ដោយ ស៊ុន ហេង RFA 2016-08-16
ស្ត្រីជនជាតិអេស្ប៉ាញ វ័យប្រហែល ៣០ឆ្នាំម្នាក់ ត្រូវបានអាជ្ញាធរឃាត់ខ្លួននៅព្រឹកថ្ងៃទី១៦ សីហា ក្នុងពេលអ្នកស្រីចូលរួមឃ្លាំមើលការទាមទាររបស់សកម្មជនដីធ្លីតំបន់បឹងកក់ ឲ្យដោះលែងអ្នកស្រី ទេព វន្នី និងអ្នកស្រី បូវ សោភា។
ស្ត្រីជនជាតិអេស្ប៉ាញ នោះឈ្មោះថា ម៉ាហ្គា ប៊ូហូសា សេហ្គាដូ (Marga Bujosa Segado) ត្រូវបានប្រជាជនស្គាល់ថាជាអ្នកស្រាវជ្រាវមួយរូប ដែលតែងតែតាមដានសកម្មភាពតវ៉ារបស់សហគមន៍បឹកកក់។
អ្នកនាង ម៉ាហ្គា ត្រូវបាននគរបាលនៃនាយកដ្ឋានអន្តោប្រវេសន៍នៃក្រសួងមហាផ្ទៃ ឃាត់ខ្លួនអំឡុងពេលដែលនាងកំពុងថតរូប និងសួរសំណួរទៅកាន់សកម្មជនដែលកំពុងតវ៉ាមុខអធិការដ្ឋាននគរបាលខណ្ឌដូនពេញ ឲ្យមានការដោះលែងតំណាងសហគមន៍បឹកកក់ គឺអ្នកស្រី ទេព វន្នី និងសកម្មជនដីធ្លី អ្នកស្រី បូវ សោភា។
លោក អ៊ុក ហៃសិលា ប្រធានផ្នែកស៊ើបអង្កេត និងអនុវត្តន៍នីតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ បញ្ជាក់ថា ការចាប់ស្ត្រីជនជាតិអេស្ប៉ាញ រូបនេះ គឺដើម្បីសាកសួរថា តើការរស់នៅរបស់នាងនៅកម្ពុជា ស្របតាមនីតិវិធីដែរឬទេ? ឬថាតើនាងមានឯកសារត្រឹមត្រូវដែរ ឬទេ? លោក សិលា បានបន្តទៀតថា បើការស៊ើបសួររកឃើញថា ការស្នាក់នៅរបស់នាង ម៉ាហ្គា មិនខុសច្បាប់ទេ នារីអេស្ប៉ាញ រូបនេះ នឹងត្រូវដោះលែងវិញ។
អាស៊ីសេរី មិនអាចទាក់ទងអ្នកនាង ម៉ាហ្គា ដើម្បីសាកសួរពីស្ថានភាពរបស់នាងបាននៅឡើយ៕