ដោយ ហ៊ុំ ចំរើន RFA 2016-08-11
ប្រជាពលរដ្ឋដែលរងផលប៉ះពាល់ពីក្រុមហ៊ុន ផានអ៊ីម៉ិច (Phan Imex) ប្រមាណ ៤០នាក់ តំណាងឲ្យ ១៤០គ្រួសារនៅបុរីកីឡា រាជធានីភ្នំពេញ នៅរសៀលថ្ងៃទី១១ សីហា តវ៉ានៅមុខសាលារាជធានីភ្នំពេញ ទាមទារឲ្យអាជ្ញាធរក្រុងជួយដោះស្រាយសំណងប៉ះពាល់ជូនពួកគាត់ឲ្យបានឆាប់។ អ្នកភូមិបញ្ជាក់ថា ក្រុមហ៊ុននេះបានបង្ខំពួកគាត់ឲ្យចាកចេញពីដីអស់ជាច្រើនឆ្នាំហើយ ដោយពុំបានផ្ដល់សំណងឲ្យគ្រប់ចំនួននៅឡើយ។
បន្ទាប់ពីក្រុមអ្នកតវ៉ាឈរទាមទារនៅមុខសាលារាជធានីភ្នំពេញ ប្រមាណ ២០នាទី មន្ត្រីសាលារាជធានីភ្នំពេញម្នាក់បានចេញមកជួបប្រជាពលរដ្ឋ ហើយប្រាប់ឲ្យពួកគាត់ជ្រើសតំណាង ៥នាក់ទៅពិភាក្សានៅខាងក្នុងសាលាក្រុង។
តំណាងអ្នកតវ៉ាម្នាក់ អ្នកស្រី ស៊ាន ចិន្ដា ប្រាប់អាស៊ីសេរី នៅមុខសាលាក្រុងភ្នំពេញថា មូលហេតុដែលពួកគាត់តវ៉ា ដោយសារខាងភាគីក្រុមហ៊ុនពុំបានផ្ដល់សំណងជូនដល់ពួកគាត់ឲ្យបានគ្រប់ចំនួននៅឡើយ។ អ្នកស្រីអះអាងថា កន្លងមក ក្រុមហ៊ុន ផានអ៊ីម៉ិច ដែលបានបង្ខំពួកគាត់ឲ្យទៅរស់នៅទីតាំងថ្មីនៅភ្នំបាត ឃុំផ្សារដែក ស្រុកពញាឮ ខេត្តកណ្ដាល ដែលមានចម្ងាយជាង ៤០គីឡូម៉ែត្រពីរាជធានីភ្នំពេញនោះ ដោយអ្នកខ្លះទទួលបានដីទទឹង ៥ម៉ែត្រ និងខ្លះទៀតទទឹង ៣ម៉ែត្រ និងបណ្ដោយ ១២ម៉ែត្រ ប្រមាណ ១១០គ្រួសារក្នុងចំណោម ១៤០គ្រួសារ ដែលរងផលប៉ះពាល់។
អ្នកស្រីទាមទារឲ្យសាលារាជធានីភ្នំពេញដោះស្រាយសំណងបន្ថែមទៀត ១ម៉ឺនដុល្លារអាមេរិកក្នុងមួយគ្រួសារ ដើម្បីសង់លំនៅឋាន៖ «ព្រោះអីកន្លែងដែលខ្ញុំរស់នៅចាស់កៀកទីក្រុង ដែលខុសពីកន្លែងថ្មីដែលអាជ្ញាធរបញ្ជូនទៅរស់នៅឆ្ងាយពីទីក្រុង។ ម្យ៉ាងទៀត ពួកខ្ញុំគ្មានដីស្រែដាំដុះដូចពលរដ្ឋដទៃឡើយ។ អ៊ីចឹងពួកខ្ញុំបានតែដីទទេ ដោយពុំមានអ្វីបន្ថែមបែបនេះ មិនអាចរស់នៅបានឡើយ»។
អាស៊ីសេរី ពុំអាចទាក់ទងអ្នកនាំពាក្យសាលារាជធានីភ្នំពេញ លោក ជិន ប៊ុនធឿន ដើម្បីឆ្លើយតបនឹងការស្នើសុំនេះបានទេនៅថ្ងៃទី១១ សីហា។
ទោះជាយ៉ាងនេះក្ដី នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ មានប្រសាសន៍ថា ក្នុងកាលៈទេសៈបែបនេះ អាជ្ញាធរពាក់ព័ន្ធត្រូវពន្លឿនដោះស្រាយសំណងជូនពួកគាត់ឲ្យបានឆាប់រហ័ស ពីព្រោះពួកគាត់ជាប្រជាពលរដ្ឋក្រីក្រ ហើយរស់នៅឆ្ងាយពីទីប្រជុំជន៖ «អ៊ីចឹងដើម្បីដោះស្រាយបាន គឺបន្ទាប់ពីអាជ្ញាធរធ្វើរបាយការណ៍សិក្សាអំពីផលប៉ះពាល់ ឬសេចក្ដីត្រូវការជាចម្បងរបស់ពួកគាត់ គឺត្រូវតែលៃលកលទ្ធភាពរបស់រដ្ឋាភិបាលនោះ ដើម្បីឆ្លើយតបនឹងថវិកាបំពេញបំណងរបស់ពួកគាត់ដែលចង់បាន ដើម្បីការរស់រានជីវិតបន្តទៀត។ បើមិនដូច្នោះទេ គឺសេចក្ដីទុកចិត្តរបស់ម្ចាស់ឆ្នោត នឹងមានការប្រែប្រួល»។
ក្រុមអ្នកតវ៉ាបញ្ជាក់ថា ក្រុមហ៊ុន ផានអ៊ីម៉ិច បង្ខំឲ្យពួកគាត់ចេញពីដីនៅបុរីកីឡា ក្រុងភ្នំពេញ បញ្ជូនឲ្យទៅរស់នៅភ្នំបាត នៅឆ្នាំ២០១២។ ប្រជាពលរដ្ឋបានតវ៉ាទាមទារឲ្យអាជ្ញាធរដោះស្រាយសំណងជូនពួកគាត់ជាបន្តបន្ទាប់ ប៉ុន្តែពុំទាន់ទទួលបានលទ្ធផលនៅឡើយ។
តំណាងក្រុមអ្នកតវ៉ាឲ្យដឹងថា នៅរសៀលថ្ងៃទី១១ សីហា ដដែល មន្ត្រីសាលារាជធានីភ្នំពេញបានសន្យាជាមួយពួកគាត់ថា នឹងចុះទៅពិនិត្យដល់ទីកន្លែងរស់នៅរបស់ពួកគាត់នៅចុងខែសីហា នេះ។ អ្នកភូមិហាក់គ្មានជំនឿ និងការសន្យាចុះដោះស្រាយនេះឡើយ។ ពួកគាត់បញ្ជាក់ថា ប្រសិនបើអាជ្ញាធរមិនបានដោះស្រាយសំណងជូនពួកគាត់ដែលអាចទទួលយកបានទេ នោះពួកគាត់តវ៉ានៅមុខសាលារាជធានីភ្នំពេញបន្តទៀតក្នុងពេលឆាប់ៗ៕