ដោយ ហ៊ុំ ចំរើន RFA 2016-08-22
ដំណាំស្រូវរបស់ប្រជាកសិករនៅខេត្តបាត់ដំបង ជាង ៤ម៉ឺនហិកតារ ប្រឈមនឹងការខូចខាតដោយសារគ្រោះរាំងស្ងួត និងគ្មានទឹកសម្រាប់ស្រោចស្រព។ ពលរដ្ឋខ្លះកំពុងព្រួយបារម្ភខ្លាចក្រែងគ្មានអង្ករច្រកឆ្នាំង ហើយដាច់ពោះស្លាប់នៅពេលខាងមុខ ដោយសារគ្មានប្រាក់ចំណូលដោះស្រាយជីវភាពគ្រួសារ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បញ្ជាក់ថា អាជ្ញាធរពាក់ព័ន្ធ បានត្រៀមរួចជាស្រេចហើយ ដើម្បីចុះជួយប្រជាពលរដ្ឋដែលជួបបញ្ហាគ្រោះរាំងស្ងួតនេះ។
ដើមស្រូវនៅតាមវាលស្រែរបស់ប្រជាកសិករខ្លះស្លឹកឡើងក្រហមស្ទើរតែដុតភ្លើងឆេះ ហើយរកងាប់បណ្ដើរៗ ពីព្រោះគ្មានភ្លៀងធ្លាក់ប្រមាណជាងមួយខែហើយ។
ប្រជាកសិករនៅភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង លោកស្រី ជា ស៊ីឌឿន ប្រាប់អាស៊ីសេរី ពេលលោកស្រីទៅមើលស្រែនៅព្រឹកថ្ងៃទី២២ សីហា ថា ដំណាំស្រូវរបស់លោកស្រីប្រមាណ ២ហិកតារ អាចនឹងងាប់រយៈពេលប្រមាណ ២សប្ដាហ៍ទៀត ប្រសិនបើពុំមានភ្លៀងធ្លាក់។
លោកស្រីបញ្ជាក់ថា ដំណាំស្រូវ ២ហិកតារនេះជាឆ្នាំងបាយសំខាន់ណាស់សម្រាប់គ្រួសាររបស់លោកស្រី ពីព្រោះគ្រួសារលោកស្រីគ្មានរបរផ្សេងក្រៅអំពីរបរធ្វើស្រែឡើយ៖ «ខ្ញុំចំណាយអស់ដើមទុនសម្រាប់ធ្វើស្រែជាង ១លានរៀលហើយ។ ឥឡូវគ្មានសល់អីទៀតទេ បើស្រូវឡើងក្រហមងាប់បែបនេះ។ បើទោះជាមានទឹកធ្វើស្រែ ក៏គ្មានដើមសម្រាប់ធ្វើស្រែទៀតដែរ»។
ស្រដៀងគ្នានេះដែរ ប្រជាកសិករនៅភូមិស្វាយស ម្នាក់ទៀត គឺលោក ជុន ជយ ថ្លែងថា ដំណាំស្រូវរបស់លោកចំនួន ៥ហិកតារដាច់ទឹកស្រោចស្រពជាងមួយខែហើយ។ លោកបញ្ជាក់ថា បើទោះជាជួបគ្រោះរាំងស្ងួតជាច្រើនថ្ងៃមកហើយក៏ដោយ ក៏ប៉ុន្តែពុំមានអាជ្ញាធរណាមកសួរនាំ និងជួយដល់ពួកគាត់នៅឡើយ៖ «ខ្ញុំសំណូមពរឲ្យរាជរដ្ឋាភិបាលជួយដល់ប្រជាពលរដ្ឋនៅឃុំតាប៉ុន ផង គឺធ្វើយ៉ាងណាឲ្យបានប្រព័ន្ធទឹកស្រោចស្រព គ្រាន់បានធ្វើស្រែប្រាំងដោះស្រាយជីវភាពគ្រួសារ»។
ទាក់ទងនឹងបញ្ហានេះ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង លោក ឈឹម វជិរា មានប្រសាសន៍ទទួលស្គាល់ថា ដំណាំស្រូវរបស់ប្រជាកសិកររាប់ម៉ឺនហិកតារក្នុងខេត្តបាត់ដំបង ពិតជាជួបគ្រោះរាំងស្ងួតប្រាកដមែន។ លោកអះអាងថា អាជ្ញាធរពាក់ព័ន្ធកំពុងយកចិត្តទុកដាក់លើការងារនេះយ៉ាងសកម្ម ដើម្បីជួយដល់ប្រជាពលរដ្ឋបន្តទៀត៖ «បាទ! ពួកខ្ញុំអត់មានថ្ងៃសៅរ៍ ថ្ងៃអាទិត្យ ទេ ដោយពួកគាត់ ខ្ញុំចុះទៅដល់ទីតាំងដែលរាំងស្ងួតនេះ។ ហើយសុំឲ្យបងប្អូនរាយការណ៍ពីកន្លែងរាំងស្ងួតមកខ្ញុំផ្ទាល់ ឬទៅក្រសួងកសិកម្ម ឬទៅលោកអភិបាលខេត្តក៏បាន ដើម្បីយើងចាត់ចែងសម្ភារទៅជួយពួកគាត់ដល់ទីកន្លែងបានឆាប់រហ័ស»។
លោកបញ្ជាក់ទៀតថា ដំណាំស្រូវរបស់ប្រជាកសិករដែលជួបគ្រោះរាំងស្ងួតខ្លាំងមានជាង ៤ម៉ឺន ៨ពាន់ហិកតារ ក្នុងចំណោមផ្ទៃដីធ្វើស្រែជាង ២៥ម៉ឺនហិកតារ។ លោកថា ក្នុងនោះមានស្រុកមោងឫស្សី ស្រុកសង្កែ ស្រុកបាណន់ ស្រុកគាស់ក្រឡ ស្រុករុក្ខគិរី ស្រុកថ្មគោល ស្រុកបវេល ក្រុងបាត់ដំបង និងស្រុកឯកភ្នំ អាចប្រឈមនឹងការខូចខាតទាំងស្រុងប្រមាណ ២សប្ដាហ៍ទៀត ប្រសិនបើគ្មានភ្លៀងធ្លាក់នោះ៕