ដោយ ហង្ស សាវយុត RFA 2016-05-07
យុវជនមួយក្រុមមានគ្នាប្រមាណ ២០នាក់ ដែលដឹកនាំដោយលោកស្រី ចំរើន ហើយអះអាងខ្លួនថាជានិស្សិត បានប្រឹងប្រែងយ៉ាងខ្លាំងក្នុងការតាមជួបលោក កឹម សុខា ប្រធានស្តីទីនៃគណបក្សសង្គ្រោះជាតិ ដែលមកបណ្ដុះបណ្ដាលសកម្មជននៃគណបក្សនយោបាយជិត ៥០០នាក់ នៅឯខេត្តសៀមរាប កាលពីព្រឹកថ្ងៃទី៧ ខែឧសភា។ ក៏ប៉ុន្តែក្រុមយុវជនដែលសកម្មតាមសួរលោក កឹម សុខា ពាក់ព័ន្ធនឹងរឿងអាស្រូវស្នេហាទាំងនោះ បានបរាជ័យ ដោយសារតែមហាជនជាច្រើន រួមទាំងកម្លាំងប៉ូលិសផង បានស្រាក់ដៃគ្នារារាំងជាច្រើនជាន់។
លោក ស្រី ចំរើន ដែលអះអាងខ្លួនថា ជានិស្សិត ហើយដឹកនាំក្រុមយុវជនប្រមាណ ២០នាក់ មកដល់ខេត្តសៀមរាប បានឱ្យដឹងថា ពួកគេមកនេះ គឺគ្រាន់តែដើម្បីចង់តស៊ូមតិផ្នែកផ្លូវច្បាប់ពាក់ព័ន្ធនឹងរឿងស្នេហារវាងលោក កឹម សុខា ជាមួយនាង ខុម ចាន់តារាទី ប៉ុណ្ណោះ មិនចង់បានអ្វីពីលោក កឹម សុខា ទេ។
លោក ស្រី ចំរើន បញ្ជាក់ថា ជាច្រើនលើកមកហើយ ក្រុមរបស់លោកខំស្កាត់ជួបជាមួយលោក កឹម សុខា ក៏ប៉ុន្តែត្រូវបរាជ័យទាំងអស់៖ «មានន័យលោកកំពុងប្រព្រឹត្តខុសច្បាប់រដ្ឋធម្មនុញ្ញនៃប្រទេសកម្ពុជា ពីព្រោះលោកហាមខ្ញុំមិនឱ្យចូលជួប»។
កាលពីព្រឹកថ្ងៃទី៧ ខែឧសភា ក្រុមយុវជនដែលដឹកនាំដោយលោក ស្រី ចំរើន បានត្រឹមតែជាប់គាំងនៅលើដងផ្លូវចម្ងាយប្រហែលជាង ១០០ម៉ែត្រ ពីទីស្នាក់ការរបស់គណបក្សសង្គ្រោះជាតិ នៅក្នុងភូមិត្រពាំងសេះ សង្កាត់គោកចក ក្រុងសៀមរាប ប៉ុណ្ណោះ មិនអាចចូលទៅជិតលោក កឹម សុខា បានទេ ដោយសារតែមហាជនជាច្រើនរួមគ្នារារាំង និងហ៊ុមព័ទ្ធមិនឱ្យទៅណាបាន។
ក្នុងពេលដែលមហាជនរារាំង ដោយភាពប្រទាញប្រទង់នោះ ក៏បានជេរនិងតិះដៀលទៅលើក្រុមយុវជនរបស់លោក ស្រី ចំរើន យ៉ាងជូរចត់ បណ្ដាលឱ្យក្រុមយុវជនទាំងនោះបង្ខំចិត្តចាកចេញទៅវិញ បន្ទាប់ពីព្យាយាមជម្រុលជាង ១ម៉ោង ដើម្បីជួបលោក កឹម សុខា ប៉ុន្តែមិនបានសម្រេចមក៕