Shaun Turton ភ្នំពេញ ប៉ុស្តិ៍ Mon, 15 August 2016
ភ្នំពេញៈ ក្រុមអ្នកប្រឹក្សាយោបល់ម៉ាឡេស៊ីដែលនាពេលថ្មីៗនេះបានផ្តល់ជូន លោកនាយករដ្ឋមន្រ្តី ហ៊ុន សែន នូវពានរង្វន់ «សមិទ្ធផលអមតៈ» អាស៊ានថ្លែងថាស្ថាប័ននេះ «មិនមែនជាផ្នែក» នៃក្រុមហ៊ុន Sunway Group ដែលជាម្ចាស់សណ្ឋាគារសាន់វ៉េក្នុងរាជធានីភ្នំពេញនេះទេបើទោះបី ពួកគេមានភាពជាប្រធាន និងជាអ្នកគ្រប់គ្រងជាន់ខ្ពស់ក៏ដោយ។ នេះបើតាមនាយកប្រតិបត្តិនៃវិទ្យាស្ថាននេះ។
នៅវេទិកាភាព ជាអ្នកដឹកនាំអាស៊ានលើកទី ១៣ នៅទីក្រុងវៀងចន្ទន៍កាលពីថ្ងៃទី ៦ សីហាលោកនាយករដ្ឋមន្រ្តី ហ៊ុន សែន បានទទួលកិត្តិយសពីវិទ្យាស្ថានយុទ្ធសាស្រ្ត និងភាពជាអ្នកដឹកនាំអាស៊ី (ASLI) ដែលប្រធាន និងសហស្ថាបនិកនៃវិទ្យាស្ថាននេះគឺ Dr.Jerrrey Cheah ក៏ជាប្រធានក្រុមហ៊ុនអចលនទ្រព្យ និងសំណង់ម៉ាឡេស៊ីជាច្រើនផងដែរ ដែលលោកជាសហស្ថាបនិក។
ក្រុមហ៊ុនដែលជួលបុគ្គលិក ១៤០០០ នាក់នេះជាម្ចាស់សណ្ឋាគារសាន់វ៉េជិតវត្តភ្នំ និងដែលកាលពីពេលមុនគ្រោងអភិវឌ្ឍទីក្រុងរណបនៅខណ្ឌជ្រោយចង្វារ ប៉ុន្តែត្រូវបានគេរាយការណ៍ថាបានលក់ហ៊ុនរបស់ខ្លួនក្នុងឆ្នាំ ២០១១។
សមាជិក ៥ នាក់ក្នុងចំណោមក្រុមប្រឹក្សានាយកដែលមានគ្នា ៨ នាក់នៃ ASLI ក៏ជាអ្នកគ្រប់គ្រងជាន់ខ្ពស់នៃសណ្ឋាគារសាន់វ៉េផងដែរ។ នេះបើតាមគេហទំព័ររបស់ខ្លួន។
ប៉ុន្តែនៅពេលទាក់ទងតាម អ៊ីមែលកាលពីសប្តាហ៍មុនអគ្គនាយក ASLI Michael Yeoh បានថ្លែងថាស្ថាប័ននេះគឺជាក្រុមអ្នកប្រឹក្សាយោបល់ឯករាជ្យមិន ស្វែងរកប្រាក់ចំណេញ និងមិនមែនជាផ្នែកនៃសណ្ឋាគារសាន់វ៉េនោះទេបើទោះបីជាខ្លួនគឺជា ប្រធាន និងសហស្ថាបនិកក៏ដោយ។
Yoeh បានថ្លែងតាមអ៊ីមែលថា៖ «ក្រុមហ៊ុន Sunway Group គឺមិនពាក់ព័ន្ធទាល់តែសោះនៅក្នុងការធ្វើសេចក្តីសម្រេចលើ ការផ្តល់ «ពានរង្វន់សមិទ្ធផលអមតៈអាស៊ាន»។ «ពានរង្វាន់នេះក៏ត្រូវបានផ្តល់ឲ្យផងដែរទៅលោកស្រី អ៊ុង សានស៊ូជី នៃប្រទេសមីយ៉ាន់ម៉ាក្រៅពីសម្តេច ហ៊ុន សែន»។ «ខ្ញុំមិនជឿថាក្រុមហ៊ុនសាន់វ៉េគ្មានអត្ថប្រយោជន៍ណាមួយនៅក្នុង ប្រទេសកម្ពុជាក្រៅពីសណ្ឋាគារសាន់វ៉េដែលមានវត្តមាននៅរាជធានី ភ្នំពេញជាយូរមកហើយនោះទេ»។
ទោះយ៉ាងណាក្តីនៅពេលទាក់ទងតាម ទូរស័ព្ទបុគ្គលិកម្នាក់ទៀតនៃ ASLI ដែលសុំមិនបញ្ចេញឈ្មោះបានថ្លែងថា ASLI និងក្រុមហ៊ុនសាន់វ៉េគឺជា «ដៃគូ» នឹងគ្នាប៉ុន្តែពួកគេក៏បាននិយាយផងដែរថាក្រុមហ៊ុនមិនមានឥទ្ធិពល ទៅលើពានរង្វាន់នោះទេ។
តំណាងក្រុមហ៊ុនសាន់វ៉េបានបដិសេធឆ្លើយតបនឹងសំណើសុំធ្វើអត្ថាធិប្បាយ។
មុន ពេលទទួលពានរង្វាន់នេះលោកនាយករដ្ឋមន្រ្តី ហ៊ុន សែន បានថ្លែងថាការទទួលស្គាល់នេះឆ្លុះបញ្ចាំងពីការងាររបស់លោកនៅ ក្នុងការជំរុញទំនាក់ទំនងសុខដុមរមនារវាងប្រទេសចិន និងអាស៊ាន។
ប្រទេស កម្ពុជាត្រូវបានចោទប្រកាន់ជាដដែលៗថាគាំទ្រទីក្រុងប៉េកាំងលើ បញ្ហាជម្លោះសមុទ្រចិនខាងត្បូងដែលប៉ះពាល់ដល់សមាជិកដទៃទៀតនៃ ប្លុកអាស៊ាន។ ប៉ុន្តែទោះយ៉ាងណាក្តីតំណាងប្រទេសកម្ពុជាបានថ្លែងថាប្រទេសនេះគឺ មានលក្ខណៈអព្យាក្រឹត៕ PS