ដោយ សូត សុខប្រាថ្នា RFA 2016-08-15
ប្រជាពលរដ្ឋនៅឃុំកំពង់ចិនត្បូង ស្រុកស្ទោង ខេត្តកំពង់ធំ ព្រួយបារម្ភថា ស្រូវស្រែវស្សារបស់ពួកគាត់ជាច្រើនហិកតារ អាចនឹងត្រូវខូចខាតជាមិនខាន ដោយសារមិនមានទឹកសម្រាប់ដាក់ស្រែបន្ទាប់ពីក្រុមហ៊ុនឧកញ៉ា លីម ប៊ុណ្ណា បានសាងសង់ស្ថានីយប្រេងឥន្ធនៈ និងភោជនីយដ្ឋានបិទផ្លូវទឹករបស់ពួកគាត់។ អាជ្ញាធរស្រុកស្ទោង បញ្ជាក់ថា ពួកគាត់បានចុះពិនិត្យ និងដោះស្រាយរួចរាល់ហើយ។
ប្រជាពលរដ្ឋស្នើប្រមុខរដ្ឋាភិបាល និងមន្ត្រីពាក់ព័ន្ធជួយដោះស្រាយបញ្ហាប្រឈមរបស់ពួកគាត់ ដោយសារតែគ្មានទឹកដាក់ស្រែ។ អ្នកភូមិអះអាងថា ប្រសិនបើគ្មានទឹកស្រោចស្រពដំណាំស្រូវពួកគាត់ទៀត នោះស្រូវជាង ៤០ហិកតារនឹងរងការខូចខាតជាមិនខាន។
ប្រជាពលរដ្ឋធ្វើស្រែនៅភូមិត្រាច ឃុំកំពង់ចិនជើង មួយរូបសុំមិនបញ្ចេញឈ្មោះឲ្យដឹងថា ស្រូវរបស់គាត់ចាប់ផ្តើមខូចខាតជាបណ្ដើរៗ ដោយសារគ្មានទឹកស្រោចស្រព។ បញ្ហានេះកើតឡើងបន្ទាប់ពីមានស្ថានីយប្រេងឥន្ធនៈ និងភោជនីយដ្ឋានឈ្មោះ លីម ប៊ុណ្ណា បានកសាងឡើងដោយលុបផ្លូវទឹកហូរធ្លាក់ពីទំនប់ ៣០ កញ្ញា កាលពីឆ្នាំ២០១៥។ ពលរដ្ឋរូបនេះបន្តថា ពួកគេបានលុបផ្លូវទឹកពីដើមមក ហើយធ្វើប្រឡាយខាងក្រោយជំនួស ព្រមទាំងដាក់ទុយោសម្រាប់បង្ហូរទឹកចូលដីស្រែប្រជាពលរដ្ឋ ប៉ុន្តែមិនបានគ្រប់គ្រាន់ឡើយ ព្រោះម្តងបើកម្តងបិទ៖ «ឥឡូវនេះចាប់តាំងពីឆ្នាំ២០១៤ លោកឧកញ៉ា លីម ប៊ុណ្ណា បានមកអភិវឌ្ឍនៅតំបន់កែងគោល បានចាក់ដីលុបបំបាត់ផ្លូវទឹក មិនបានដាក់លូដើម្បីឲ្យពលរដ្ឋបានបង្ហូរទឹកប្រើប្រាស់»។
កាលពីថ្ងៃទី៥ សីហា ពលរដ្ឋ ២០គ្រួសារដែលមានដីស្រែរងផលប៉ះពាល់ជាង ៤០ហិកតារ (៤៥ហិកតារ) បានធ្វើលិខិតអមដោយស្នាមមេដៃដាក់ជូនអាជ្ញាធរស្រុក ឲ្យជួយអន្តរាគមន៍លើបញ្ហាទឹកដាក់ស្រែនេះ។ ក្នុងលិខិតបញ្ជាក់ថា កន្លងមក ពលរដ្ឋមានទឹកដាក់ស្រែ ព្រោះមានប្រភពចេញពីទំនប់ ៣០ កញ្ញា នៅតំបន់កែងគោល ហើយរាជរដ្ឋាភិបាលបានធ្វើទ្វារទឹកជូនពលរដ្ឋទៀតផង ប៉ុន្តែចាប់តាំងពីក្រុមហ៊ុនឧកញ៉ា លីម ប៊ុណ្ណា ទៅវិនិយោគតំបន់នេះ ធ្វើឲ្យពលរដ្ឋមិនមានទឹកគ្រប់គ្រាន់សម្រាប់ដាក់ស្រែឡើយ។
ប្រភពដដែលនិយាយថា ការបិទផ្លូវទឹក គឺជាការកេងយកទឹកសម្រាប់ប្រើប្រាស់លើដីស្រែឧកញ៉ា លីម ប៊ុណ្ណា តែម្នាក់ឯង ពីព្រោះឧកញ៉ាមានដីស្រែនៅទីនោះប្រមាណ ១ពាន់ហិកតារ។
ដោយឡែកតំណាងក្រុមហ៊ុនឧកញ៉ា លីម ប៊ុណ្ណា នៅស្រុកស្ទោង គឺលោក ទិត្យ សំណាង មានប្រសាសន៍ថា ផ្លូវទឹកដែលហូរកាត់នៅចំណុចកែងគោល ពុំមែនជាប្រឡាយទេ ប៉ុន្តែវាគ្រាន់តែជាផ្លូវទឹកដែលហូរតាមដីចំណីផ្លូវប៉ុណ្ណោះ។ លោកបន្តថា ខាងលោកបានធ្វើប្រឡាយទឹកពីក្រោយក្បាលដីរបស់ខ្លួន ដោយមិនបានបិទផ្លូវទឹកដូចការចោទប្រកាន់ឡើយ ប៉ុន្តែដោយសារទឹកឆ្នាំនេះតិច ម្យ៉ាងទឹកហូរធ្លាក់ពីខាងលើមានការរាំងស្ទះច្រើនកន្លែងផង។ បន្ថែមពីនេះ ភ្លឺស្រែរបស់ពលរដ្ឋដែលមានដីនៅខាងក្រោមដីលោកឧកញ៉ា គឺតូចៗមិនអាចរក្សាទុកទឹកបានយូរ៖ «ស្រុកគេហៅខ្ញុំទៅថ្ងៃមុន ខ្ញុំថាស្រុក-ឃុំឯងបានបើកភ្នែកនៅ? ដែលទទួលបណ្ដឹងពីគាត់ហ្នឹង បានបើកភ្នែកមើលនៅ? ប្រឡាយទឹកគេប៉ុនណាណី»។
លោកយល់ថា ដើម្បីបានទឹកគ្រប់គ្រាន់ គឺទាល់តែពលរដ្ឋនៅផ្នែកខាងលើបើកបង្ហូរទឹកពីទំនប់ ៣០ កញ្ញា ឲ្យបានច្រើន។ លោកឲ្យដឹងដែរថា ដីស្រែលោកឧកញ៉ានៅតំបន់នោះ គឺមានជាង ១ពាន់ហិកតារ។
អភិបាលរងស្រុកស្ទោង ដែលបានចុះសម្របសម្រួលបញ្ហានេះ លោក សៀង ម៉ាប់ មានប្រសាសន៍នៅថ្ងៃទី១៥ សីហា ថា អាជ្ញាធរបានអន្តរាគមន៍លើបញ្ហាទឹកដាក់ស្រែរបស់ពលរដ្ឋកាលពីថ្ងៃទី១១ សីហា ដោយសម្រួលឲ្យមានការបើកផ្លូវទឹកប្រើប្រាស់ជាបណ្ដោះអាសន្ន។ លោកបន្តថា អាជ្ញាធរមូលដ្ឋានត្រូវតាមដានដំណើរការនេះ ហើយប្រសិនបើពលរដ្ឋជួបបញ្ហាទៀតនោះ អាជ្ញាធរស្រុកនឹងចុះអន្តរាគមន៍បន្តទៀត៖ «ក្រោយពេលយើងសម្របសម្រួលគ្នាទៅ ឃើញថាគាត់យល់គ្នាច្រើន ហើយឥឡូវនេះបានប្រើប្រាស់ប្រឡាយខាងក្រោយហ្នឹងជាបណ្ដោះអាសន្ន គឺថាបានប្រើហើយបង»។
ទោះបីជាយ៉ាងនេះក្តី សមាជិកក្រុមប្រឹក្សាស្រុកស្ទោង គណបក្សសង្គ្រោះជាតិ លោក ឆាយ ចែង មើលឃើញថា ប្រសិនបើទីតាំងស្ថានីយប្រេងឥន្ធនៈ និងភោជនីយដ្ឋាន លោក លីម ប៊ុណ្ណា បានធ្វើប្រព័ន្ធលូត្រឹមត្រូវ គឺទឹកអាចហូរចុះទៅស្រែប្រជាពលរដ្ឋនៅផ្នែកខាងក្រោមបានយ៉ាងស្រួល។ លោកថា ការធ្វើប្រព័ន្ធប្រឡាយនៅខាងក្រោយស្ថានីយប្រេងឥន្ធនៈ គឺធ្វើឲ្យទឹកហូរចូលដីស្រែរបស់លោក លីម ប៊ុណ្ណា ច្រើនជាងហូរចូលស្រែប្រជាពលរដ្ឋ៕