ទូច សុខា ភ្នំពេញ ប៉ុស្តិ៍ Thu, 11 August 2016
ភ្នំពេញៈ ពលរដ្ឋមានជម្លោះដីធ្លីមកពីខេត្តកោះកុងដែលកំពុងស្នាក់នៅក្នុងវត្តសាមគ្គីរង្សីក្នុងសង្កាត់ស្ទឹងមានជ័យអស់រយៈពេលមួយសប្តាហ៍មកហើយនោះបានប៉ះទង្គិចជាមួយសន្តិសុខ និងកម្លាំងនគរបាលខណ្ឌមានជ័យ ខណៈដែលអ្នកភូមិទាំងនោះចង់ចេញពីវត្តទៅស្វែងរកអន្តរាគមន៍ជាថ្មីនៅការិយាល័យតំណាងសហភាពអឺរ៉ុបនៅកម្ពុជា។
ប្រជាពលរដ្ឋមានជម្លោះដីធ្លីមកពីស្រុកបទុមសាគរ និងស្រុកស្រែអំបិលខេត្តកោះកុងប្រមាណ ៧០ នាក់កាលពីព្រឹកម្សិលមិញបានព្យាយាមចេញពីវត្តសាមគ្គីរង្សីក្នុងបំណងទៅស្វែងរកអន្តរាគមន៍ជាថ្មីពីសហភាពអឺរ៉ុប និងក្រសួងរៀបចំដែនដី។ ប៉ុន្តែត្រូវបានកម្លាំងនគរបាល និងសន្តិសុខខណ្ឌដែលមានប្រហាក់ប្រហែលនឹងចំនួនពលរដ្ឋដែរនោះបានរារាំង និងបង្កឲ្យមានការប៉ះទង្គិចគ្នាតែមិនមានរបួសធ្ងន់ធ្ងរនោះទេ។
តំណាងប្រជាពលរដ្ឋម្នាក់ដែលអះអាងថាត្រូវសមត្ថកិច្ចធាក់ត្រូវជើង និងច្រានឲ្យដួលទៅលើដីអ្នកស្រី ផាវ ញ៉ើង ប្រាប់អ្នកសារព័ត៌មានថាពួកអ្នកស្រីមានបំណងចេញពីវត្តនៅម៉ោងប្រហែល ៧ ព្រឹកដើម្បីទៅសួរនាំពីដំណោះស្រាយដីធ្លីរបស់ពួកអ្នកស្រីពីសហភាពអឺរ៉ុប និងក្រសួងដែនដីក្រោយពីបានដាក់ញត្តិកាលពីថ្ងៃទី ៤ ខែសីហា។ ប៉ុន្តែក្រុមសន្តិសុខ និងកម្លាំងនគរបាលខណ្ឌហាមមិនឲ្យពួកអ្នកស្រីចេញពីវត្តទើបធ្វើឲ្យមានការរុញច្រានគ្នា។
អ្នកស្រីបន្ថែមថា៖ «ពេលហ្នឹងមុនដំបូងយើងអង្វរគេសុំចេញតែគេ (សមត្ថកិច្ច) អត់ព្រមគេព្យាយាមរុញបុកមកយើងមុនអ៊ីចឹងយើងក៏លូនក្រោមជើងពួកគាត់អាជ្ញាធរពុករលួយមួយចំនួននោះគាត់បានមកធាក់ជើងខ្ញុំឡើងដួលកាប់ផ្ងារ និងវាយក្បាលខ្ញុំឡើងក្រាបលើដី...»។
ពលរដ្ឋម្នាក់ទៀតដែលអះអាងថាត្រូវសមត្ថកិច្ចធាក់មួយជើងដែរនោះគឺអ្នកស្រី យី គន្ធា ឲ្យដឹងថាមុនពេលប៉ះទង្គិចគ្នាភាគីទាំងសងខាងបានរុញច្រានគ្នាទៅវិញទៅមកហើយសមត្ថកិច្ចព្យាយាមទាញទ្វាររបងវត្តបិទមិនឲ្យប្រជាពលរដ្ឋចេញពីវត្តទើបប្រជាពលរដ្ឋព្យាយាមលូន និងសម្រុកចេញពីវត្តតែម្តង។
អ្នកស្រីបន្តថា៖ «ខ្ញុំឈឺក្បាលជង្គង់ព្រោះច្រានគ្នាទៅមុខទៅក្រោយអាជ្ញាធរគួរតែដោះស្រាយជម្លោះជូនប្រជាពលរដ្ឋទើបល្អមិនគួរប្រើកម្លាំងដាក់ប្រជាពលរដ្ឋទេ»។
អភិបាលរងខណ្ឌមានជ័យលោក ឌីរ័ត្ន ខេមរុន បានបដិសេធដោយថាសមត្ថកិច្ចមិនបានបង្កហិង្សាណាមួយលើពលរដ្ឋនោះទេតែលោកថាគ្រាន់តែឃាត់អ្នកទាំងនោះមិនឲ្យដើរហែក្បួននៅខាងក្រៅប៉ុណ្ណោះ។
លោកថា ការមិនឲ្យដើរហែក្បួននៅខាងក្រៅនេះព្រោះលោកខ្លាចខូចសណ្តាប់ធ្នាប់សាធារណៈ។ ប៉ុន្តែលោកបានថាអាជ្ញាធរសន្យាទាក់ទងមន្ត្រីក្រសួងរៀបចំដែនដីមកដោះស្រាយផ្ទាល់នៅនឹងវត្តតែម្តង។
លោកបន្តថា៖ «តាមពិតការប៉ះទង្គិចគ្នាអត់មានទេ...ខ្មែរតែមួយគេមិនដែលវាយខ្មែរគ្នាឯងទេ...យើងបានជួយពន្យល់គាត់កុំឲ្យដើរហែខូចសណ្តាប់ធ្នាប់សាធារណៈ»។
ក្រុមហ៊ុនកោះកុងស៊ូហ្គ័រ និងក្រុមហ៊ុនកោះកុងផ្លែនថេសិន អ៊ីនដាស្រ្តី ខមភេនី លីមីតធីត ដែលរងការចោទប្រកាន់ពីប្រជាពលរដ្ឋថាបានរំលោភយកដីធ្លីពួកគាត់នោះមិនអាចទាក់ទងសុំការឆ្លើយតបបានទេកាលពីម្សិលមិញ។
ចំណែកលោក ហេង ហ៊ុយ ដែលមានងារជាឧកញ៉ា និងជាប្រធានក្រុមហ៊ុន ហេង ហ៊ុយ ដែលក៏រងការចោទប្រកាន់ដែរនោះបានបដិសេធថាដីនៅតាមបណ្តោយផ្លូវទៅខេត្តកោះកុងក្នុងស្រុកស្រែអំបិល និងបទុមសាគរដែលប្រជាពលរដ្ឋកំពុងទាមទារនោះលោកបានកាន់កាប់តាំងពីឆ្នាំ ១៩៩៣ និងថាប្រជាពលរដ្ឋទើបមកចាប់ដីនោះនៅអំឡុងឆ្នាំ ២០០៧ ឬ ២០០៨ ប៉ុណ្ណោះ។
លោកបន្តថា ក្រុមហ៊ុនលោកបានសម្រេចកាត់ដីខ្លះឲ្យទៅប្រជាពលរដ្ឋទាំងនោះសម្រាប់រស់នៅក្នុងអំឡុងឆ្នាំ ២០១០។
លោកបន្ថែមថា៖ «វាជាកម្មសិទ្ធិរបស់ខ្ញុំប៉ុន្តែប្រជាពលរដ្ឋទៅដណ្តើម (រស់) នៅហើយយើងក៏ខ្ជិល (ដណ្តើមវិញ) ហើយក៏ចរចាគ្នារស់នៅទៅឯកភាពគ្នាថាចែកគ្នានៅ (ប្រជាពលរដ្ឋ) យកខ្លះសល់ប៉ុន្មាន (ក្រុមហ៊ុន) យកដាំអំពៅទៅមិនមានអ្វីពាក់ព័ន្ធជាមួយប្រជាពលរដ្ឋទេ»។
បន្ទាប់ពីមានការប៉ះទង្គិចគ្នាអនុរដ្ឋលេខាធិការក្រសួងរៀបចំដែនដីលោក ទេព ធន បានទៅជួបប្រជាពលរដ្ឋ និងបានសន្យាថាលោកនឹងដឹកនាំក្រុមការងារទៅពិនិត្យ និងដោះស្រាយទំនាស់នោះដោយផ្ទាល់នៅថ្ងៃទី ១៨ ខែសីហា ឆ្នាំ ២០១៦។
ក្រោយទទួលបានការសន្យានេះប្រជាពលរដ្ឋទាំងនោះបានឲ្យដឹងថាពួកគេនឹងវិលត្រឡប់ទៅផ្ទះនៅឯខេត្តកោះកុងវិញនៅថ្ងៃនេះ៕