ដោយ ជិន ជេដ្ឋា RFA 2016-08-27
ពលរដ្ឋបួនភូមិ នៃឃុំអញ្ចាញរូង ស្រុកបរិបូរណ៍ ខេត្តកំពង់ឆ្នាំង ខកចិត្តនឹងអាជ្ញាធរដែលមិនបានផ្ដល់ព័ត៌មានច្បាស់លាស់លើគម្រោងស្ថាបនាប្រព័ន្ធធារាសាស្ត្រ និងសំណងផលប៉ះពាល់ដល់អ្នកភូមិដែលរងផលប៉ះពាល់។ ចំណែកអាជ្ញាធរថា ពលរដ្ឋភាគច្រើនទទួលបានព័ត៌មាន និងយល់ព្រមទទួលសំណង ប៉ុន្តែមានមួយចំនួនតូចដែលមិនពេញចិត្តទើបបង្កើតឲ្យមានការតវ៉ាឡើង។
គម្រោងអភិវឌ្ឍន៍ប្រព័ន្ធធារាសាស្ត្រធំៗចំនួនពីរ នៅស្រុកបរិបូរណ៍ ដែលមានលទ្ធភាពស្រោចស្រពផ្ទៃដីកសិកម្មជិត ២ម៉ឺនហិកតារ ត្រូវបានពលរដ្ឋស្វាគមន៍ និងពលរដ្ឋខ្លះមិនសប្បាយចិត្តដោយដីស្រែ ឬចម្ការពួកគេប៉ះពាល់នឹងគម្រោងអភិវឌ្ឍន៍ ហើយអាជ្ញាធរមិនបានផ្ដល់សំណងសមរម្យ។ គម្រោងទាំងពីរនេះ គឺមានប្រភពទឹកចេញទំនប់លំហាច និងស្ទឹងអាចាង (អាចាំង) ស្ថាបនាដោយក្រុមហ៊ុនចិន។
តំណាងពលរដ្ឋម្នាក់នៅឃុំអញ្ចាញរូង ក្នុងចំណោមពលរដ្ឋ ៣០៤នាក់ ដែលបានផ្ដិតមេដៃដាក់ជូនអាជ្ញាធរ និងអង្គការក្រៅរដ្ឋាភិបាល ដើម្បីជួយអន្តរាគមន៍លើការផ្ដល់សំណងមិនសមរម្យ។
លោកស្រី ឆៅ សាវឿន មានប្រសាសន៍នៅថ្ងៃទី២៦ ខែសីហា ថា កន្លងទៅអាជ្ញាធរធ្លាប់ប្រាប់ពលរដ្ឋពីគម្រោងធ្វើប្រឡាយទឹកនេះដែរ ប៉ុន្តែមិនបានប្រាប់ពីតម្លៃនៃការផ្ដល់សំណងនោះទេ៖ «ខ្ញុំមិនដឹងបាត់ព័ត៌មាននៅត្រឹមណាទេ? ប៉ុន្តែប្រហែលឃុំប្រាប់មកអាជ្ញាធរភូមិឲ្យប្រាប់បន្តទៅពលរដ្ឋចូលរួមប្រជុំ តែប្រហែលថ្នាក់ភូមិអត់ដើរប្រាប់។ ឯកឧត្ដម ចេង ញ៉ាន់ ចុះទៅដោះស្រាយគាត់ថា សំណងមិនអាចបានថ្លៃទេ គឺបានតែបីកាក់ហ្នឹង ហើយក៏អត់មាននិយាយតបតអ្វីទេចំពោះប្រជាពលរដ្ឋនោះ។ ខ្ញុំសំណូមពរសូមឲ្យអ្នកដែលចុះមកដោះស្រាយសុំចុះមកម្ដងទៀត ដើម្បីលើកពីកង្វល់របស់ពួកគាត់ដែលបានផ្ដិតមេដៃគាំទ្រលើលិខិតសំណូមពរហ្នឹង»។
លោកស្រី ឆៅ សាវឿន បញ្ជាក់ថា ជាក់ស្ដែងអាជ្ញាធរមានសមត្ថកិច្ចបានផ្ដល់សំណងត្រឹមតែបីកាក់ ឬស្មើនឹងមួយពាន់ពីររយរៀលប៉ុណ្ណោះក្នុងមួយម៉ែត្រការ៉េ។ ប៉ុន្តែជំហររបស់លោកស្រី និងអ្នកភូមិជាច្រើនទៀតចង់បានសំណង់សមរម្យដោយដីស្រែជម្រៅ ឬមិនជាប់ផ្លូវត្រូវផ្ដល់សំណងប្រាំកាក់ ដីស្រែជាប់ផ្លូវលំត្រូវផ្ដល់មួយដុល្លារ និងដីស្រែជាប់ផ្លូវធំត្រូវផ្ដល់សំណងឲ្យបានមួយដុល្លារកន្លះ។
អាស៊ីសេរី មិនអាចទាក់ទងអភិបាលរងខេត្តកំពង់ឆ្នាំង លោក ចេង ញ៉ាន់ ដែលបានចុះសម្របសម្រួលពលរដ្ឋជុំវិញបញ្ហានេះនៅសាលាឃុំអញ្ចាញរូង កាលពីព្រឹកថ្ងៃទី២៤ ខែសីហា ដើម្បីអត្ថាធិប្បាយបន្ថែមបានទេ ខណៈប្រធានមន្ទីរធនធានទឹក និងឧតុនិយមលោក ដោក ប៊ុនថុន មិនទទួលទូរស័ព្ទ។
ទោះជាយ៉ាងណាអភិបាលស្រុកបរិបូរណ៍ លោក ឃួន សៅរុំ បញ្ជាក់ថា គម្រោងអភិវឌ្ឍប្រឡាយទឹកលំហាចនេះ បានប៉ះពាល់ដីពលរដ្ឋប្រមាណ ៤០០ក្បាលដី ហើយបច្ចុប្បន្នទូទាត់សំណងបាន ២១៩ក្បាលដីហើយ។ លោកថា អាជ្ញាធរបានប្រជុំផ្សព្វផ្សាយ ហើយពលរដ្ឋភាគច្រើនស្ងប់ចិត្តក្នុងការទទួលសំណង ប៉ុន្តែពលរដ្ឋមួយចំនួនតូចបានបំផុសបំផុលចង់បានសំណងច្រើន៖ «យើងបានប្រជុំហើយគាត់ស្ងប់អារម្មណ៍តើមានរឿងអី! គ្រាន់តែថា មានអ្នកចលនាឲ្យអ្នកទទួលលុយក៏មកផ្ដិតមេដៃតវ៉ានឹងគេដែរ។ ដល់ពេលសួរគាត់ទៅថាទេ! គាត់អត់បានផ្ដិតផងមានអ្នកចលនាចង់ឲ្យបានឡើងថ្លៃបន្តិចទៀត ហើយបងប្អូនបានផ្ដិតមេដៃចុះកិច្ចសន្យាអស់ហើយហ្នឹង។ ការពិត ២១៩ក្បាលដីគាត់ទទួលលុយអស់ ១៤ម៉ឺនដុល្លារហើយ»។
មន្ត្រីផ្នែកអង្កេតនៃអង្គការលីកាដូ (LICADHO) ខេត្តកំពង់ឆ្នាំង លោក សៅ ភារៈ ថ្លែងថា បញ្ហាមិនទទួលព័ត៌មានច្បាស់លាស់ជុំវិញគម្រោងអភិវឌ្ឍន៍នេះ លោកមិនដាក់កំហុសទៅខាងអាជ្ញាធរ ឬពលរដ្ឋនោះទេ។ ប៉ុន្តែអាជ្ញាធរមានភារកិច្ចក្នុងការផ្ដល់ព័ត៌មានច្បាស់លាស់ពីគម្រោងដល់ពលរដ្ឋដើម្បីបញ្ចៀសការយល់ច្រឡំ ឬជម្លោះកើតឡើងរវាងពលរដ្ឋរងផលប៉ះពាល់ជាមួយអាជ្ញាធរមានសមត្ថកិច្ច៖ «អាជ្ញាធរត្រូវតែជូនដំណឹងដល់ពលរដ្ឋ ដើម្បីគាត់បានមកចូលរួមបើមិនអ៊ីចឹងទេ រឿងនេះមិនអាចដោះស្រាយកើត ដោយសារតែប្រជាពលរដ្ឋមួយអត់បានទទួលព័ត៌មាន ហើយអត់បានចូលរួមអ៊ីចឹងមិនដឹងនិយាយគ្នាពីរឿងអី។ បាទ! ខាងប្រជាពលរដ្ឋតវ៉ាថា សុំឲ្យអាជ្ញាធរហ្នឹងផ្ដល់សំណងជូនគាត់»។
មន្ត្រីក្រសួងធនធានទឹក និងអាជ្ញាធរស្រុកបរិបូរណ៍ អះអាងថា បើទំនប់ស្ទាក់ទឹកស្ទឹងអាចាង អាចស្ថាបនារួចរាល់ក្នុងឆ្នាំ២០១៧ ហើយទំនប់លំហាចអាចបញ្ចប់នៅចុងឆ្នាំ២០១៨ តាមការគ្រោងទុកអន្ដរក្រសួងដែលចេញគម្រោងនេះ វាអាចផ្ដល់ទឹកស្រោចស្រពផ្ទៃដីកសិកម្មនៅឃុំក្រាំងស្គារ ស្រុកទឹកផុស និងឃុំមួយចំនួននៅស្រុកបរិបូរណ៍ ខេត្តកំពង់ឆ្នាំង ប្រមាណ ១៨.០០០ហិកតារ៕