ដោយ អ៊ុំ រង្សី RFA 2016-07-31
សាស្ត្រាចារ្យ និងសិស្សានុសិស្សសាលាជម្ពូវ័ន ជាង ១០០នាក់ ធ្វើដំណើរទស្សនកិច្ចសិក្សានៅចម្ការបន្លែធម្មជាតិសរីរាង្គ (Eco Agri Farm) នៅក្នុងខេត្តព្រះសីហនុ នៅថ្ងៃទី៣១ កក្កដា។ ដំណើរទស្សនកិច្ចសិក្សានេះ ក្នុងបំណងជំរុញឲ្យយុវជនស្វែងយល់ពីការដាំដុះបន្លែដោយប្រើជី និងថ្នាំពុលធម្មជាតិសរីរាង្គ ដោយទទួលបានទិន្នផលខ្ពស់ និងមិនប៉ះពាល់សុខភាព។
ប្រធានមជ្ឈមណ្ឌលកសិកម្មធម្មជាតិ (EAC) លោក អៀង សុធារ៉ា បានបញ្ជាក់តាមរយៈសេចក្តីជូនដំណឹងថា ការរៀបចំឲ្យមានដំណើរទស្សនកិច្ចនេះ គឺចង់បង្កើតសាលាគំរូមួយដែលគ្មានការប្រើប្រាស់ថង់ប្លាស្ទិក ប៉ុន្តែជំនួសមកវិញដោយទេសភាពបៃតង ដែលបានមកពីចម្ការបន្លែនៅជុំវិញសាលារៀន។
ជាងនេះទៀត ប្រធានមជ្ឈមណ្ឌលកសិកម្មធម្មជាតិ (EAC) រូបនេះ ចង់ជំរុញសាលាជម្ពូវ័ន ឲ្យក្លាយជាសាលាគំរូមុនគេបង្អស់នៅក្នុងរាជធានីភ្នំពេញដែលចាប់ផ្ដើមដាំដំណាំ និងបន្លែដោយមិនប្រើប្រាស់សារធាតុគីមី ដើម្បីលើកកម្ពស់វិស័យកសិកម្មកម្ពុជា។
ដំណើរទស្សនកិច្ចនេះ នឹងទៅកាន់ចម្ការបន្លែធម្មជាតិសរីរាង្គ (Eco Agri Farm) ដែលមានផ្ទៃដីសរុបចំនួន ៨៦ហិកតារ ហើយផ្ទៃដីដាំដំណាំរួចហើយមាន ៤០ហិកតារ នៅក្នុងរមណីយដ្ឋានពិកនិក (Picnic Resort )។ បន្ទាប់ពីដំណើរទស្សនកិច្ចនេះចប់ ខាងចម្ការបន្លែធម្មជាតិសរីរាង្គ (Eco Agri Farm) ក៏នឹងផ្តល់ជាបច្ចេកទេសក្នុងការដាំដុះ ផ្តល់ជី ថ្នាំពុលធម្មជាតិ និងគ្រាប់ពូជ ដើម្បីអនុវត្តឲ្យសាស្ត្រាចារ្យ និងសិស្សានុសិស្សសាលាជម្ពូវ័ន អាចចាប់ផ្ដើមអនុវត្តការដាំដុះបន្លែសរីរាង្គនៅសាលាបាន៕