| Image may be NSFW. Clik here to view.  |
| លោកនាយករដ្ឋមន្ត្រី ហ៊ុន សែន (រូបមុខ) ក្នុងអំឡុងពេលមកដល់ព្រលានយន្តហោះអន្តរជាតិភ្នំពេញ នៅថ្ងៃ៩ មេសា ២០១០។ Photo: RFA |
ដោយ ហេង សកល RFA 2018-01-24
លោកនាយករដ្ឋមន្ត្រី ហ៊ុន សែន និងមេដឹកនាំអាស៊ានផ្សេងទៀត បានធ្វើដំណើរទៅដល់ប្រទេសឥណ្ឌា ដើម្បីចូលរួមកិច្ចប្រជុំកំពូលអាស៊ាន-ឥណ្ឌាលើកទី២៥ នៅថ្ងៃព្រហស្បតិ៍ទី២៥ មករានេះ។ កិច្ចប្រជុំកំពូលពិសេសរំលឹកខួបអនុស្សាវរីយ៍អាស៊ាន-ឥណ្ឌា នឹងប្រព្រឹត្តរយៈពេលពីរថ្ងៃ នៅទីក្រុងញូវដេលី (New Daily)។ នៅក្នុងដំណើរទស្សនកិច្ចនេះ លោក ហ៊ុន សែន គ្រោងនឹងចុះហត្ថលេខាលើឯកសារមួយចំនួន ព្រមទាំងថ្លែងសុន្ទរកថា គន្លឹះស្តីអំពីឪកាសវិនិយោគនៅកម្ពុជា ដើម្បីទាក់ទាញវិនិយោគទុនឥណ្ឌាចូលមកកម្ពុជា និងដើម្បីជំរុញទំនាក់ទំនងធុរកិច្ចនៃប្រទេសទាំងពីរ។
លោក ហ៊ុន សែន ក៏គ្រោងនឹងជួបជាមួយមេដឹកនាំប្រទេសឡាវ វៀតណាម ដើម្បីជជែកអំពីបញ្ហាប្រឈមដែលទាក់ទងនឹងគម្រោងអភិវឌ្ឍន៍តំបន់ត្រីកោណ នៃប្រទេសទាំងបី រួមមាន កម្ពុជា-ឡាវ-វៀតណាម។
មុនដំណើរទស្សនកិច្ច លោក ហ៊ុន សែន ទៅប្រទេសឥណ្ឌា កាលពីថ្ងៃទី២២ ខែមករា លោក ប្រាក់ សុខុន រដ្ឋមន្ត្រីក្រសួងការបរទេសបានជួបពិភាក្សាគ្នាជាមួយឯកអគ្គរដ្ឋទូតឥណ្ឌាប្រចាំកម្ពុជា អ្នកស្រី ម៉ូនីការ ជេន (Manika Jain) ដើម្បីពង្រឹងនូវកិច្ចសហប្រតិបត្តិការទ្វេភាគីរវាងប្រទេសទាំងពីរផងដែរ។
លិខិតរបស់ក្រសួងការបរទេស ចុះថ្ងៃទី២៣ ខែមករា ឱ្យដឹងថា លោក ប្រាក់ សុខុន ក្រៅពីជជែកគម្រោងទស្សនកិច្ចរបស់លោក ហ៊ុន សែន។ លោក ប្រាក់ សុខុន ក៏បានគូសបញ្ជាក់ពីសារៈសំខាន់ នៃការតភ្ជាប់ជើងហោះហើរត្រង់រវាងកម្ពុជា-ឥណ្ឌា ដែលជាកត្តាសំខាន់មួយ ក្នុងការលើកកម្ពស់កិច្ចសហប្រតិបត្តិការសេដ្ឋកិច្ច ទេសចរណ៍ និងការផ្លាស់ប្ដូរពាណិជ្ជកម្មរវាងប្រទេសទាំងពីរ៕
