ដោយ ហង្ស សាវយុត RFA 2016-08-05
កាលបរិច្ឆេទនៃការប្រឡងយកសញ្ញាប័ត្រមធ្យមសិក្សាទុតិយភូមិ (បាក់ឌុប) សម្រាប់ឆ្នាំ២០១៥-២០១៦ ទូទាំងប្រទេស នឹងមកដល់នៅថ្ងៃទី២២ ខែសីហា ខាងមុខ។
សម្រាប់ការប្រឡងយកសញ្ញាប័ត្របាក់ឌុបឆ្នាំនេះ វិទ្យាល័យ ១០ មករា ដែលមានសិស្សត្រៀមប្រឡងបាក់ឌុបចំនួនជាង ៨៩០នាក់ បានដកបេក្ខភាពសិស្សចំនួន ១៤០នាក់ មិនឱ្យមានសិទ្ធិចូលប្រឡងបានទេ។
មន្ទីរអប់រំយុវជន និងកីឡា ខេត្តសៀមរាប បានរៀបចំមន្ត្រីមួយចំនួន ហើយបញ្ជូនទៅជួបជាមួយ នាយកវិទ្យាល័យ ១០ មករា ដើម្បីជជែកស្វែងរកមធ្យោបាយជួយឱ្យសិស្សសាលាខ្លះដែលបាត់បង់បេក្ខភាពប្រឡងយកសញ្ញាប័ត្របាក់ឌុប ឆ្នាំនេះ ឱ្យមានសិទ្ធិចូលប្រឡងវិញបាន។
ការបញ្ជូនមន្ត្រីមន្ទីរអប់រំ ឱ្យទៅជួបជជែកជាមួយអ្នកគ្រប់គ្រងវិទ្យាល័យនោះ បានធ្វើឡើងចាប់តាំងពីល្ងាចថ្ងៃទី៣ រហូតដល់ព្រឹកថ្ងៃទី៤ ខែសីហា បន្ទាប់ពីនាយកវិទ្យាល័យ ១០ មករា បានបិទផ្សាយបញ្ជីឈ្មោះដកបេក្ខភាពសិស្សចំនួន ១៤០នាក់ មិនឱ្យចូលរួមប្រឡងសញ្ញាប័ត្របាក់ឌុប នៅថ្ងៃទី២២ ខែសីហា ខាងមុខបានទេ។
ជំនួយការរបស់នាយកវិទ្យាល័យ ១០ មករា គឺលោក ប៊ី ប៊ុន សុផុន្នី។ លោកមានប្រសាសន៍កាលពីព្រឹកថ្ងៃព្រហស្បតិ៍ ទី៤ ខែសីហា នៅក្នុងទីចាត់ការវិទ្យាល័យនោះថា ការដែលដកបេក្ខភាពសិស្ស ១៤០នាក់ មិនឱ្យចូលរួមប្រឡងបាក់ឌុប គឺយោងទៅលើសេចក្ដីណែនាំរបស់ក្រសួងអប់រំយុវជន និងកីឡា ដែលបានចេញប្រកាសរួចហើយ។
ជំនួយការដដែលបញ្ជាក់ថា ក្រសួងអប់រំយុវជន និងកីឡា បានណែនាំថា រាល់សិស្សទាំងឡាយណាដែលបានអវត្តមានក្នុងពេលសិក្សាដោយមានច្បាប់ចំនួន ៣០ដង ព្រមទាំងឈប់ទោះជាមានច្បាប់ និងអត់ច្បាប់ចំនួន ៤៥ដង គឺត្រូវដកបេក្ខភាពមិនឱ្យប្រឡងសញ្ញាប័ត្របាក់ឌុបទេ។
លោកអះអាងទៀតថា សិស្ស ១៤០នាក់ ដែលវិទ្យាល័យ ១០ មករា បានដកបេក្ខភាពមិនឱ្យប្រឡងសញ្ញាប័ត្របាក់ឌុបឆ្នាំនេះ ភាគច្រើនគឺមិនបានដាក់ពាក្យសុំប្រឡង និងធ្លាក់ពិន្ទុមធ្យមភាគប្រចាំឆ្នាំ៖ «ក្រសួងអប់រំ បានកំណត់ច្បាស់ហើយថា បើកាលណាធ្លាក់មធ្យមភាគ គឺអត់បានប្រឡងបាក់ឌុប ទេ។ សាលាសោកស្ដាយដែរថា សិស្សដែលដាក់ពាក្យទៅប្រឡងកាលណាវាដកបេក្ខភាពច្រើនក៏ខូចកេរ្តិ៍ឈ្មោះរបស់សាលាដែរ»។
បើទោះបីជាអ្នកគ្រប់គ្រងវិទ្យាល័យ ១០ មករា អះអាងថា ការដកបេក្ខភាពសិស្សរហូតដល់ទៅ ១៤០នាក់ គឺធ្វើតាមការណែនាំរបស់ក្រសួងអប់រំយុវជន និងកីឡា ក៏ដោយ ក៏នៅកន្លែងដែលបិទផ្សាយបញ្ជីឈ្មោះដកបេក្ខភាពសិស្សនោះ មិនមានបិទផ្សាយសេចក្ដីណែនាំរបស់ក្រសួងជុំវិញរឿងនោះទេ ហើយនៅពេលដែលអាស៊ីសេរី ជួបសម្ភាសក៏មិនមានឃើញបង្ហាញពីឯកសារណែនាំរបស់ក្រសួងនោះដែរ។
នៅកន្លែងបិទផ្សាយបញ្ជីដកបេក្ខភាពសិស្ស ១៤០នាក់ មិនឱ្យប្រឡងបាក់ឌុបនោះ គឺមានសិស្សប្រុស-ស្រី ជាច្រើន បានមកពិនិត្យមើលឈ្មោះរបស់ពួកគេ។ នៅពេលដែលឃើញថា ឈ្មោះរបស់ខ្លួនមិនបានប្រឡងបាក់ឌុបហើយ គឺពួកគេបង្ហាញទឹកមុខក្រៀមក្រំ ក៏ប៉ុន្តែមិនមានសិស្សណាម្នាក់ដែលគ្មានឈ្មោះប្រឡងនោះ ហ៊ានធ្វើសម្ភាសន៍ជាមួយអ្នកសារព័ត៌មានឡើយ។
គ្រូបង្រៀនម្នាក់ដែលសុំមិនបញ្ចេញឈ្មោះ មានប្រសាសន៍ប្រាប់តាមទូរស័ព្ទថា វិទ្យាល័យ ១០ មករា ដែលដកបេក្ខភាពសិស្សរហូត ១៤០នាក់ មិនឱ្យប្រឡងបាក់ឌុបឆ្នាំនេះ គឺជាចំនួនច្រើនបំផុតដែលមិនធ្លាប់មានទេ តាំងពីមុនមក៖ «ដកបេក្ខភាព វាច្រើនហួសពីយើងស្មាន! តើបញ្ហានេះក្រសួងអប់រំយុវជន និងកីឡា សប្បាយចិត្តនឹងធ្វើដូច្នេះ ឬក៏នាយកវិទ្យាល័យ ១០ មករា សប្បាយចិត្តនឹងធ្វើដូច្នេះ»។
គ្រូបង្រៀនដដែលព្រួយបារម្ភអំពីអនាគតយុវជន ដែលមិនបានចូលប្រឡងសញ្ញាប័ត្របាក់ឌុប ទាំងនេះ ហើយអំពាវនាវឱ្យក្រសួងអប់រំយុវជន និងកីឡា គួរពិនិត្យរឿងនេះឡើងវិញ។
មន្ទីរអប់រំយុវជន និងកីឡា ខេត្តសៀមរាប ក៏បានសម្ដែងការព្រួយបារម្ភចំពោះអនាគតយុវជន ដែលមិនបានចូលរួមប្រឡងបាក់ឌុប ទាំងនោះ ដូចជាគ្រូបង្រៀនខ្លះដែរ។
ប្រធានមន្ទីរអប់រំយុវជន និងកីឡា ខេត្តសៀមរាប លោក សយ ទិត្យាវង្ស មានប្រសាសន៍ថា លោកទើបតែបានទទួលរបាយការណ៍ស្ដីពីវិទ្យាល័យ ១០ មករា ដែលដកបេក្ខភាពសិស្ស ១៤០នាក់ មិនឱ្យប្រឡងបាក់ឌុប ក្នុងឆ្នាំនេះ។
លោក សយ ទិត្យាវង្ស យល់ឃើញថា វិទ្យាល័យ ១០ មករា ដែលដកបេក្ខភាពសិស្សមិនឱ្យប្រឡងបាក់ឌុប ឆ្នាំនេះ គឺច្រើនពេក ក៏ប៉ុន្តែលោកនៅមិនទាន់វិនិច្ឆ័យថា យ៉ាងណានៅឡើយ គឺនៅរង់ចាំការស្រាវជ្រាវរបស់មន្ត្រីដែលបញ្ជូនឱ្យទៅជួបជជែកជាមួយនាយកសាលា ១០ មករា ជាមុនសិន៖ «ចាំពិនិត្យជាក់ស្ដែងសិន តើសិស្សនោះអវត្តមានច្រើន ឬក៏គាត់ធ្លាក់មធ្យមភាគតិចតួច ឬក៏ច្រើនគឺខ្ញុំមិនអាចបកស្រាយបាននៅពេលនេះទេ»។
មន្ទីរអប់រំយុវជន និងកីឡា ខេត្តសៀមរាប ទទួលស្គាល់ថា តាមគោលការណ៍របស់ក្រសួងអប់រំ គឺពិតជាមិនអនុញ្ញាតឱ្យសិស្សដែលអវត្តមានច្រើន និងធ្លាក់ពិន្ទុមធ្យមភាគប្រចាំឆ្នាំខ្លាំងពេក បានប្រឡងបាក់ឌុប មែន។
មន្ត្រីមន្ទីរអប់រំយុវជន និងកីឡា ខេត្តសៀមរាប ឱ្យដឹងថា មិនមែនមានតែ វិទ្យាល័យ ១០ មករា តែមួយប៉ុណ្ណោះទេ ដែលបានដកបេក្ខភាពសិស្សខ្លះ មិនឱ្យប្រឡងបាក់ឌុប ក្នុងឆ្នាំនេះ គឺមានវិទ្យាល័យជាច្រើនទៀតនៅក្នុងខេត្តសៀមរាប ក៏បានធ្វើដូចគ្នាដែរ។
ទោះជាយ៉ាងណា មន្ត្រីមន្ទីរអប់រំយុវជន និងកីឡា មិនអាចបញ្ជាក់បានទេថា តើរហូតមកដល់ពេលនេះ នៅតាមវិទ្យាល័យជាច្រើនក្នុងខេត្តសៀមរាប បានដកបេក្ខភាពសិស្សមិនឱ្យប្រឡងបាក់ឌុប ឆ្នាំនេះ ចំនួនសរុបប៉ុន្មាននាក់ទេ ពីព្រោះនាយកវិទ្យាល័យជាច្រើននៅមិនទាន់បញ្ជូនរបាយការណ៍អំពីរឿងនេះមកដល់ដៃមន្ទីរអប់រំ ទាំងអស់នៅឡើយ៕