ប៊ុន សេងគង់ ភ្នំពេញប៉ុស្តិ៍ Mon, 8 August 2016
ភ្នំពេញៈ បុគ្គលិកគណៈកម្មាធិការជាតិរៀបចំការបោះឆ្នោត និងបុគ្គលិកជាប់កិច្ចសន្យាដទៃៗទៀតនឹងត្រូវតម្រូវឲ្យធ្វើការ ៧ ថ្ងៃក្នុងមួយសប្តាហ៍សម្រាប់រយៈពេល ៥ ខែខាងមុខដើម្បីចុះឈ្មោះអ្នកបោះឆ្នោតជិត ១០ លាននាក់នៅមុនការបោះឆ្នោត។ នេះបើតាមការប្រកាសរបស់ គ.ជ.ប. កាលពីចុងសប្តាហ៍មុន។
អ្នកនាំពាក្យ គ.ជ.ប. លោក ហង្ស ពុទ្ធា បានថ្លែងថាការដឹកមកយឺតនៃកុំព្យូទ័រដែលត្រូវការសម្រាប់ការចុះឈ្មោះដែលផ្តល់ដោយសហភាពអឺរ៉ុប និងដឹកដោយការិយាល័យអង្គការសហប្រជាជាតិសម្រាប់សេវាគម្រោង (UNOPS) គឺរួមចំណែកផងដែរក្នុងការធ្វើឲ្យមានការតម្រូវធ្វើការងារច្រើនម៉ោងនេះ។
លោកបានថ្លែងថា៖ «ការដឹកបរិក្ខារមកយឺតគឺជាកត្តាមួយផងដែរ ដែលធ្វើឲ្យយើងត្រូវ [បន្ថែម] ម៉ោងធ្វើការងារច្រើនម៉ោង»។
បុគ្គលិក គ.ជ.ប.សរុបចំនួន ៣២៣ នាក់ និងបុគ្គលិកជាប់កិច្ចសន្យាចំនួន ៧០០០ នាក់នឹងធ្វើការពីថ្ងៃចន្ទដល់ថ្ងៃអាទិត្យពីម៉ោង ៧ ព្រឹករហូតដល់ម៉ោង ៥:៣០ ល្ងាចចន្លោះពីឥឡូវនេះរហូតដល់ថ្ងៃទី ៣១ ខែធ្នូ។
លោក Jon Lide'n នាយកផ្នែកប្រាស្រ័យទាក់ទងនៅទីស្នាក់ការរបស់ UNOPS នៅប្រទេសដាណឺម៉ាកបានបដិសេធថាការដឹកជញ្ជូនបរិក្ខារនេះមិនយឺតយ៉ាវទេ។
លោកបានថ្លែងតាមអ៊ីមែលថា៖ « UNOPS ជឿថាយើងបានអនុវត្តដំណើរការស្របទៅតាមគម្រោងពេលវេលាដែលបានចែង និងមានប្រសិទ្ធភាពតាមដែលអាចធ្វើទៅបានដោយសារភាពមានកំហិតនៃដំណើរការ និងជម្រើសផលិតផលដែលធ្វើឡើងដោយ គ.ជ.ប.»។
លោក ពុទ្ធា បានបន្ថែមថា គ.ជ.ប. មិនទាន់ឈានដល់សេចក្តីសម្រេចលើសំណើរបស់គណបក្សប្រឆាំងដែលស្នើសុំឲ្យបុគ្គលិក គ.ជ.ប ធ្វើការងារក្នុងអំឡុងបុណ្យភ្ជុំបិណ្ឌដើម្បីចុះឈ្មោះពលករចំណាកស្រុកដែលមកលេងស្រុកកំណើតនៅឡើយទេ៕ PS