![ប្រធានមូលនិធិវេទិកាសេដ្ឋកិច្ចឥស្លាមពិភពលោក (WIEF) លោក តួន មូសា ហ៊ីតាម (Tun Mosa Hitam) [ឆ្វេងទី១] រដ្ឋលេខាធិការនៃក្រសួងការងារ លោក អូស្មាន ហាស្សាន់ [ឆ្វេងទី៣] និងប្រមុខដឹកនាំរដ្ឋផ្សេងទៀត នៅក្នុងពិធីបើកវេទិកាសេដ្ឋកិច្ចឥស្លាមពិភពលោកលើកទី១២ នៅទីក្រុងហ្សាកាតា ប្រទេសឥណ្ឌូនេស៊ី នៅថ្ងៃទី២ សីហា ឆ្នាំ២០១៦។ RFA/San Sel](http://3.bp.blogspot.com/-fZyHRJVba_s/V6CKt0IosVI/AAAAAAAAMHg/Jf5Vp7zqXAAyrovEKo7rvDk7Ee29oVc6gCLcB/s640/H080216SS-P1.jpg)
ដោយ សាន សែល RFA 2016-08-02
វេទិកាសេដ្ឋកិច្ចឥស្លាមពិភពលោកលើកទី១២ (12th World Islamic Economic Forum) បើកទ្វារជាផ្លូវការហើយនៅប្រទេសឥណ្ឌូនេស៊ី នៅថ្ងៃទី២ ខែសីហា។ បណ្ដាមេដឹកនាំរដ្ឋលើកឡើងពីតួនាទីនៃអាជីវកម្មខ្នាតតូច និងមធ្យម (SME) បច្ចេកវិទ្យា សិល្បៈ និងការជំរុញពីរដ្ឋដើម្បីធានាថា រាល់ពលរដ្ឋអាចទទួលបានអត្ថប្រយោជន៍ពីកំណើនសេដ្ឋកិច្ចដោយសមធម៌។
វេទិកាសេដ្ឋកិច្ចឥស្លាមពិភពលោក បានធ្វើនៅប្រទេសឥណ្ឌូនេស៊ី វិញម្ដង ដែលជាប្រទេសអ្នកកាន់សាសនាឥស្លាមធំជាងគេបំផុតលើពិភពលោក។ ក្នុងកម្មវិធីបើកវេទិកានេះ ប្រមុខដឹកនាំរដ្ឋនានាបង្ហាញជំហរ និងយុទ្ធសាស្ត្រដើម្បីពង្រឹងកំណើនសេដ្ឋកិច្ចសកលសម្រាប់ប្រទេសមូស្លីម និងមិនមែនមូស្លីម។
អ្នកដើរតួនាទីសំខាន់ក្នុងវិស័យសេដ្ឋកិច្ចជាង ២ពាន់នាក់ រាប់តាំងពីមេដឹកនាំរដ្ឋ អ្នកជំនួញ អ្នកជំនាញខាងបច្ចេកវិទ្យា សិល្បករមកពី ១០០ប្រទេសអ្នកកាន់សាសនាឥស្លាម និងមិនមែនឥស្លាម ជួបជុំគ្នានៅទីក្រុងហ្សាកាតា (Jakarta) ប្រទេសឥណ្ឌូនេស៊ី (Indonesia) ដើម្បីពិភាក្សា និងចែករំលែកពីយុទ្ធសាស្ត្រ និងបទពិសោធន៍ស្ដីពីការរក្សា និងជំរុញកំណើនសេដ្ឋកិច្ច។ នេះជាមិនមែនជាការចៃដន្យទេដែលវេទិកាពិភពលោកនេះធ្វើឡើងនៅប្រទេសឥណ្ឌូនេស៊ី។ ខណៈសេដ្ឋកិច្ចសកលកំពុងស្រុតចុះ សេដ្ឋកិច្ចឥណ្ឌូនេស៊ី រក្សាលំនឹង។ ស្ថាប័នសេដ្ឋកិច្ចអុដស្វត (Oxford Economics) ប៉ាន់ស្មានថា សេដ្ឋកិច្ចឥណ្ឌូនេស៊ី កើនក្នុងអត្រា ៥ភាគរយ រហូតដល់ឆ្នាំ២០២៥។
ប្រធានមូលនិធិវេទិកាសេដ្ឋកិច្ចឥស្លាមពិភពលោក (WIEF) លោក តួន មូសា ហ៊ីតាម (Tun Mosa Hitam) ថ្លែងថា អាជីវកម្មខ្នាតតូច និងមធ្យម សំខាន់មែនទែនសម្រាប់កំណើនសេដ្ឋកិច្ច។ លោកបញ្ជាក់ថា សេដ្ឋកិច្ចប្រទេសឥណ្ឌូនេស៊ី ដើរទៅមុខបានអាស្រ័យលើការរីកចម្រើនអាជីវកម្មខ្នាតតូច និងមធ្យម ដែលបានបង្កើតការងារ និងជំរុញកំណើនផលិតផលក្នុងស្រុកសរុប (GDP)។
ក្នុងនាមជាម្ចាស់ផ្ទះ ប្រធានាធិបតីនៃប្រទេសឥណ្ឌូនេស៊ី លោក ចូកូ វីដូដូ (Joko Widodo) មានប្រសាសន៍ថា ខណៈបច្ចេកវិទ្យាកំពុងលូតលាស់ខ្លាំង ជាការចាំបាច់ដែរ ដែលរដ្ឋាភិបាលដើរតួនាទីជួយសម្របសម្រួលអប់រំ និងបង្កើនសមត្ថភាពផ្នែកបច្ចេកវិទ្យានេះដល់ពលរដ្ឋ។ អាជីវកម្មជាច្រើន ទាំងអាជីវកម្មខ្នាតតូច និងមធ្យម ផ្ដើមចេញពីបច្ចេកវិទ្យាដែលកំពុងពេញនិយម។ លោកសង្កត់ធ្ងន់ថា ប្រសិនបើអាជីវកម្មខ្នាតតូច និងមធ្យម ដើរមិនទាន់បច្ចេកវិទ្យាទេ ពិភពលោកនឹងទុកអ្នកចោល។ បន្ទុករបស់រដ្ឋាភិបាល ត្រូវធានាថា ការរីកចម្រើនផ្នែកបច្ចេកវិទ្យានេះ ផ្ដល់ប្រយោជន៍ដល់អ្នកក្រីក្រដែរ មិនមែនតែប្រជាជននៅទីក្រុងប៉ុណ្ណោះទេ។
ឧស្សាហកម្មច្នៃប្រឌិតទាក់ទងនឹងវប្បធម៌ ក៏ជួយឲ្យសេដ្ឋកិច្ចរឹងមាំ។ លោក មូហ៊ីតាម គូសបញ្ជាក់ថា កម្មវិធីមូកាហ្វេសត៍ (MOCAfest) ដែលជាកម្មវិធីបង្ហាញស្នាដៃសិល្បៈឥស្លាម និងមិនមែនឥស្លាម ដូចជាសំលៀកបំពាក់ ភ្លេង គំនូរ និង កុន ដែលជាផ្នែកមួយនៃវេទិកាសេដ្ឋកិច្ចឥស្លាមពិភពលោកបង្ហាញថា វប្បធម៌សិល្បៈ ជួយបង្កើតឲ្យមានអាជីវកម្មមានសក្ដានុពលកើតឡើង ដែលជួយលើកតម្កើងមុខមាត់ប្រទេស និងទាក់ទាញទេសចរណ៍។
លោក ណាជីប រ៉ាហ្សាក់ (Najib Razak) នាយករដ្ឋមន្ត្រីនៃប្រទេសម៉ាឡេស៊ី វិញ សង្កត់ធ្ងន់ថា វាជាការចាំបាច់ដែលកំណើនសេដ្ឋកិច្ចអាចស្ថិតស្ថេរបាន លុះត្រាតែមានស្ថិរភាពនយោបាយ និងសន្តិភាព។ នាយករដ្ឋមន្ត្រីរូបនេះថ្លែងថា ការអនុវត្តច្បាប់នានា ត្រូវតែប្រព្រឹត្តទៅដោយតឹងរ៉ឹង។
បើទោះបីជាអ្នកការពារសិទ្ធិមនុស្ស និងអ្នកនយោបាយ ត្រូវបានគេចាប់ដាក់ពន្ធនាគារ ហើយអ្នករិះគន់រដ្ឋាភិបាលត្រូវបានគេបាញ់សម្លាប់ក៏ដោយ រដ្ឋលេខាធិការនៃក្រសួងការងារ លោក អូស្មាន ហាស្សាន់ រៀបរាប់ប្រាប់វេទិកាថា រដ្ឋាភិបាលកម្ពុជា រក្សាបាននូវស្ថិរភាពនយោបាយ សន្តិសុខ និងសន្តិភាព ដើម្បីជួយជំរុញកំណើនសេដ្ឋកិច្ចសង្គម។
វេទិកាសេដ្ឋកិច្ចឥស្លាមពិភពលោកលើកទី១២ ប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី២ ដល់ ៤ ខែសីហា។ ការពិភាក្សា នឹងផ្ដោតលើចំណុចចំនួនប្រាំដែលកំពុងដើរតួនាទីខ្លាំងក្លាក្នុងកំណើនសេដ្ឋកិច្ចពិភពលោក ដូចជា វិស័យហេដ្ឋារចនាសម្ព័ន្ធផ្លូវថ្នល់ អាជីវកម្មខ្នាតតូច និងមធ្យម វិស័យអាហារឥស្លាម (Halal) វិស័យសំលៀកបំពាក់ឥស្លាម និងវិស័យហិរញ្ញវត្ថុឥស្លាម៕