ដោយ សូត សុខប្រាថ្នា RFA 2016-04-30
ក្រុមគ្រួសារ លោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម ព្រមទាំងប្រជាពលរដ្ឋនៅក្នុងភូមិ ហៅការនាំខ្លួនលោកមេឃុំរូបនេះពីសំណាក់អង្គភាពប្រឆាំងអំពើពុករលួយ ថាជារឿងអយុត្តិធម៌។ ការលើកឡើងនេះ ក្រោយពេលអង្គភាពប្រឆាំងអំពើពុករលួយ នាំលោក ស៊ាង ចែត មកអង្គភាពដើម្បីសាកសួរបន្ត ជុំវិញរឿងទឹកប្រាក់ ៥០០ដុល្លារ បម្រុងនឹងប្រគល់ឲ្យក្រុមគ្រួសារអ្នកនាង ខុម ចាន់តារាទី ហៅ ស្រីមុំ។
ក្រុមគ្រួសារមេឃុំស្រក មកពីគណបក្ស សម រង្ស៊ី និងប្រជាពលរដ្ឋនៅក្នុងឃុំ ព្រមទាំងម្តាយរបស់អ្នកនាង ខុម ចាន់តារាទី អំពាវនាវឲ្យរាជរដ្ឋាភិបាល និងអង្គភាពប្រឆាំងអំពើពុករលួយ ដោះលែងមេឃុំរបស់ខ្លួនឲ្យមានសេរីភាពឡើងវិញ។
ការស្នើនេះ ដោយពួកគាត់យល់ឃើញថា ការឃាត់ខ្លួនលោក ស៊ាង ចែត ពីសំណាក់អង្គភាពប្រឆាំងអំពើពុករលួយ ដោយសាររឿងប្រាក់ ៥០០ដុល្លារនោះពុំមែនជារឿងត្រឹមត្រូវ។ បន្ថែមពីនេះទៀត ក្រុមគ្រួសារអ្នកនាង ខុម ចាន់តារាទី ក៏មិនបានទទួលប្រាក់ទាំងនោះដែរ។
ប្រពន្ធលោកមេឃុំ ស៊ាង ចែត គឺអ្នកស្រី ស្រេង សុខឃឿន មានប្រសាសន៍កាលពីថ្ងៃទី២៥ មេសា ថា ប្រាក់នោះ គឺជាប្រាក់ទទួលបានពីសប្បុរសជននៅក្រៅប្រទេសដើម្បីឲ្យគ្រួសារអ្នកនាង ខុម ចាន់តារាទី មិនមែនជាប្រាក់សម្រាប់ឲ្យជាថ្នូរនឹងការបិទបាំងរឿងអាស្រូវស្នេហាអ្វីទេ។ អ្នកស្រីហៅការឃាត់ខ្លួនប្ដីរបស់ខ្លួនថាជារឿងអយុត្តិធម៌៖ «ប្ដីខ្ញុំថា ចែ! ចែឯងគេផ្ញើលុយមក ៥០០ដុល្លារ ចែឯងយកអត់គេផ្ញើពីស្រុកក្រៅមក។ គាត់ថា អញអត់យកទេ រឿងហ្នឹងស្ងប់ហើយ»។
ការទាមទារយុត្តិធម៌នេះ បន្ទាប់ពីមេឃុំស្រក លោក ស៊ាង ចែត ត្រូវបានអង្គភាពប្រឆាំងអំពើពុករលួយ នាំខ្លួនដើម្បីទៅសាកសួរបន្តនៅអង្គភាពកាលពីថ្ងៃអាទិត្យ ទី២៤ មេសា។
ពលរដ្ឋមួយរូបនៅភូមិល្ពាក ឃុំស្រក អ្នកស្រី អុន ញ៉ ឲ្យដឹងថា លោក ស៊ាង ចែត ជាអ្នកដឹកនាំល្អនៅក្នុងឃុំ ដោយមានការស្រឡាញ់រាប់អានពីប្រជាពលរដ្ឋជាច្រើន ចេះជួយទុក្ខលំបាកអ្នកភូមិទូទៅ។ ពលរដ្ឋរូបនេះបន្តថា ការឃាត់ខ្លួន លោក ស៊ាង ចែត គឺជារឿងអយុត្តិធម៌ ដ្បិតការចោទប្រកាន់ទាំងឡាយ គឺជារឿងមិនត្រឹមត្រូវ៖ «ហ្នឹងទៅពពាយនាយហ្នឹងដើម្បីឲ្យអង្គការ។ អង្គការសិទ្ធិមនុស្ស អង្គការស្អីក៏ដោយ ឲ្យជួយលើកលែងទោសមេឃុំខ្ញុំឲ្យមកកន្លែងវិញ»។
កាលពីថ្ងៃទី២៥ មេសា អង្គភាពប្រឆាំងអំពើពុករលួយ បានរៀបចំធ្វើសន្និសីទកាសែតជុំវិញការឃាត់ខ្លួនមេឃុំស្រក ក្នុងនោះ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បញ្ជាក់ថា ការអញ្ជើញលោក ស៊ាង ចែត ទៅសាកសួរនៅអង្គភាពដើម្បីបន្តនីតិវិធី និងរហូតឈានទៅឃាត់ខ្លួន គឺយោងទៅតាមចម្លើយរបស់មេឃុំរូបនោះ ដោយមិនអាស្រ័យលើលិខិតចំហរបស់អ្នកនាង ស្រីមុំ តែមួយនោះឡើយ។ លោកថា ការអញ្ជើញលោក ស៊ាង ចែត ទៅអង្គភាព គឺជានីតិវិធីទីមួយ ហើយលោកមេឃុំ ស្ម័គ្រចិត្តទៅតាមការអញ្ជើញរបស់អង្គភាពថែមទៀត៖ «មោះ! សុំអញ្ជើញទៅអង្គភាពបន្តការស្តាប់ចម្លើយ ព្រោះខ្ញុំអស់ពេលនៅទីនោះហើយ បើគាត់មកគឺមកតាមសម្រួល»។
សាលាឃុំស្រក ២០១៦ ៨៥៥
២៥-មេសា-២០១៦៖ សាលាឃុំស្រក ស្រុកកំពង់សៀម ខេត្តកំពង់ចាម។ RFA/Saut Sokpratha
ទោះបីជាបែបនេះក្តី មនុស្សជំនិតមេឃុំស្រក គឺលោក សែម កុសល ដែលជាអ្នកដឹងរឿងនេះបញ្ជាក់ផ្ទុយគ្នាទៅនឹងការលើកឡើងរបស់លោក ឱម យ៉ិនទៀង។ លោកថា នៅពេលលោក ឱម យ៉ិនទៀង សួរនាំចប់ ក៏ស្នើសុំអភិបាលស្រុកកំពង់សៀម ដើម្បីអញ្ជើញលោក ស៊ាង ចែត ទៅសាកសួរនៅអង្គភាពប្រឆាំងអំពើពុករលួយ បន្ថែម។ ក្រោយមក អង្គរក្សរបស់លោកពីរនាក់ ក៏ចាប់ក្រៀកស្មាលោកមេឃុំរូបនោះបណ្ដើរចូលឡាន ហើយនាំមកភ្នំពេញតែម្តង។ លោកហៅការឃាត់ខ្លួនមេឃុំស្រក ថាធ្វើឡើងដើម្បីបំបាក់ស្មារតីគណបក្សប្រឆាំងច្រើនជាង៖ «អានេះ! ខ្ញុំជាកសិករស្វែងយល់ថា រឿងនេះអយុត្តិធម៌ពេក ព្រោះអត់មានតាមដានឲ្យការពិតផង»។
ទន្ទឹមនឹងនេះ លោក សែម កុសល ដែលជាមនុស្សជំនិតរបស់មេឃុំស្រក កំពុងបារម្ភខ្លាចមានការចោទប្រកាន់ណាមួយលើរូបលោក ហើយឈានទៅចាប់ខ្លួនលោកតែម្តង។
ចំណែកម្តាយអ្នកនាង ខុម ចាន់តារាទី គឺអ្នកស្រី សៀន លន ដែលត្រូវជាជីទួតមួយប្រពន្ធលោក ស៊ាង ចែត ព្រមទាំងរស់នៅក្បែរផ្ទះគ្នានោះមានប្រសាសន៍កាលពីថ្ងៃទី២៥ មេសា ថា ប្រាក់ចំនួន ២លានរៀលដែលលោកមេឃុំបម្រុងប្រគល់ឲ្យអ្នកស្រី គឺគាត់មិនបានទទួលទេ ពីព្រោះមិនចង់មានរឿងវែងឆ្ងាយបន្តទៀត។ អ្នកស្រីបញ្ជាក់ថា ប្រាក់នោះជាប្រាក់ជំនួយមកពីក្រៅប្រទេស ដោយមិនមានចេតនាណាមួយដើម្បីឲ្យក្រុមគ្រួសារអ្នកស្រី បិទបាំងរឿងអាស្រូវ ឬបញ្ចប់រឿងដែលកំពុងតែកើតឡើងថ្មីៗនោះឡើយ៖ «អត់ទេ អត់សោះហើយ និយាយថ្ងៃថ្មើរហ្នឹង អត់មានប្រាថ្នាឲ្យនិយាយថាម៉េចៗសោះ អត់សោះ។ មេឃុំហ្នឹងអត់មាននិយាយ ឃើញថាលុយហ្នឹងវាអ៊ីចេះវាអ៊ីចុះ អត់មាននិយាយតសោះហើយ អត់មាននិយាយច្រើនទេ»។
អ្នកស្រីបន្ថែមថា កូនអ្នកស្រី គឺអ្នកនាង ខុម ចាន់តារាទី ធ្លាប់រៀបអាពាហ៍ពិពាហ៍ម្តងរួចមកហើយ ប៉ុន្តែបែកបាក់គ្នាទៅវិញ។ ជាមួយគ្នានេះ អ្នកស្រីអះអាងថា នឹងត្រៀមខ្លួនដើម្បីជួយឲ្យលោកមេឃុំស្រក មានសេរីភាពថែមទៀត។
ដោយឡែកតំណាងរាស្ត្រគណបក្សសង្គ្រោះជាតិ មណ្ឌលខេត្តកំពង់ចាម ដែលជាអ្នកយកប្រាក់ទៅប្រគល់បន្តឲ្យលោក ស៊ាង ចែត គឺលោក ម៉ៅ មុនីវណ្ណ។ លោកអះអាងថា លុយនោះជាលុយសប្បុរសជននៅប្រទេសណូវែលហ្សេឡង់ដ៍ (New Zealand) ដើម្បីឲ្យក្រុមគ្រួសារអ្នកនាង ស្រីមុំ ដោយពលរដ្ឋនៅក្រៅប្រទេសដឹងថា គ្រួសារនេះមានជីវភាពក្រីក្រ ពោលគឺជាប្រាក់មនុស្សធម៌សុទ្ធសាធ មិនពាក់ព័ន្ធរឿងផ្សេងឡើយ។
លោក ស៊ាង ចែត គឺមនុស្សមានប្រជាប្រិយភាពម្នាក់នៅក្នុងឃុំមកពីគណបក្សប្រឆាំង ហើយលោកជាប់ឆ្នោតជាមេឃុំស្រក កាលពីឆ្នាំ២០១២។ លោកមានអាយុជាង ៤០ឆ្នាំ និងមានកូន ៥នាក់ សុទ្ធតែប្រុស ព្រមទាំងមានឪពុកម្ដាយចំណាស់នៅក្នុងបន្ទុកផង។ នៅថ្ងៃទី២៦ មេសា ក្រុមគ្រួសារលោក ព្រមទាំងម្តាយអ្នកនាង ស្រីមុំ បាននាំគ្នាទៅសួរសុខទុក្ខលោក ស៊ាង ចែត នៅអង្គភាពប្រឆាំងអំពើពុករលួយ និងមានបំណងស្នើឲ្យអង្គភាពដោះលែងមេឃុំរូបនេះឲ្យមានសេរីភាពឡើងវិញ។
ចំណាត់ការរបស់អង្គភាពប្រឆាំងអំពើពុករលួយ លើមេឃុំស្រក គឺធ្វើឲ្យមន្ត្រីសង្គមស៊ីវិលនៅខេត្តកំពង់ចាម យល់ថា កាន់តែដុតកម្ដៅនយោបាយឲ្យកាន់តែក្តៅឡើង។
មន្ត្រីសម្របសម្រួលអង្គការការពារសិទ្ធិមនុស្សលីកាដូ (LICADHO) លោក ប៊ូ វីរៈ ដែលបានតាមដានករណីនេះមានប្រសាសន៍ថា ចំណាត់ការរបស់អង្គភាពប្រឆាំងអំពើពុករលួយ មិនបានធ្វើឡើងដោយទន់ភ្លន់ឡើយ ប៉ុន្តែជាវិធានការក្តៅ។ បញ្ហានេះ គឺធ្វើឲ្យប្រជាពលរដ្ឋ ពិសេសពលរដ្ឋនៅឃុំស្រក កាន់តែមានក្តីបារម្ភ៕