មាស សុខជា ភ្នំពេញប៉ុស្តិ៍ Tue, 2 August 2016
ភ្នំពេញៈ លោកនាយករដ្ឋមន្ត្រី ហ៊ុន សែន បានប្តឹងលោក សម រង្ស៊ី និងលោកស្រី ថាក់ ឡានី ដោយសុំឲ្យតុលាការផ្តន្ទាទោសតាមច្បាប់ និងទារជំងឺចិត្តមួយរយរៀលបន្ទាប់ពីអ្នកទាំងពីរបានចោទរដ្ឋាភិបាល និងលោកនាយករដ្ឋមន្រ្តីថាសម្លាប់អ្នកវិភាគល្បីឈ្មោះលោកបណ្ឌិត កែម ឡី ប៉ុន្តែអ្នកវិភាគបានហៅបណ្ដឹងនេះថាគ្មានប្រយោជន៍ខណៈអ្នកនៅពីក្រោយខ្នងមិនទាន់រកឃើញ។
ក្នុងពាក្យបណ្តឹងពីរផ្សេងគ្នាដាក់ទៅសាលាដំបូងរាជធានីភ្នំពេញកាលពីម្សិលមិញដោយមេធាវីលោកនាយករដ្ឋមន្រ្តី ហ៊ុន សែន គឺលោក គី តិច មិនបានលើកឡើងអំពីបទល្មើសណាមួយដែលកូនក្ដីលោកប្ដឹងសមាជិកព្រឹទ្ធសភាគណបក្ស សម រង្ស៊ី លោកស្រី ថាក់ ឡានី និងលោក សម រង្ស៊ី នោះទេ។
ពាក្យបណ្តឹងនោះបានប្រាប់តុលាការថាព្រឹត្តិការណ៍សម្លាប់លោក កែម ឡី បានទាក់ទាញចំណាប់អារម្មណ៍យ៉ាងខ្លាំងពីសាធារណជនជាតិ និងអន្តរជាតិហើយអ្នករាល់គ្នាបានថ្កោលទោសឧក្រិដ្ឋកម្មនេះហើយភ្លាមៗបន្ទាប់ពីការបាញ់លោក កែម ឡី ឃាតករត្រូវបានចាប់ខ្លួន និងចោទប្រកាន់ទៅតាមច្បាប់។
ពាក្យបណ្តឹងនេះបានរៀបរាប់ថា៖ «ហេតុដូច្នេះការនិយាយជាសាធារណៈរបស់លោក ជំទាវ ថាក់ ឡានី ដែលចោទប្រកាន់ មួលបង្កាច់ និងទម្លាក់កំហុសដោយងងឹតងងល់ទៅលើសម្តេច ហ៊ុន សែន ថាបាញ់សម្លាប់លោកបណ្ឌិត កែម ឡី មិនត្រឹមតែប៉ះពាល់ធ្ងន់ធ្ងរដល់សេចក្តីថ្លៃថ្នូររបស់លោកនាយករដ្ឋមន្រ្តី ហ៊ុន សែន ដែលជានាយករដ្ឋមន្រ្តីនៃព្រះរាជាណាចក្រកម្ពុជាទេប៉ុន្តែថែមទាំងមានចរិតញុះញង់ដើម្បីបញ្ឆេះកំហឹងសាធារណជនដែលអាចបង្កឲ្យមានចលាចលក្នុងសង្គម និងប៉ះពាល់ដល់ដំណើរការនីតិវិធីតុលាការ»។
ពាក្យបណ្តឹងនេះបន្តថា៖ «ដូចបានលើកឡើងខាងលើខ្ញុំជាមេធាវីតំណាងសម្តេចតេជោ ហ៊ុន សែន ប្តឹងទាមទារតុលាការផ្តន្ទាទោសលោកជំទាវ ថាក់ ឡានី ទៅតាមច្បាប់។ ទាមទារជំងឺចិត្ត ១០០ រៀលចំពោះការប៉ះពាល់សេចក្តីថ្លៃថ្នូរ និងកិត្តិយសរបស់សម្តេចតេជោ ហ៊ុន សែន»។
ចំពោះពាក្យបណ្តឹងប្ដឹងលោក សម រង្ស៊ី វិញលោក គី តិច បានប្រាប់ព្រះរាជអាជ្ញាថាកាលពីថ្ងៃទី ១០ កក្កដា ២០១៦ លោក សម រង្ស៊ី បានសរសេរនៅលើទំព័រហ្វេសប៊ុករបស់លោកថា «ការបាញ់សម្លាប់លោក កែម ឡី ថ្ងៃនេះគឺជាភេរវកម្មមួយទៀតដែលរៀបចំដោយអាជ្ញាធររដ្ឋហើយនៅពេលសម្ភាសជាមួយវិទ្យុអាស៊ីសេរីនៅថ្ងៃទី ២៣ កក្កដា ២០១៦ បានបញ្ជាក់ជាដដែល និងចោទប្រកាន់ជាដដែលៗដោយធ្វើឲ្យសាធារណជនដែលបណ្តាញសង្គមហ្វេសប៊ុកចែករំលែក និងផ្តល់មតិយោបល់លើព័ត៌មាននេះតៗគ្នាដោយថ្កោលទោសទៅលើរាជរដ្ឋាភិបាលកម្ពុជា»។
ក្នុងពាក្យបណ្តឹងនេះក៏បានបន្តប្រាប់ព្រះរាជអាជ្ញាពីការបង្ហោះជាសាធារណៈរបស់លោក សម រង្ស៊ី ចោទប្រកាន់ មួលបង្កាច់ស្រដៀងនឹងបណ្ដឹងប្ដឹងលោកស្រី ថាក់ ឡានី ដែរ។ ឯការស្នើសុំតុលាការផ្តន្ទាទោស និងទារសំណងក៏ដូចគ្នាដែរ។
លោក កែម ឡី ត្រូវបានបាញ់ស្លាប់នៅថ្ងៃទី ១០ កក្កដា នៅ ស្ដារម៉ាត ហ្គារ៉ាស់សាំងកាល់តិចក្នុងខណ្ឌចំការមន។ ភ្លាមៗនោះឃាតករឈ្មោះ ជួប សម្លាប់ ត្រូវបានចាប់ខ្លួន។
ប៉ុន្តែតំណាងរាស្ត្រ CNRP លោក អេង ឆៃអ៊ាង បានថ្លែងថាបណ្តឹងនេះមិនចំណេញ CPP ទេ។
លោកបញ្ជាក់ថា៖ «ខ្ញុំយល់ថាការប្តឹងពីរដ្ឋាភិបាលលើលោកប្រធាន [សម រង្ស៊ី] លោកស្រី ថាក់ ឡានី វាមិនមែនជាដំណោះស្រាយទេ។
អ្នកវិភាគនយោបាយបណ្ឌិត មាស នី បានហៅពាក្យបណ្តឹងនេះថាគ្មានប្រយោជន៍ហើយជំរុញឲ្យរដ្ឋាភិបាលខំស៊ើបអង្កេតរកអ្នកនៅពីក្រោយឃាតកម្មនេះ។
លោកថា៖ «...បើករណីឃាតកម្មលោក កែម ឡី នៅមិនទាន់រកឃើញឃាតករពិត បើទោះបីជារដ្ឋាភិបាលព្យាយាមការពារខ្លួនដោយប្តឹងទៅតុលាការអន្តរជាតិក៏ដោយ ក៏សាធារណជននៅតែគិតថាប្រសិនបើរដ្ឋាភិបាលមិនធ្វើក៏...នៅពីក្រោយ»។ «រដ្ឋាភិបាលត្រូវបង្ហាញសមិទ្ធផល... ហើយបើ [រដ្ឋាភិបាល] ចង់ប្តឹងលោក សម រង្ស៊ី រង់ចាំប្តឹងពេលក្រោយ»៕ PS