ភ្នំពេញ ប៉ុស្តិ៍ គឹម សារុំ Thu, 11 August 2016
ភ្នំពេញៈ ខណៈកងអនុរក្សពន្ធនាគារប្រមាណ ១០ នាក់ព័ទ្ធជុំជិតដែលខុសពីជនជាប់ចោទដទៃទៀតបន្ទាប់ពីចុះពីរថយន្តនៅក្នុងបរិវេណតុលាការកំពូលកាលពីព្រឹកម្សិលមិញលោក អ៊ុំ សំអាន តំណាងរាស្រ្តគណបក្សសង្គ្រោះជាតិដែលត្រូវចាប់ឃុំក្នុងពន្ធនាគារបានស្រែកថាលោកនាយករដ្ឋមន្រ្តី ហ៊ុន សែន បានធ្វើរដ្ឋប្រហាររដ្ឋធម្មនុញ្ញ និងចាប់តំណាងរាស្រ្តដែលមានអភ័យឯកសិទ្ធិដាក់គុកហើយអ្នកការពារព្រំដែនបែរជាជាប់គុកចំណែក «អ្នកកាត់ដីឲ្យយួនបែរជារួចខ្លួន»។
លោក អ៊ុំ សំអាន ត្រូវបានតុលាការកំពូលកោះហៅមកស៊ើបសួរកាលពីម្សិលមិញក្នុងបណ្តឹងសារទុក្ខសុំនៅក្រៅឃុំរបស់លោកបន្ទាប់ពីបណ្តឹងសុំនៅក្រៅឃុំលើកទី ១ របស់លោកត្រូវសភាព្រហ្មទណ្ឌសាលាឧទ្ធរណ៍ច្រានចោលកាលពីថ្ងៃទី ១៨ ខែសីហា ឆ្នាំ ២០១៦ ពាក់ព័ន្ធរឿងព្រំដែនដែលបង្ហោះតាមហ្វេសប៊ុក។
តំណាងរាស្ត្រមណ្ឌលសៀមរាបរូបនេះត្រូវបានមន្ត្រីសមត្ថកិច្ចនៃនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែនក្រសួងមហាផ្ទៃចាប់ខ្លួនទាំងនៅមានអភ័យឯកសិទិ្ធនៅខេត្តសៀមរាបនៅម៉ោងជាង ១២ យប់ឈានចូលថ្ងៃទី ១១ ខែមេសា ឆ្នាំ ២០១៦ ហើយបានបញ្ជូនមកក្រសួងមហាផ្ទៃទាំងយប់។
លោកត្រូវបានសាលាដំបូងរាជធានីភ្នំពេញឃុំខ្លួនកាលពីថ្ងៃទី ១២ ខែមេសាឆ្នាំ ២០១៦ ដោយចោទ ២ ករណីពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍ (បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម) និងបទញុះញង់ឲ្យមានការរើសអើងប្រព្រឹត្តនៅរាជធានីភ្នំពេញ និងកាលពីអំឡុងឆ្នាំ ២០១៥ រហូតដល់ថ្ងៃទី ១០ ខែមេសា ឆ្នាំ ២០១៦។
ក្នុងបន្ទប់សវនាការពីម្សិលមិញខណៈត្រូវបានលោកស្រី គឹម សត្ថាវី ប្រធានក្រុមប្រឹក្សាជំនុំជម្រះហៅឈរនៅក្នុងរង្វង់ក្រចកសេះលោក អ៊ុំ សំអាន ឆ្លើយបដិសេធតបវិញថា៖ «ខ្ញុំជាអ្នកតំណាងរាស្រ្តមានអភ័យឯកសិទ្ធិខ្ញុំមិននិយាយជាមួយតុលាការទេ»។
ទោះយ៉ាងណាលោកស្រី គឹម សត្ថាវី ឆ្លើយតបថា៖ «ខ្ញុំសួរបញ្ជាក់ពីអត្តសញ្ញាណរបស់លោកខ្ញុំមិនទាន់ឲ្យលោកឆ្លើយទេប៉ុន្តែបើលោកមិនចង់ឆ្លើយជាសិទ្ធិរបស់លោកហើយលោកអាចចេញទៅក្រៅបន្ទប់បាន»។
ក្នុងសវនាការដែលមានលោក សំ សុគង់ លោក ហែម សុជាតិ និងលោក ជួង ជូងី ជាមេធាវីការពារសិទ្ធិឲ្យលោក អ៊ុំ សំអាន នោះលោក ជូង ជូងី បានសន្និដ្ឋានថាចៅក្រមស៊ើបសួរសាលាដំបូងរាជធានីភ្នំពេញបានចោទប្រកាន់កូនក្តីលោកហើយឃុំខ្លួនគាត់បណ្តោះអាសន្នដោយសំអាងថាគាត់បានប្រព្រឹត្តបទល្មើសជាក់ស្តែង។ បើអនុញ្ញតឲ្យនៅក្រៅឃុំខ្លាចជនត្រូវចោទគេចខ្លួន ខ្លាចទៅបំផ្លាញភ័ស្តុតាង។ ប៉ុន្តែឯកសារដែលគាត់បង្ហោះតាមហ្វេសប៊ុកគឺគេអាចបើកមើលឃើញវានៅរហូត។
លោកបញ្ជាក់ថា ទោះយ៉ាងណា គាត់មានលំនៅឋានច្បាស់លាស់គាត់ដាក់ប្រាក់តម្កល់ហើយគាត់មានសញ្ជាតិខ្មែរ-អាមេរិកកាំងទៀតបើខ្លាចគាត់គេចខ្លួនដកលិខិតឆ្លងដែនគាត់ទៅបានហើយចុះមានហេតុផលអ្វីដែលថាគាត់គេចខ្លួនកើតនោះព្រោះគាត់ជាតំណាងរាស្រ្តគាត់មានការងារសំខាន់ត្រូវធ្វើនៅស្រុកខ្មែរ។
លោកថ្លែងថា៖ «ខ្ញុំសូមជម្រាបតុលាការថាក្នុងការចោទបទល្មើសជាក់ស្តែងនេះវាខុសដោយសារតែអំពើរបស់គាត់មិនមែនជាបទល្មើសជាក់ស្តែងហើយចាប់គាត់នៅទីសាធារណៈ។
លោកតំណាងអយ្យការថា បទល្មើសឧក្រិដ្ឋមិនអនុញ្ញតឲ្យជនជាប់ចោទនៅក្រៅឃុំទេតែបទចោទលោក អ៊ុំ សំអាន ជាបទល្មើសមជ្ឈិមហេតុអ្វីមិនឲ្យគាត់នៅក្រៅឃុំបាន»។
លោក សំ សុគង់ សន្និដ្ឋានថាទាក់ទងដីកាចាប់ខ្លួនលោក អ៊ុំ សំអាន បានរំលោភរដ្ឋធម្មនុញ្ញរបស់កម្ពុជាព្រោះលោក សំអាន ជាតំណាងរាស្រ្តមានអភ័យឯកសិទ្ធិហើយរដ្ឋសភាមិនបានប្រជុំដើម្បីដកអភ័យឯកសិទ្ធិគាត់ទេ។
លោកបន្តថា៖ «តុលាការចោទកូនក្តីខ្ញុំថាបទល្មើសជាក់ស្តែងគាត់បង្ហោះឯកសារពីព័ត៌មាននៅតាមព្រំដែនពេលគាត់ចុះទៅទីនោះឆ្នាំ ២០១៥ តែចាប់គាត់នៅឆ្នាំ ២០១៦ ហើយចោទថាជាបទល្មើសជាក់ស្តែងវាមិនឆ្លុះបញ្ចាំងក្នុងមាត្រា ៨៦ នៃក្រមនីតិវិធីព្រហ្មទណ្ឌសោះ។ ខ្ញុំសូមតុលាការដោះលែងកូនក្តីខ្ញុំបាននៅក្រៅឃុំ»។
លោកព្រះរាជអាជ្ញា ឈួន ចាន់ថា តំណាងមហាអយ្យការសន្និដ្ឋានថា៖ «រឿងនេះលោកមេធាវីថាគាត់ជាតំណាងរាស្រ្តមានសំឡេងគាំទ្រច្រើនដូច្នេះការបង្ហោះឯកសាររបស់គាត់ក៏ធ្វើឲ្យប៉ះពាល់ច្រើនដែរ។ ការមិនឲ្យជនត្រូវចោទនៅក្រៅឃុំជាការត្រឹមត្រូវ»។
លោក ហែម សុជាតិ ជាមេធាវីការពារសិទ្ធិលោក អ៊ុំ សំអាន មួយរូបដែរនោះបានថ្លែងប្រាប់អ្នកកាសែតនៅក្រៅបន្ទប់សវនាការថាក្រុមមេធាវីបានលើកសំអាងពីផ្លូវច្បាប់ដូចៗគ្នាទាំងអស់ដោយលើកហេតុផលតាមក្រមព្រហ្មទណ្ឌចំពោះជនណាប្រព្រឹត្តទិន្នន័យតាមប្រព័ន្ធកុំព្យូទ័រវាគឺជាបទល្មើសហើយច្បាប់ព្រហ្មទណ្ឌមិនបានចែងថា ការប្រើប្រាស់បណ្តាញហ្វេសប៊ុកជាបទល្មើសទេ។ មួយទៀតពាក់ព័ន្ធបញ្ហាបទចោទថាជាបទល្មើសជាក់ស្តែងមាត្រា ៨៦ បានន័យថាប្រព្រឹត្តភា្លមចាប់ភ្លាមតែបទល្មើសរបស់លោក អ៊ុំ សំអាន កើតក្នុងឆ្នាំ ២០១៥ តែមកចាប់ខ្លួននៅឆ្នាំ ២០១៦។ អ៊ីចឹងគ្មានភាពជាក់ស្តែងទេបើមិនជាក់ស្តែងមេធាវីតម្រូវឲ្យអនុវត្តតាមនីតិវិធីដោយក្រសួងមហាផ្ទៃធ្វើរបាយការមកក្រសួងយុត្តិធម៌ហើយក្រសួងយុត្តិធម៌ធ្វើសំណើទៅរដ្ឋសភាដើម្បីសុំដកអភ័យឯកសិទ្ធិ។ តែរដ្ឋសភាមកដល់ពេលនេះមិនទាន់បានដកអភ័យឯកសិទ្ធិកូនក្តីលោកទេព្រោះការដកអភ័យឯកសិទ្ធិតំណាងរាស្រ្តណាម្នាក់ត្រូវធ្វើឡើងមានសំឡេង ២ ភាគ ៣ ។
លោកថា៖ «យើងបានពន្យល់ដល់តុលាការហើយថាគាត់ទទួលបានការបោះឆ្នោតពីរាស្រ្តដូច្នោះគាត់មានសិទ្ធិបញ្ចេញមតិតាមមាត្រា ៨០ នៃរដ្ឋធម្មនុញ្ញព្រោះតំណាងរាស្រ្តមានតែការនិយាយនេះទេ»។
ក្រោយជំនុំជម្រះប្រមាណមួយម៉ោងលោកស្រីចៅក្រម គឹម សត្ថាវី ថ្លែងថាសាលដីកានេះនឹងត្រូវប្រកាសនៅថ្ងៃទី ១៧ ខែសីហា ខាងមុខ៕