ភ្នំពេញ: រសជាតិចំណីអាហារលក់តាមចិញ្ចើមថ្នល់ដែលឆ្ងាញ់តែងតែអន្ទងចិត្តមនុស្សគ្រប់វ័យឲ្យឈប់ម៉ូតូរថយន្តចុះទទួលទាន។
សព្វថ្ងៃមានហាងអាហារជាច្រើនបាននាំយករសជាតិចំណីចំណុកតាមចិញ្ចើមថ្នល់ទាំងអស់មកកែច្នៃលក់ ដោយមានកន្លែងអង្គុយសមរម្យ និងចំណតងាយស្រួលជាងមុន។
ក្នុងចំណោមនោះ The Street គឺជាស្លាកយីហោហាងមួយដែលមានបម្រើនូវមុខម្ហូបតាមចិញ្ចើមថ្នល់ប្រកបដោយអនាម័យ។
ហាងអាហារនេះមានរូបភាពគូរជាផ្លូវ មានអំពូលភ្លើង អគារចាស់ៗ និងមានបំពាក់កង្ហារបីបួន។ នៅកន្លែងអង្គុយធ្វើពីតុកៅអីមានភ្ញៀវជាយុវវ័យជជែកគ្នាបណ្ដើរ ទទួលទានបណ្ដើរ។
ម្ហូបអាហារនៅក្នុងហាងនេះមានដូចជាប្រហិតភ្នំភ្លើងទឹកកក សាច់ជ្រូកអាំងចង្កាក់ ជើងមាន់បំពងខ្ទឹមស ឆ្អឹងជំនីរបំពងខ្ទឹមស ផ្សិតខ្មៅញាត់ប្រហិតត្រីបំពង អណ្ដាតទាបំពង ព្រុយត្រីសាល់ម៉ុនអាំងអំបិលម្ទេសនិងអាហារជាច្រើនមុខទៀត។
ចំពោះគ្រឿងសមុទ្រវិញ ក្ដាមសេះអាំងដោយប្រើភ្លើងចង្ក្រានធ្យូងតិចៗបានបង្ហើរក្លិនឈ្ងុយភាយៗ។
សាច់ក្ដាមស្រស់ៗមានរសជាតិ បន្ថែមនូវក្លិនខ្ទឹមសពីទឹកជ្រលក់ខាប់ទឹកត្រីកោះកុងហឹរ ផ្អែម ជូរប្រៃ រឹតតែឆ្ងាញ់ ធ្វើឲ្យយើងមានអារម្មណ៍ដូចបានទៅដល់ឆ្នេរសមុទ្រតែម្ដង។
ហាង The Street មានស្ថិតនៅផ្ទះលេខ ២០២ ផ្លូវ ១៤៣ សង្កាត់បឹងកេងកង ២ ខណ្ឌចំការមន ទូរស័ព្ទលេខ ០៦០ ៦៦៦ ៦៣៦៕