ដោយ ប្រាជ្ញ ចេវ RFA 2016-08-13
គណបក្សសង្គ្រោះជាតិ ប្រកាសឈប់ប្រាប់ពីការវិវឌ្ឍន៍ស្ថានការណ៍នយោបាយនៅមុខទីស្នាក់ការកណ្ដាលបក្សដូចមុនទៀតហើយ ចាប់ពីថ្ងៃទី១៤ ខែសីហា តទៅ។ ចំណែកមន្ត្រីគណបក្សប្រជាជនកម្ពុជា ចំអកថា នេះជាទម្លាប់របស់បក្សឆាំងដែលតែងប្ដូរទិសដៅការងាររបស់ខ្លួនគ្មានទិសដៅច្បាស់លាស់។
បន្ទាប់ពីការថ្លែងខ្វែងគំនិតគ្នាខ្លះរបស់មន្ត្រីជាន់ខ្ពស់គណបក្សសង្គ្រោះជាតិ នៅមុខទីស្នាក់ការកណ្ដាលគណបក្សរបស់ខ្លួននៅរយៈពេលចុងក្រោយរួចមក ចាប់ពីថ្ងៃទី១៤ ខែសីហា តទៅ គណបក្សសង្គ្រោះជាតិ មិនធ្វើសន្និសីទព័ត៌មានដូចមុនទៀតទេ។ ការឈប់ប្រាប់ពីការវិវឌ្ឍន៍ស្ថានការណ៍ទៅអ្នកគាំទ្ររបស់គណបក្សប្រឆាំងបែបនេះ ទទួលបានការស្វាគមន៍ពីអ្នកតាមដាននយោបាយ ខណៈគណបក្សកាន់អំណាចថ្លែងឌឺដង។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យដឹងថា តំណាងរាស្ត្រគណបក្សសង្គ្រោះជាតិ ស្ទើរតែទាំងអស់ យកពេលធ្វើសន្និសីទកាសែត ប្ដូរចុះទៅមូលដ្ឋានជំរុញឲ្យពលរដ្ឋចុះឈ្មោះបោះឆ្នោត។ លោក យឹម សុវណ្ណ បញ្ជាក់ថា គណបក្សសង្គ្រោះជាតិ នៅតែផ្ដល់ព័ត៌មាន ឬការវិវឌ្ឍន៍ស្ថានការណ៍នយោបាយដដែល ប្រសិនបើមានរឿងសំខាន់៖ «»។
អ្នកនាំពាក្យគណបក្សប្រឆាំងដដែលថា ការសម្រេចឈប់ធ្វើសន្និសីទកាសែតនៅមុខទីស្នាក់ការដូចរាល់ដងបែបនេះ មិនជាប់ពាក់ព័ន្ធនឹងការថ្លែងខុសគ្នារបស់មន្ត្រីជាន់ខ្ពស់គណបក្សសង្គ្រោះជាតិនោះទេ គ្រាន់តែការថ្លែងកន្លងមកមានការភណ្ឌច្រឡំខ្លះប៉ុណ្ណោះ។
ចាប់ពីលោក លោក កឹម សុខា សម្រេចឃុំខ្លួននៅបណ្ដោះអាសន្ននាទីស្នាក់ការកណ្ដាលគណបក្សសង្គ្រោះជាតិ កាលពីខែឧសភា គណបក្សនេះប្រកាសផ្ដល់ព័ត៌មានដល់អ្នកគាំទ្រ និងអ្នកសារព័ត៌មានមួយថ្ងៃពីរពេល គឺពេលព្រឹកម្ដង និងពេលរសៀលម្ដង។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន មុននឹងថ្លែងទាក់ទងរឿងនេះ លោកសុំទោសជាមុនដែលលោកលូកនិយាយពីកិច្ចការផ្ទៃក្នុងរបស់គណបក្សនេះ។ លោកថា ចាប់ពីឆ្នាំ២០១៣ ក្រោយការបោះឆ្នោត គណបក្សមិនបានធ្វើអ្វីដូចការអះអាងរបស់ខ្លួនទេ ដូចជា ការទាមទារបោះឆ្នោតឡើងវិញ ការប្រកាសមិនចូលសភា និងនៅរយៈពេលចុងក្រោយនេះ គឺការប្រកាសបង្កើតគណៈកម្មការសភាស្រមោល ឬរដ្ឋាភិបាលស្រមោល ប៉ុន្តែត្រូវបដិសេធមិនបង្កើតវិញ៖ «»។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថា ទោះបីឈប់ប្រាប់ពីការវិវឌ្ឍន៍ស្ថានការណ៍ក្ដី ប៉ុន្តែអ្នកគាំទ្រគណបក្សនៅតែនាំតាមដាន និងឃ្លាំមើលនៅទីស្នាក់ការកណ្ដាលរបស់គណបក្សដដែល។
អ្នកវិភាគនយោបាយ លោក សូ ចន្ថា សង្កេតឃើញថា ការផ្ដល់ព័ត៌មានប្រចាំថ្ងៃរបស់គណបក្សសង្គ្រោះជាតិ កន្លងមកមិនសូវមានអ្វីដែលថ្មីនោះទេ។ លោកថា ការយកពេលវេលានេះចុះមូលដ្ឋានជំរុញឲ្យពលរដ្ឋចុះឈ្មោះបោះឆ្នោតទើបជារឿងល្អ៖ «»។
កាលពីកាលពីថ្ងៃទី៨ ខែសីហា មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ថា បក្សប្រឆាំងគាំទ្រយុទ្ធនាការថ្ងៃច័ន្ទពណ៌ខ្មៅ ដែលក្រុមតំណាងរាស្ត្រស្លៀកពាក់ពណ៌ខ្មៅប្រមូលផ្តុំនៅទីស្នាក់ការកណ្ដាលគណបក្ស ដើម្បីទាមទារទម្លាក់ចោលការចោទប្រកាន់ និងដោះលែងសកម្មជនការពារសិទ្ធិមនុស្ស និងមន្ត្រីរៀបចំការបោះឆ្នោតដែលកំពុងជាប់ឃុំ។
មួយថ្ងៃបន្ទាប់ ប្រធានក្រុមតំណាងរាស្ត្រគណបក្សនេះ គឺលោក សុន ឆ័យ ប្រកាសថា បង្កើតគណៈកម្មការសភាស្រមោលដើម្បីត្រៀមខ្លួនដឹកនាំប្រទេសពេលឈ្នះឆ្នោត។ ប៉ុន្តែក្រោយមានការព្រមានពីរដ្ឋសភា និងពីសាលាក្រុងភ្នំពេញ មន្ត្រីជាន់ខ្ពស់នៃគណបក្សនេះ បានចេញមុខថ្លែងផ្សេងគ្នា៕