជាបន្តបន្ទាប់គ្នានេះ គឺបន្ទាប់ពីតុលាការរបបក្រុងភ្នំពេញ កាលពីថ្ងៃទី១០ ខែវិច្ឆិកា អនុញ្ញាតឱ្យលោក កឹម សុខា មានសេរីភាពអាចធ្វើដំណើរបាននៅក្នុងប្រទេសបាន ប៉ុន្តែមិនឱ្យហួសពីព្រំប្រទល់ដែនរបស់កម្ពុជាឡើយ ហើយក៏មិនឲ្យលោកធ្វើសកម្មភាពនយោបាយបាននោះដែរ។ ក្រៅពីនេះ តុលាការបានតម្រូវឱ្យលោកឆ្លើយតបនឹងការកោះហៅពីគ្រប់សមត្ថកិច្ច។
តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន មានប្រសាសន៍ថា កាយវិការរបស់អ្នកកាទូត ប្រទេសប្រជាធិបតេយ្យធំៗ ទាំងនេះ បង្ហាញថា ពួកគេនៅតែគាំទ្រ និងទទួលស្គាល់លោក កឹម សុខា ជាមនុស្សស្អាតស្អំគ្មានទោសកំហុស និងជាអ្នកនយោបាយសំខាន់មួយរូប ក្នុងការចូលរួមដំណើរការកសាងប្រជាធិបតេយ្យនៅកម្ពុជា៖ «»
ទោះជាយ៉ាងណា ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី បានសម្រេចបញ្ជូនសំណុំរឿងសន្ទិដ្ឋិភាព ឬការត្រូវរ៉ូវគ្នាជាមួយបរទេសរបស់លោក កឹម សុខា ដែលជាសំណុំរឿងមានចរិតនយោបាយ និងធ្វើឡើងតាមការចង់បានរបស់លោក ហ៊ុន សែន ទៅជំនុំ ជម្រះថ្ងៃទី១៥ មករា ខែក្រោយនេះ។
រហូតមកដល់ពេលនេះ មានឯកអគ្គរដ្ឋទូតបរទេសជាង ១០ហើយ ដែលបានបណ្ដាក់គ្នាចូលជួបសួរសុខទុក្ខ លោក កឹម សុខា រួមមាន ឯកអគ្គរដ្ឋទូតបារាំង សហរដ្ឋអាមេរិក អាល្លឺម៉ង់ អូស្ត្រាលី សហភាពអឺរ៉ុប ជប៉ុន អង់គ្លេស ប្រទេសស្វីស ស៊ុយអែត ហ្វាំងឡង់ បែលហ្ស៊ិក និងប្រទេសណូវែលហ្សេឡង់ដ៍។ តំណាងរដ្ឋាភិបាលនៃប្រទេសសេរីធំៗ ទាំងនេះ នៅតែជំរុញដល់រដ្ឋាភិបាលកម្ពុជា ឲ្យស្ដារលទ្ធិប្រជាធិបតេយ្យ ការគោរពសិទ្ធិមនុស្សឡើងវិញ តាមរយៈការទម្លាក់ចោលរាល់បទចោទប្រកាន់លើលោក កឹម សុខា និងដោះលែងជនទាំងឡាយណា ដែលត្រូវបានឃុំខ្លួនតាមទំនើងចិត្ត ក្នុងនោះរួមមានអ្នកសារព័ត៌មាន សកម្មជនសង្គមស៊ីវិល ព្រមទាំងអ្នកគាំទ្រ និងសមាជិកគណបក្សប្រឆាំងផងដែរ។ ប្រទេសទាំងនោះសង្កត់ធ្ងន់ថា មានតែធ្វើតាមអនុសាសន៍របស់ពួកគេនេះទេ ទើបមានប្រយោជន៍សម្រាប់កម្ពុជាទាំងវិស័យអភិបាលកិច្ច និងសេដ្ឋកិច្ច៕
