ដោយ ឡេង ម៉ាលី RFA 2016-08-25
អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៥ សីហា បន្តសវនាការស្ដាប់ការថ្លែងទុក្ខសោករបស់ដើមបណ្ដឹងរដ្ឋប្បវេណីមួយរូបទៀត ដែលមានលេខកូដ 2TCCP-232 អះអាងថា គាត់ព្រមទទួលយកការរៀបការដោយបង្ខំ ព្រោះខ្លាចគេយកទៅសម្លាប់។
ដើមបណ្ដឹងរដ្ឋប្បវេណីដែលនៅលាក់ឈ្មោះ ព្រោះឋិតក្រោមការស៊ើបអង្កេតក្នុងសំណុំរឿង០០៣ និង០០៤ នៅឡើយ បានជម្រាបអង្គជំនុំជម្រះសាលាដំបូងថា លោកមិនហ៊ានប្រកែកនឹងអង្គការខ្មែរក្រហម ដែលបង្ខំឲ្យលោករៀបការទេ ព្រោះដើម្បីរក្សាជីវិតខ្លួនឯងផង និងអ្នកពាក់ព័ន្ធដទៃទៀតផង៖ «គាត់សួរទីមួយថា ធ្វើកូនអង្គការទេ? ដោយខ្ញុំខ្លាចស្លាប់ទាំងនារីជាគូដណ្ដឹង ដោយខ្ញុំខ្លាចស្លាប់ទាំងខ្លួនខ្ញុំ ដោយនឹកឃើញខ្លាចស្លាប់ដល់បងប្អូនច្រើនទៀត ខ្ញុំសុខចិត្តឆ្លើយថា ជាកូនអង្គការ រួចប្រធានកងសួរគ្រប់បីដងថា កូនអង្គការទេ? ខ្ញុំថា បាទកូនអង្គការ ដើម្បីរួចរស់ជីវិត ត្រូវតែឆ្លើយ។ រួចហើយមេកង រី ហ្នឹងកត់កំណត់ហេតុលេខ១ លេខ២ លេខ៣ អ៊ីចឹងទៅ ថាខ្ញុំហ្នឹងសុខចិត្តហើយ។ បើខ្ញុំមិនសុខចិត្តធ្វើតាមទេ ឬខ្ញុំប្រឆាំងថាមិនមែនកូនអង្គការ មិនធ្វើតាមការណែនាំរបស់មេកង ខ្ញុំប្រហែលជាទៅមន្ទីរឧក្រិដ្ឋកម្មណាមួយហើយ។ បើខ្ញុំឆ្លើយអ៊ីចឹងទៅ គឺខ្ញុំបានរួចខ្លួន»។
លោកបានចាត់ទុកការបង្ខំរបស់ខ្មែរក្រហមឲ្យលោករៀបការនេះ ថាជាភាពឃោរឃៅ ព្រោះពួកគេបានបំបាត់សេចក្ដីស្រឡាញ់ចំពោះគូដណ្ដឹងរបស់លោក ហើយបង្ខំឲ្យរៀបការជាមួយមនុស្សដែលលោកមិនបានឃើញ ឬស្គាល់គ្នាសោះ៖ «អាពាហ៍ពិពាហ៍នេះ ខ្ញុំសោកស្ដាយបំផុតលោកប្រធាន សោកស្ដាយត្រង់ថា គូដណ្ដឹងរបស់ខ្ញុំត្រូវបានគ្នាជាប្ដីប្រពន្ធទៅអនាគត ហើយមិនបានគ្នា។ ដូចជាផ្លែឈើកំពុងតែពេញ ហើយបេះម៉ាត់មកដូចផ្លែស្វាយស្រក់ជ័រ។ ខ្ញុំពេលហ្នឹង ប្រធានកងផ្ដាច់មនោសញ្ចេតនា ហើយខ្ញុំគ្មានសិទ្ធិតវ៉ាអី មានតែចុកទ្រូងចុកថ្លើម ពិបាកក្នុងចិត្ត»។
ដើមបណ្ដឹងរូបនេះបន្តថា មូលហេតុដែលពួកខ្មែរក្រហមបំបែកលោកពីគូដណ្ដឹងចាស់របស់លោក ពីព្រោះគេចាត់ទុកគូដណ្ដឹងរបស់លោក ថាមានប្រវត្តិគ្រួសារជាសមាសភាពខ្មាំងរបស់បដិវត្តន៍ ហើយត្រូវបានគេយកទៅសម្លាប់រួចហើយ៖ «មានបងប្រុសគាត់មួយត្រូវអង្គការកម្ទេច។ អ៊ីចឹងប្រធានកង រី ហ្នឹង បានសួរខ្ញុំថា បើមានអង្គការកម្ទេចអ៊ីចឹង មិត្តឯងមិនអាចរៀបការជាមួយនារីហ្នឹងបានទេ ព្រោះថ្ងៃក្រោយទៅមិត្តឯងនឹងស្លាប់តាមបងប្អូននារីហ្នឹងហើយ ព្រោះនារីហ្នឹងឋិតនៅក្នុងការតាមដានរបស់អង្គការ។ អ៊ីចឹង បើកាលណាសម្លាប់នារីហ្នឹង ក៏សម្លាប់មិត្តឯងដែរ។ អ៊ីចឹង មិត្តឯងត្រូវដូរចិត្តធ្វើម៉េច។ ឥឡូវខ្ញុំឲ្យមិត្តឯងធ្វើជាកូនអង្គការ មិត្តឯងយល់យ៉ាងម៉េច? ពិចារណាមើល។ ចង់ងាប់ ឬចង់រស់? បើយកនារីហ្នឹង មានតែងាប់ហើយ គឺការកម្ទេចដកស្មៅទាំងឫស។ មេកងហ្នឹងថាអ៊ីចឹង»។
រហូតមកដល់ពេលនេះ អង្គជំនុំជម្រះសាលាដំបូងបានស្ដាប់សក្ខីកម្មដើមបណ្ដឹងរដ្ឋប្បវេណីចំនួន ៣រូបហើយ ទាក់ទងនឹងអង្គហេតុរៀបអាពាហ៍ពិពាហ៍ដោយបង្ខំ និងការរំលោភសេពសន្ថវៈនៅក្នុងរបបខ្មែរក្រហម។ អង្គហេតុនេះ ជាបទចោទមួយប្រឆាំងអតីតមេដឹកនាំជាន់ខ្ពស់ខ្មែរក្រហមពីររូប ក្នុងសំណុំរឿងលេខ០០២ វគ្គ២ គឺជនជាប់ចោទ នួន ជា និង ខៀវ សំផន។
សវនាការលើសំណុំរឿងលេខ០០២ វគ្គ២ សម្រាប់សប្ដាហ៍នេះ ត្រូវបានអង្គជំនុំជម្រះសាលាដំបូងសម្រេចផ្អាកត្រឹមរសៀលថ្ងៃទី២៥ សីហា ហើយសវនាការនឹងត្រូវលើកទៅបន្តនៅថ្ងៃច័ន្ទ ទី២៩ សីហា សប្ដាហ៍ក្រោយ។ សវនាការនោះ អង្គជំនុំជម្រះនឹងស្ដាប់ដើមបណ្ដឹងរដ្ឋប្បវេណីថ្មីក្នុងអង្គហេតុនេះមួយរូបទៀត ដែលមានលេខកូដថា 2TCCP-219៕