ភ្នំពេញប៉ុស្តិ៍ មាស សុខជា Wed, 15 June 2016
ភ្នំពេញៈ លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថាការដាក់ពង្រាយកងកម្លាំងប្រដាប់អាវុធយ៉ាងច្រើននៅក្បែរទីស្នាក់ការគណបក្សប្រឆាំងកាលពីម្សិលមិញមិនមែនដើម្បីត្រៀមចាប់ខ្លួនលោក កឹម សុខា ដូចការលើកឡើងរបស់សាធារណជននោះទេប៉ុន្តែគឺដាក់ពង្រាយដើម្បីការពារសន្ដិសុខសម្រាប់អ្នកគាំទ្រគណបក្សរាប់រយនាក់ដែលទៅប្រមូលផ្តុំគ្នានៅទីនោះ។
ការដាក់ពង្រាយកងកម្លាំងប្រដាប់អាវុធរាប់រយនាក់នៅក្បែរទីស្នាក់ការគណបក្សសង្គ្រោះជាតិកាលពីម្សិលមិញនេះធ្វើឡើងតែមួយថ្ងៃប៉ុណ្ណោះបន្ទាប់ពីលោកនាយករដ្ឋមន្ត្រី ហ៊ុន សែន បានព្រមានថាលោកនឹងមិនអត់ឱនឲ្យគណបក្សប្រឆាំងឡើយប្រសិនបើគណបក្សនេះធ្វើបាតុកម្មហើយស្របពេលដែលអ្នកគាំទ្រគណបក្សប្រឆាំងដែលខ្លះមកពីតាមបណ្តាខេត្តនានាបានមកប្រមូលផ្តុំគ្នាកាន់តែច្រើនឡើងៗនៅទីស្នាក់ការគណបក្សក្នុងសង្កាត់ចាក់អង្រែលើ។
អ្នកនាំពាក្យក្រសួងមហាផ្ទៃលោក ខៀវ សុភ័គ បានប្រាប់ភ្នំពេញប៉ុស្តិ៍កាលពីម្សិលមិញថាហ្វូងមនុស្សច្រើនបែបនេះធ្វើឱ្យចរាចរណ៍កកស្ទះហើយលំបាកសម្រាប់អ្នកធ្វើដំណើរឆ្លងកាត់តាមផ្លូវជាតិលេខ ២ ទើបត្រូវដាក់ពង្រាយកងកម្លាំងប្រដាប់អាវុធដើម្បីសម្រួលដល់អ្នកធ្វើដំណើរ និងដើម្បីការពារសន្តិសុខសម្រាប់អ្នកប្រមូលផ្តុំរបស់គណបក្សសង្គ្រោះជាតិ។
សាធារណជនជាច្រើនសង្ស័យថាការដាក់ពង្រាយកងកម្លាំងប្រដាប់អាវុធយ៉ាងច្រើនបែបនេះគឺដើម្បីត្រៀមចាប់ខ្លួនលោក កឹម សុខា ប្រធានស្តីទីគណបក្សសង្គ្រោះជាតិខណៈដែលមេបក្សរូបនេះមិនចូលទៅបំភ្លឺនៅតុលាការទៅតាមដីកាកោះជាលើកទី ៣ កាលពីម្សិលមិញនឹងអាចដើម្បីធ្វើការបង្រ្កាបលើអ្នកគាំទ្រគណបក្សសង្គ្រោះជាតិដែលមកប្រមូលផ្តុំគ្នានៅទីស្នាក់ការគណបក្ស។
ប៉ុន្តែលោក ខៀវ សុភ័គ បានបញ្ជាក់ថា៖ « [យើង] ចាប់ខ្លួនអ្នកណាឥឡូវ។ ហ្វូងមនុស្សបែបនេះជាមូលហេតុដែល [យើង] បានដាក់ពង្រាយនគរបាល។ បើនរណាម្នាក់ [បោះ] គប់គ្រាប់បែកឲ្យស្លាប់ តើ [យើង] ធ្វើដូចម្តេច? [យើង] ការពារក្រុមគាត់។ [យើង] មិនបានចាប់ខ្លួននរណាម្នាក់ទេ»។
ជាមួយគ្នានេះដែរលោក សំ សុគង់ មេធាវីម្នាក់ក្នុងចំណោមមេធាវីច្រើននាក់ដែលការពារក្តីលោក កឹម សុខា បានឲ្យដឹងថាមេធាវីការពារលោក កឹម សុខា បានចូលខ្លួនទៅតុលាការកាលពីម្សិលមិញដើម្បីលើកឡើងពីផ្លូវច្បាប់ថា៖ «មូលហេតុដែលកូនក្តី [យើង] មិនចូលខ្លួនព្រោះកូនក្តី [យើង] ត្រូវបានការពារដោយមាត្រា ៨០ នៃរដ្ឋធម្មនុញ្ញមានន័យថាអភ័យឯកសិទិ្ធកូនក្តី [យើង] មិនទាន់បានព្យួរ ឬផ្អាកទេហើយកូនក្តី [យើង] នៅតែជាតំណាងរាស្រ្តដដែល»។ លោក សុគង់ បញ្ជាក់ថាចៅក្រមមិនទាន់សម្រេចទេថាតើគួរលើកចោលការចោទប្រកាន់ក្នុងរឿងក្តីលោក សុខា ឬយ៉ាងណា?
ប៉ុន្តែលោក លី សុផាណា អ្នកនាំពាក្យសាលាដំបូងរាជធានីភ្នំពេញបានថ្លែងថា៖ «មេធាវីមិនអាចឆ្លើយជំនួសកូនក្តីរបស់ខ្លួនដែលជាជនត្រូវចោទបានទេ។ ដូច្នេះគ្មានប្រយោជន៍ទេដែលមេធាវីចូលខ្លួននៅចំពោះមុខចៅក្រមស៊ើបសួរពេលដែលកូនក្តីខ្លួនដែលជាជនត្រូវចោទមិនបានបង្ហាញខ្លួន»។ លោក សុផាណា បានបដិសេធធ្វើអត្ថាធិប្បាយថាតើចៅក្រមនឹងបន្តនីតិវិធីលើលោក សុខា ជាបន្តទៀតឬយ៉ាងណានោះទេ?
ថ្លែងទៅកាន់អ្នកគាំទ្រកាលពីម្សិលមិញនៅទីស្នាក់ការគណបក្សសង្គ្រោះជាតិតំណាងរាស្រ្តលោក អេង ឆៃអ៊ាង បានផ្តាំផ្ញើទៅអាជ្ញាធររដ្ឋាភិបាលរបស់លោកនាយករដ្ឋមន្រ្តី ហ៊ុន សែន ថាកុំព្រួយបារម្ភអំពីការធ្វើបាតុកម្មអីដោយលោកបានលើកឡើងថាគណបក្សសង្គ្រោះជាតិនឹងមិនដឹកនាំអ្នកគាំទ្រធ្វើបាតុកម្មទេប៉ុន្តែលោកបានបញ្ជាក់ថាអ្នកគាំទ្រគណបក្សសង្គ្រោះជាតិគ្រាន់តែប្រមូលផ្តុំដើម្បីសម្តែងមតិទាមទារយុត្តិធម៌ឲ្យសកម្មជនដែលកំពុងជាប់ពន្ធនាគារប៉ុណ្ណោះ។
លោក ឆៃអ៊ាង បានថ្លែងថា៖ «ចំពោះបញ្ហានយោបាយយើងចង់ពិភាក្សាដោះស្រាយរវាងខ្មែរ និងខ្មែរ។ យើងនៅតែសង្ឃឹមថាភាគីទាំងពីរនឹងជួបប្រជុំគ្នានៅពេលខាងមុខនេះដើម្បីដោះស្រាយបញ្ហា។ [យើង] ចង់ប្រាប់អាជ្ញាធរកុំព្រួយបារម្ភអ្នកប្រមូលផ្តុំនៅទីនេះមិនដើរក្បួនដង្ហែទៅទីណាទេយើងគ្រាន់តែប្រមូលផ្តុំដោយអហិង្សាដោយសន្តិវិធីដើម្បីតាមដានស្ថានភាពនៃការវិវត្តផ្នែកនយោបាយ»។
ចាប់តាំងពីកងកម្លាំងប្រដាប់អាវុធរបស់រដ្ឋាភិបាលជាច្រើននាក់បានឆ្មក់ចូលទៅក្នុងទីស្នាក់ការគណបក្សប្រឆាំងដែលតាមការអះអាងថាដើម្បីប៉ុនប៉ងចាប់ខ្លួនលោក កឹម សុខា កាលពីចុងខែមុនមកលោក សុខា បានសម្ងំស្នាក់នៅក្នុងទីស្នាក់ការគណបក្សដោយមិនចេញទៅណាឡើយហើយសកម្មជន និងអ្នកគាំទ្ររបស់លោករាប់រយនាក់មកពីតាមបណ្តាខេត្តនានាបានទៅដេករង់ចាំនៅខាងមុខទីស្នាក់ការគណបក្សទាំងយប់ទាំងថ្ងៃដើម្បីការពារក្រែងមានការចាប់ខ្លួន៕