ដោយ សាន សែល RFA 2016-08-14
នៅថ្ងៃច័ន្ទ ទី១៥ សីហា ប្រជាពលរដ្ឋមានជម្លោះដីធ្លីគ្រោងរៀបចំយុទ្ធនាការ «ថ្ងៃច័ន្ទពណ៌ខ្មៅ» ដោយបន្តទាមទារឲ្យដោះលែងសកម្មជនសិទ្ធិមនុស្ស អ្នកទោសមនសិការ ទាមទារឲ្យស្វែងរកយុត្តិធម៌ជូនបណ្ឌិត កែម ឡី និងទាមទារអាជ្ញាធរដោះស្រាយជម្លោះដីធ្លីឲ្យចប់សព្វគ្រប់។
តំណាងសហគមន៍ជម្លោះដីធ្លីរ៉ាំរ៉ៃនៅតំបន់បឹងកក់ អ្នកស្រី ទេព វន្នី អះអាងប្រាប់អាស៊ីសេរី នៅថ្ងៃទី១៤ សីហា ថា បើទោះជាអាជ្ញាធរតែងរារាំង និងចាប់ចងពលរដ្ឋដែលចូលរួមយុទ្ធនាការ «ថ្ងៃច័ន្ទពណ៌ខ្មៅ» ក៏ដោយ ក៏សមាជិកសហគមន៍អ្នកស្រីចន្លោះពី ៣០នាក់ទៅ ១០០នាក់ រួមនឹងប្រជាសហគមន៍ពីបុរីកីឡា និងផ្លូវរថភ្លើង នឹងបន្តធ្វើយុទ្ធនាការនេះគម្រប់សប្ដាហ៍ទី១៥។ អ្នកស្រីបញ្ជាក់ទៀតថា យុទ្ធនាការ «ថ្ងៃច័ន្ទពណ៌ខ្មៅ» ដែលនឹងធ្វើឡើងនៅក្នុងសហគមន៍បឹងកក់ បន្ថែមគោលបំណងថ្មីមួយទៀត គឺការទាមទារឲ្យអាជ្ញាធរអន្តរាគមន៍ដោះស្រាយទំនាស់ដីធ្លីរ៉ាំរ៉ៃនៅកម្ពុជា ឲ្យចប់សព្វគ្រប់៖ «»។
សកម្មជនដីធ្លីរូបនេះឲ្យដឹងថា ផែនការធ្វើយុទ្ធនាការនៅថ្ងៃច័ន្ទ នឹងមានពិធីបួងសួងតាមបែបសាសនា ដូចជាការដាក់បណ្ដាសាដោយបាចអំបិល បាចម្ទេស បាចលាជ ដើម្បីអន្ទងឲ្យអាជ្ញាធរធ្វើកិច្ចការរបស់ខ្លួនត្រឹមត្រូវ និងយុត្តិធម៌តាមច្បាប់។
«ថ្ងៃច័ន្ទពណ៌ខ្មៅ» របស់ក្រុមសកម្មជនជម្លោះដីធ្លី ក៏មានលើកទង់អង្គការសហប្រជាជាតិ ទង់សដោយមានសរសេរ «SOS Cambodia»។
គណបក្សសង្គ្រោះជាតិ បានប្រកាសនៅថ្ងៃទី៨ សីហា ថា នឹងចូលរួមធ្វើយុទ្ធនាការនេះនៅរៀងរាល់ថ្ងៃច័ន្ទដែរ។ ទោះជាយ៉ាងណា អ្នកនាំពាក្យគណបក្សសង្គ្រោះជាតិ លោក យឹម សុវណ្ណ គូសបញ្ជាក់នៅថ្ងៃទី១៤ សីហា ថា គណបក្សប្រឆាំងមិនមានគម្រោងណាមួយរៀបចំ «យុទ្ធនាការថ្ងៃច័ន្ទពណ៌ខ្មៅ» នៅថ្ងៃច័ន្ទ ទី១៥ សីហា នេះទេ។ ក៏ប៉ុន្តែលោកឲ្យដឹងថា សមាជិករបស់បក្សនឹងចូលរួមយុទ្ធនាការនេះជាលក្ខណៈបុគ្គល៖ «»។
យុទ្ធនាការ «ថ្ងៃច័ន្ទពណ៌ខ្មៅ» ផ្ដួចផ្ដើមឡើងដោយក្រុមអង្គការសង្គមស៊ីវិល និងសកម្មជនដីធ្លី ដោយយកថ្ងៃច័ន្ទជាថ្ងៃធ្វើយុទ្ធនាការ ដោយស្លៀកពាក់ពណ៌ខ្មៅ។ ថ្ងៃច័ន្ទតំណាងឲ្យថ្ងៃដែលសកម្មជនសិទ្ធិអង្គការអាដហុក (ADHOC) ៤រូប មានអ្នកស្រី លឹម មុន្នី លោក ណៃ វ៉ង់ដា លោក យី សុខសាន្ដ លោក នី សុខា និងអគ្គលេខាធិការរងរបស់គ.ជ.ប លោក នី ចរិយា ត្រូវបានគេចាប់បញ្ជូនទៅឃុំខ្លួននៅពន្ធនាគារ ពីបទសូកប៉ាន់សាក្សីទាក់ទងនឹងរឿងអាស្រូវស្នេហារវាងអ្នកនាង ខុម ចាន់តារាទី ហៅស្រីមុំ ជាមួយលោក កឹម សុខា ហើយពណ៌ខ្មៅតំណាងឲ្យសញ្ញាប្រកាសអាសន្ននៃការរំលោភសិទ្ធិមនុស្សក្នុងប្រទេសកម្ពុជា។
ជារឿយៗ អាជ្ញាធរចាប់ខ្លួនអ្នកចូលរួមយុទ្ធនាការ ដោយព្រមានមិនឲ្យចូលរួមសកម្មភាពនេះទៀត។
នាយកប្រតិបត្តិមជ្ឈមណ្ឌលកម្ពុជា ប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង ដែលជាអ្នកផ្ដួចផ្ដើមរៀបចំយុទ្ធនាការនេះ ត្រូវបានតុលាការចេញដីកាកោះចូលបំភ្លឺឲ្យធ្វើជាសាក្សី កាលពីថ្ងៃទី៣ សីហា ក្នុងសំណុំរឿងស្នេហារបស់អនុប្រធានគណបក្សសង្គ្រោះជាតិ។ ដីកានេះបង្គាប់ឲ្យលោក ប៉ា ងួនទៀង ចូលខ្លួនបំភ្លឺនៅតុលាការនៅថ្ងៃទី១៨ សីហា ខាងមុខ៕