ដោយ ហ៊ុំ ចំរើន RFA 2016-08-03
ក្រុមអ្នករត់តាក់ស៊ីដឹកត្រីនៅក្រុងប៉ោយប៉ែត ចោទប្រកាន់មន្ត្រីគយ និងរដ្ឋាករចល័តប្រចាំការនៅខេត្តបន្ទាយមានជ័យ ថាបានប្រព្រឹត្តអំពើពុករលួយ ដែលបានឃាត់រថយន្ត ហើយបង្ខំឲ្យពួកគាត់បង់ប្រាក់ដោយគ្មានវិក្កយបត្រ ដើម្បីបម្រើផលប្រយោជន៍របស់ក្រុមខ្លួន។ ប្រធានគយចល័តប្រចាំខេត្តបន្ទាយមានជ័យ បដិសេធចំពោះការចោទប្រកាន់នេះ។
ក្រុមអ្នករត់តាក់ស៊ីដឹកត្រីនៅក្រុងប៉ោយប៉ែត ស្នើឲ្យអង្គភាពប្រឆាំងអំពើពុករលួយ បើកការស៊ើបអង្កេត និងចាត់វិធានការផ្លូវច្បាប់ជាបន្ទាន់ទៅលើមន្ត្រីគយខិលខូច ដែលបានយកប្រាក់ពួកគាត់។
អ្នករត់តាក់ស៊ីមួយចំនួននៅក្រុងប៉ោយប៉ែត ឲ្យដឹងនៅថ្ងៃទី២ សីហា ថា ពួកគាត់ស៊ីឈ្នួលដឹកត្រីចំណីក្រពើ ធ្វើដំណើរតាមផ្លូវជាតិលេខ៥ ពីក្រុងប៉ោយប៉ែត ទៅខេត្តសៀមរាប ហើយបានប្រាក់ឈ្នួលពី ១៥ម៉ឺនរៀលទៅ ២០ម៉ឺនរៀលក្នុងមួយជើង។ ពួកគាត់អះអាងថា មន្ត្រីគយចល័តរបស់ក្រសួងប្រចាំនៅចំណុចផ្លូវជាតិលេខ៥ ក្បែរមន្ទីរសាធារណការ និងដឹកជញ្ជូនខេត្តបន្ទាយមានជ័យ បានឃាត់រថយន្តរបស់ពួកគាត់ជាច្រើនគ្រឿង ដើម្បីបង្ខំឲ្យបង់ប្រាក់ម្នាក់ ៥ម៉ឺនរៀលក្នុងមួយជើង ឬឲ្យបង់មួយខែ ១០០ដុល្លារអាមេរិក ដោយគ្មានវិក្កយបត្រ ដើម្បីជាថ្នូរបានដឹកទំនិញយកទៅដល់គោលដៅ។
អ្នកដឹកត្រី ហៅសកម្មភាពនេះថាជាទង្វើមួយគាបសង្កត់លើប្រជាពលរដ្ឋក្រីក្រដោយខុសច្បាប់៖ «ខ្ញុំអត់ដែលគេចពីសមត្ថកិច្ចគយណាម្ដងទេ ប៉ុន្តែលើកនេះវាហួសពីសមត្ថភាពរបស់ខ្ញុំ មិនអាចទទួលយកបាន។ ខ្ញុំចង់ឲ្យអនុវត្តគាត់តាមច្បាប់ទៅទំនិញដូចជាគ្រឿង គ្រឿងកេះ និងផលិតផលមានតម្លៃផ្សេងទៀត ហើយលុបចោលនូវការយកប្រាក់ពីការដឹកត្រី និងបន្លែផ្លែឈើកំប៉ិកកំប៉ុក»។
ឆ្លើយតបនឹងការចោទប្រកាន់នេះ ប្រធានគយចល័តប្រចាំការខេត្តបន្ទាយមានជ័យ លោក រក្សា សេរី មានប្រសាសន៍ថា មូលហេតុដែលមន្ត្រីគយឃាត់រថយន្តតាក់ស៊ី ដោយសារពួកគេដឹកទំនិញដែលនាំចូលគ្មានច្បាប់អនុញ្ញាតត្រឹមត្រូវ៖ «ហើយខ្ញុំបានពួកគាត់មកធ្វើកិច្ចសន្យា ដើម្បីឲ្យគាត់ធ្វើការបង់ពន្ធនាំចូល ប៉ុន្តែពួកគាត់មិនសហការជាមួយសមត្ថកិច្ចទេ។ ហើយអ្វីដែលពួកគាត់ចោទប្រកាន់នោះ គឺជារឿងមិនពិតឡើយ»។
ទោះបីជាយ៉ាងនេះក្ដី មន្ត្រីសម្របសម្រួលអង្គការលីកាដូ (LICADHO) ខេត្តបន្ទាយមានជ័យ លោក ភុន ឈិន បញ្ជាក់ថា ទំនិញដែលពលរដ្ឋជួលដឹកឲ្យគេនោះ ជាផលិតផលដឹកនៅក្នុងស្រុកដែលឆ្លងកាត់ការត្រួតពិនិត្យពីសមត្ថកិច្ចតាមច្រកព្រំដែន គឺពុំចាំបាច់មានលិខិតស្នាមនោះឡើយ។ លោកថា សមត្ថកិច្ចតម្រូវឲ្យអ្នករត់ឡានឈ្នួលបង់ប្រាក់ដោយគ្មានវិក្កយបត្រ គឺជាអំពើខុសច្បាប់៖ «ស្នើឲ្យមន្ត្រីគយធ្វើការប្រកាសនូវប្រភេទទំនិញដែលតម្រូវឲ្យមានការបង់ពន្ធ និងទំនិញណាដែលរួចពន្ធ ដល់ប្រជាពលរដ្ឋឲ្យបានច្បាស់លាស់។ ម្យ៉ាងទៀត សូមឲ្យចាត់វិធានការឲ្យចំគោលដៅ កុំឲ្យខឹងគោទៅវាយរទេះ គឺមិនត្រូវឡើយ»។
កាលពីថ្ងៃទី១ សីហា ក្រុមអ្នករត់តាក់ស៊ីដឹកត្រីនៅក្រុងប៉ោយប៉ែត ប្រមាណ ២០នាក់ បានតវ៉ាប្រឆាំងនឹងមន្ត្រីគយនៅទីស្នាក់ការគយចល័តជាប់ផ្លូវជាតិលេខ៥ នៅក្រុងសិរីសោភ័ណ ខេត្តបន្ទាយមានជ័យ ដើម្បីទាមទារឲ្យមន្ត្រីគយបញ្ឈប់យកប្រាក់ពីពួកគាត់បន្តទៀត ប៉ុន្តែការតវ៉ានោះ ពុំទាន់ទទួលបានលទ្ធផលនៅឡើយ៕