ដោយ អ៊ុំ រង្សី RFA 2016-08-18
ក្លឹបអ្នកកាសែតកម្ពុជា និងវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មានបានសហការគ្នាបង្កើតបណ្ដាញអ្នកសារព័ត៌មានស្នូលដែលមកពីបណ្ណាការខេត្ត និងរាជធានីភ្នំពេញ ជាង ២០ស្ថាប័ន ដើម្បីរាយការណ៍ព័ត៌មានដែលទាក់ទងនឹងបញ្ហាបរិស្ថាននៅកម្ពុជា។ អ្នកជំនាញផ្នែកសារព័ត៌មានរំពឹងថា បណ្ដាញអ្នកសារព័ត៌មានស្នូលនេះ នឹងជួយអប់រំ និងរាយការណ៍ពីបញ្ហាបរិស្ថាននៅកម្ពុជា កាន់តែស៊ីជម្រៅជាងមុន។
អ្នកជំនាញផ្នែកសារព័ត៌មានយល់ថា ការរាយការណ៍ព័ត៌មានបរិស្ថានកាន់តែស៊ីជម្រៅ នឹងជួយជំរុញឲ្យមានការបង្កើតគោលនយោបាយបរិស្ថានសមស្របសម្រាប់ស្ថានភាពរស់នៅរបស់ពលរដ្ឋកម្ពុជា កាន់តែប្រសើរឡើង។
ការលើកឡើងរបស់អ្នកជំនាញសារព័ត៌មាននៅពេលនេះ ធ្វើឡើងនៅក្នុងកិច្ចប្រជុំដើម្បីជ្រើសរើសសមាជិកស្នូលនៃបណ្ដាញអ្នកសារព័ត៌មានផ្នែកបរិស្ថាន ដែលរៀបចំឡើងនៅថ្ងៃទី១៧ ខែសីហា។
ទីប្រឹក្សាក្លឹបអ្នកកាសែតកម្ពុជា លោក គី សុខលីម និយាយថា ដោយមើលឃើញថា បញ្ហាបរិស្ថានដូចជា បញ្ហាគ្រោះរាំងស្ងួត ការកាប់បំផ្លាញព្រៃឈើបានក្លាយជាឧបសគ្គរាំងស្ទះដល់ដំណើរការផលិតកម្ម និងជីវភាពរស់នៅរបស់ពលរដ្ឋកម្ពុជា កាន់តែមានស្ថានភាពធ្ងន់ធ្ងរ ហេតុនេះទើបក្លឹបអ្នកកាសែតសហការជាមួយអ្នកជំនាញសារព័ត៌មាន ទាំងនៅរាជធានីភ្នំពេញ និងតាមបណ្ដាខេត្ត បង្កើតឲ្យមានបណ្ដាញសារព័ត៌មានស្នូលដើម្បីជំរុញឲ្យរដ្ឋាភិបាលមានវិធានការសមស្របណាមួយដោះស្រាយបញ្ហាបរិស្ថានដែលកំពុងកើតមាននេះ៖ «ចាប់ពីនេះទៅ យើងចង់ឲ្យអ្នកសារព័ត៌មានយើងហ្នឹងផ្សព្វផ្សាយពីបញ្ហាបរិស្ថានឲ្យបានច្រើន ដូចជា គ្រោះរាំងស្ងួត ការប្រែប្រួលអាកាសធាតុ តាំងពីការដាំដុះ ការកាប់ព្រៃឈើដើម្បីឲ្យដឹងថា បញ្ហាទាំងនេះគឺជាបញ្ហាសំខាន់សម្រាប់កម្ពុជា មិនមែនរឿងនយោបាយតែ ១មុខទេ ដូច្នេះនេះជាចំណែកមួយជួយជំរុញអ្នកតាក់តែងគោលនយោបាយជាតិ គាត់គិតពិចារណាឡើងវិញពីចំណុចនេះ»។
នាយកវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មាន គឺលោក មឿន ឈានណារិទ្ធ។ លោកមានប្រសាសន៍ដែរថា អ្នកសារព័ត៌មាននៅក្នុងប្រទេសកម្ពុជា មានតួនាទីយ៉ាងសំខាន់ក្នុងការជួយអប់រំទៅដល់សង្គម និងមហាជន ដើម្បីកាត់បន្ថយបញ្ហាបរិស្ថានដែលប្រទេសនេះកំពុងមានកង្វល់ធំធេង។ លោកបន្តថា កន្លងមកអ្នកសារព័ត៌មានដែលរាយការណ៍រឿងផលប៉ះពាល់បរិស្ថាននៅកម្ពុជា តែងរងការគំរាមកំហែងដល់អាយុជីវិត។
លោករំពឹងថា បណ្ដាញអ្នកសារព័ត៌មាននេះ នឹងពង្រឹងសមត្ថភាព ថែមទាំងជួយកាត់បន្ថយហានិភ័យពីលើអ្នកសារព័ត៌មាន តាមរយៈការប្រឹក្សាយោបល់ពីអ្នកជំនាញលើរបៀបរាយការណ៍កាន់តែមានប្រសិទ្ធភាព៖ «ឆ្លងកាត់ការពិភាក្សាមក ឃើញថា អ្នកសារព័ត៌មានយើងពិគ្រោះយោបល់ទៅថា គួរតែមានការបង្កើតបណ្ដាញ ឬជាក្រុមដើម្បីធ្វើការរាយការណ៍ព័ត៌មានស្នូល ពាក់ព័ន្ធនឹងបរិស្ថានកម្ពុជា ដើម្បីឲ្យយើងជួយពង្រឹងវិជ្ជាជីវៈផ្នែករាយការណ៍ព័ត៌មាន សុវត្ថិភាពអ្នកសារព័ត៌មាន ក៏ដូចជាជំរុញសេរីភាពក្នុងការរាយការណ៍ព័ត៌មានបរិស្ថានកាន់តែទូលាយ»។
ចំណែកឯ អ្នករាយការណ៍ព័ត៌មានវិទ្យុវាយោអន្តរជាតិដែលបានចូលរួមជាសមាជិកបណ្ដាញនេះ កញ្ញា ថាន រស្មី ប្ដេជ្ញារាយការណ៍ព័ត៌មានបរិស្ថានដែលមានប្រយោជន៍ដើម្បីជួយអប់រំពីផលប៉ះពាល់ និងវិធីបន្សាំនឹងការប្រែប្រួលអាកាសធាតុដល់ពលរដ្ឋកម្ពុជា ឲ្យកាន់តែស៊ីជម្រៅជាងមុន៖ «ខ្ញុំប្ដេជ្ញាសរសេរព័ត៌មាន ឬរាយការណ៍ព័ត៌មានបរិស្ថាន ទាំងការប្រែប្រួលអាកាសធាតុ គ្រោះរាំងស្ងួតទឹកជំនន់ព្រៃឈើ ដើម្បីនាំសារជូនដល់ប្រជាពលរដ្ឋកម្ពុជា ឲ្យយល់ដឹងបានច្រើន»។
ក្លឹបអ្នកកាសែតកម្ពុជា និងវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មានអះអាងថា នេះជាលើកទី១ហើយ ដែលកម្ពុជា បង្កើតឲ្យមានបណ្ដាញអ្នកសារព័ត៌មានស្នូលផ្នែករាយការណ៍ព័ត៌មានបរិស្ថាននៅកម្ពុជា។ បណ្ដាញនេះ នឹងចាប់ផ្ដើមដំណើរការចាប់ពីខែចុងខែសីហា នេះតទៅ៕