សែន ដាវីត ភ្នំពេញប៉ុស្តិ៍ Fri, 29 July 2016
ភ្នំពេញៈ សហជីពសេរីកម្មករនៃព្រះរាជាណាចក្រកម្ពុជាបានផ្ញើលិខិតមួយច្បាប់ជូនរដ្ឋមន្រ្តីក្រសួងការងារស្នើឲ្យមានវិធានការផ្លូវច្បាប់ទៅលើលោក ស្រី ចំរើន និង កញ្ញា ធីសុវណ្ណថា ដែលបានប្រើឈ្មោះរបស់សហជីពទៅធ្វើសកម្មភាពផ្សេងៗផ្ទុយពីគោលការណ៍ច្បាប់។
ប្រតិកម្មរបស់សហជីពនេះបានធ្វើឡើងបន្ទាប់ពីកាលពីថ្ងៃទី ២៤ កក្កដាមានកម្មករជិត ១០០ នាក់រួមទាំងលោក ស្រី ចំរើន ដែលត្រូវបានគេមើលឃើញថាកំពុងតែធ្វើសកម្មភាពបម្រើនយោបាយឲ្យគណបក្សកាន់អំណាចបានយកញត្តិដាក់ជូនរដ្ឋសភាដើម្បីស្នើសុំឲ្យស្ថាប័នជាតិកំពូលមួយនេះជួយអន្តរាគមន៍ទៅសហភាពអឺរ៉ុបដោយសំអាងថាកាលពីថ្ងៃទី ១៣ កក្កដា លោក សម រង្ស៊ី ប្រធានគណបក្សសង្គ្រោះជាតិបានស្នើឲ្យសហភាពអឺរ៉ុបបិទទីផ្សារនាំចូលសម្លៀកបំពាក់ពីកម្ពុជាដែលសំណើនេះនឹងធ្វើឲ្យកម្មកររោងចក្រជិត ១ លាននាក់នឹងបាត់បង់ការងារដែលធ្វើឲ្យប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់កម្មករ។
លោក ម៉ាន់ សេងហាក់ អនុប្រធានសហជីពសេរីកម្មករបានពន្យល់ក្នុងលិខិតចុះថ្ងៃទី ២៧ កក្កដាផ្ញើជូនរដ្ឋមន្រ្តីក្រសួងការងារលោក អ៊ិត សំហេង ថាក្នុងរយៈពេលប៉ុន្មានថ្ងៃកន្លងទៅថ្មីៗនេះលោកស្រីចំរើន និងកញ្ញា ធី សុវណ្ណថា បានប្រតិបត្តិការងារមួយចំនួនដោយអះអាងថាខ្លួនជាតំណាងសហជីពធ្វើឲ្យមជ្ឈដ្ឋាននានាផ្តោតអារម្មណ៍សង្ស័យថាសកម្មភាពទាំងនោះអាចប្រព្រឹត្តឡើងដោយមិនចុះបញ្ជីសហជីព និងក្រៅដែនអនុវត្តដែលជាការរំលោភបំពានយ៉ាងធ្ងន់ធ្ងរទៅលើមាត្រា ៨០ និងមាត្រា ៨១ នៃច្បាប់សហជីព។ លោក ម៉ាន់ សេងហាក់ បានលើកឡើងក្នុងលិខិតនោះថាដើម្បីធានាដល់ផលប្រយោជន៍ និងរក្សាកិត្យានុភាពនៃច្បាប់ស្តីពីសហជីពសូមសំណូមពរលោករដ្ឋមន្រ្តីមេត្តាត្រួតពិនិត្យមើល និងមានវិធានការផ្លូវច្បាប់ទៅលើសកម្មភាពរបស់លោកស្រី ចំរើន និងកញ្ញា ធី សុវណ្ណថា ក្នុងករណីមានការប្រព្រឹត្តល្មើសច្បាប់។
ឆ្លើយតបនឹងបញ្ហានេះកញ្ញា សុវណ្ណថា បានប្រាប់ភ្នំពេញប៉ុស្តិ៍ថាកញ្ញាមិនខ្លាចនឹងពាក្យបណ្តឹងពីសហជីពសេរីនោះទេព្រោះកញ្ញាមិនបានធ្វើអ្វីខុសឡើយដោយថានាងមិនដែលអះអាងខ្លួនជាតំណាងសហជីពកម្មករនោះទេ។ នៅក្នុងលិខិតនោះគឺកញ្ញាចូលរួមផ្តិតមេដៃជាមួយកម្មករ និងសហជីពផ្សេងទៀត។ កញ្ញា ថា៖ «សហជីពគួរតែមានភ័ស្តុតាងហើយអានឲ្យច្បាស់ក្នុងលិខិតនោះខ្ញុំមិនបានសរសេរថាខ្ញុំ ធី សុវណ្ណថា ជាតំណាងសហជីព ឬកម្មករទេក្នុងលិខិតនោះថាយើងខ្ញុំតំណាងសហជីពកម្មករគឺមានមេដៃជាកម្មករជាច្រើនបានផ្តិត»។
ចំណែកលោកស្រី ចំរើន បានឆ្លើយតបវិញថាលោកធ្វើឡើងតំណាងឲ្យយុវជនដែលមានឆន្ទៈ និងឈឺឆ្អាលជាមួយកម្មករដែលពួកគេនឹងប៉ះពាល់បើសិនបើ EU បិទការនាំចូលសម្លៀកបំពាក់ពីកម្ពុជាទៅតាមសំណើរបស់មេបក្សប្រឆាំង។ «ខ្ញុំគ្មានសហជីពអ្វីដែលត្រូវចុះបញ្ជីនោះទេខ្ញុំធ្វើតំណាងឲ្យយុវជនជាមួយកម្មករដែលមានឆន្ទៈព្រោះកម្មករនឹងបាត់បង់ការងារ»។
ទោះយ៉ាងណាលោក សម រង្ស៊ី បានប្រកាសរួចមកហើយថាលោកមិនបានស្នើឲ្យសហគមន៍អឺរ៉ុបបិទទីផ្សារនាំសម្លៀកបំពាក់ពីកម្ពុជានោះទេអ្វីដែលបានចុះផ្សាយកន្លងមកគឺដោយសារតែប្រព័ន្ធផ្សព្វផ្សាយមួយចំនួនបានបកប្រែសម្តីលោកខុស៕