ដោយ រដ្ឋា វិសាល RFA 2016-08-30
អាជ្ញាធរខេត្តរតនគិរី បដិសេធការអះអាងរបស់មន្ត្រីយោធាទីចាត់ការព្រំដែននៃអគ្គបញ្ជាការកងខេមរៈភូមិន្ទប្រចាំខេត្តរតនគិរី ផ្តល់ព័ត៌មានទៅក្រុមនិស្សិតក្នុងដំណើរទៅទស្សនកិច្ចសិក្សានៅតំបន់ព្រំដែនកម្ពុជា-វៀតណាម កំពុងមានទំនាស់ថា ភាគីវៀតណាម បានលុបស្រះវិញហើយ។ មន្ត្រីគម្រោងអភិវឌ្ឍន៍ធនធានយុវជនស្នើសុំឲ្យអាជ្ញាធរខ្មែរបង្កើតក្រុមផ្តល់ព័ត៌មានត្រឹមត្រូវដល់ពលរដ្ឋទាំងឡាយដែលបានធ្វើដំណើរទៅទស្សនកិច្ចនៅតំបន់ព្រំដែន។
មន្ត្រីអាជ្ញាធរខេត្តរតនគិរី ចាត់ទុកការផ្តល់ព័ត៌មានថា ភាគីវៀតណាម លុបស្រះចំនួន៩ ក្នុងតំបន់សខេត្តរតនគិរី ជាប់នឹងខេត្តយ៉ាឡាយ ប្រទេសវៀតណាម ថា ជាការមិនពិតផ្ទុយទៅនឹងកំណត់ទូតរបស់រាជរដ្ឋាភិបាលដែលកំពុងទាមទារឲ្យវៀតណាម លុបស្រះនោះតាមកិច្ចព្រមព្រៀងរវាងភាគីប្រទេសទាំងពីរ។
មន្ត្រីយោធាក្រុមការងារទីចាត់ការព្រំដែននៃអគ្គបញ្ជាការកងខេមរៈភូមិន្ទប្រចាំខេត្តរតនគិរី លោក ថាំង ដារ៉ា កាលពីថ្ងៃទី២៦ ខែសីហា ផ្តល់ព័ត៌មានថា វៀតណាមបានលុបស្រះចំនួន៩ នៅតំបន់ព្រំដែនចំណុចប៉ុស្តិ៍ការពារព្រំដែនភូមិឡំកម ក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ ខណៈនិស្សិតម្នាក់ក្នុងចំណោមក្រុមនិស្សិតជិត ៤០នាក់ សហការជាមួយអង្គការគម្រោងអភិវឌ្ឍន៍ធនធានយុវជនបានសួរថា តើវៀតណាម លុបស្រះហើយ ឬនៅ៖ «គេបញ្ឈប់សកម្មភាព គេនឹងលុបស្រះ។ អាហ្នឹងគេលុបអស់ហើយ ខ្ញុំមើលទៅ ៩ហ្នឹង»។
អ្នកនាំពាក្យ និងជាអភិបាលរងខេត្តរតនគិរី លោក ញ៉ែម សំអឿន កត់សំគាល់ថា អាជ្ញាធរខេត្តបានផ្តល់របាយការណ៍ស្តីពីវៀតណាម ជីកស្រះចំនួន៩ ក្នុងតំបន់សព្រំដែនស្រុកអូរយ៉ាដាវ ជាប់នឹងស្រុកដាក់កឺ ប្រទេសវៀតណាម តាំងពីខែមិថុនា ឆ្នាំ២០១៥។ ករណីនេះអាជ្ញាធរក៏មិនឃើញភាគីវៀតណាម លុបស្រះនោះវិញទេ បើទោះបីភាគីវៀតណាម បានព្រមព្រៀងតាមរយៈមន្ត្រីក្រសួងការបរទេសថា នឹងលុបស្រះនោះវិញក៏ដោយ៖ «អត់ឃើញលុបទេ បើសិនថា វៀតណាមលុបដោយខ្លួនវា គឺអត់ទេ។ តាមជ្រលងអូរដល់ពេលទឹកភ្លៀងហូរខ្លាំងមកដីល្បាប់ហូរចាក់សឹងរាប ស្មើ»។
ឆ្លើយតបចំពោះការបដិសេធនេះលោក ថាំង ដារ៉ា ទទួលស្គាល់ថា ការផ្តល់ព័ត៌មានរបស់លោកគឺភ័ន្តច្រឡំដោយសារតែលោកទទួលបានព័ត៌មានរឿងនេះមានមិនច្បាស់លាស់៖ «ភ័ន្តច្រឡំហើយ យើងនិយាយតាមថ្នាក់ជាតិរបស់យើងទៅ»។
ក្រសួងការបរទេសកម្ពុជា កាលពីថ្ងៃទី១៨ ខែសីហា បានផ្ញើកំណត់ទូតទៅក្រសួងការបរទេសប្រទេសវៀតណាម។ កំណត់ទូតថ្មីនេះទាញការចាប់អារម្មណ៍របស់ក្រសួងការបរទេសកម្ពុជា ពាក់ព័ន្ធការរំលោភបំពានរបស់វៀតណាម តាមបណ្តោយព្រំដែនកម្ពុជា-វៀតណាម រួមមានការជីកស្រះចំនួន៩ ការសង់អគារ និងផ្លូវបេតុងនៅចន្លោះបង្គោលព្រំដែនលេខ៣០ ដល់បង្គោលព្រំដែនលេខ៤០ ក្នុងខេត្តរតនគិរី និងខេត្តមណ្ឌលគិរី។ ការធ្វើផ្លូវនៅចន្លោះបង្គោលព្រំដែនលេខ១៩៤ ដល់បង្គោលលេខ២០៣។ បង្គោលព្រំដែនលេខ២១១ ដល់ ២១៣ និងចាប់ពីបង្គោលលេខ២១៣ ដល់បង្គោលលេខ២២៧ នៅខេត្តស្វាយរៀង។ ការសាងសង់ប៉ុស្តិ៍យោធានៅស្រុកកោះធំ ខេត្តកណ្តាល។
ការសង់ប៉ុស្តិ៍ច្រកទ្វារព្រំដែនវៀតណាម ជាប់បង្គោលព្រំដែនលេខ២៦០ ក្នុងស្រុកបូរីជលសារ ខេត្តតាកែវ។
ស្របតាមស្មារតីកំណត់ទូត២៣ ដែលក្រសួងការបរទេសកម្ពុជា ធ្លាប់បានផ្ញើជូនទៅភាគីវៀតណាម រាជរដ្ឋាភិបាលកម្ពុជា ស្នើឲ្យរដ្ឋាភិបាលវៀតណាម ជាថ្មីឲ្យបញ្ឈប់សកម្មភាពល្មើសទាំងអស់នោះជាបន្ទាន់ និងធ្វើឲ្យស្ថានភាពនៅតំបន់រំលោភមានសភាពដូចដើម ព្រមទាំងចាត់វិធានការរារាំងកុំឲ្យពលរដ្ឋវៀតណាម ចូលមកដាំដុះ ឬធ្វើសកម្មភាពក្នុងតំបន់ព្រំដែនដែលមិនទាន់បញ្ចប់ការបោះខណ្ឌសីមា និងបោះបង្គោលព្រំដែន។
ប្រធានគម្រោងអភិវឌ្ឍន៍ធនធានយុវជន លោក ឈិត មុន្នី កត់សំគាល់ដែរថា មន្ត្រីព្រំដែនខ្មែរគួររៀបចំឲ្យមានក្រុមផ្តល់ព័ត៌មានត្រឹមត្រូវសម្រាប់ពលរដ្ឋខ្មែរ ជាពិសេសក្រុមយុវជនដែលកំពុងសិក្សាស្វែងយល់ពីបញ្ហាព្រំដែន។ លោកថ្លែងថា យន្តការដាះស្រាយបញ្ហាព្រំដែនរវាងប្រទេសទាំង២ តាមរយៈការទូតដែលរាជរដ្ឋាភិបាលកំពុងប្រើប្រាស់បច្ចុប្បន្នគឺជាវិធីសាស្ត្រល្អ និងជាកិច្ចសហការរវាងសន្តិភាពសាមគ្គីភាពប្រទេសទាំងពីរមុននឹងឈានទៅរកការដោះស្រាយតាមយន្តការអន្តរជាតិ៖ «គួរ សិក្សាព័ត៌មានឲ្យច្បាស់ ផ្តល់ឲ្យប្រជាពលរដ្ឋយើង ជាពិសេសយុវជនដែលគាត់ចង់ដឹងរឿងព្រំដែនដើម្បីជួយគ្នាក្នុងនាមជា ខ្មែរ»។
ទោះបីជាយ៉ាងណាក៏ដោយ ក្នុងកិច្ចប្រជុំទ្វេភាគីរវាងគណៈកម្មការចម្រុះកិច្ចការព្រំដែនកម្ពុជា-វៀតណាម ស្ដីពីការដោះស្រាយវិវាទតាមព្រំដែនប្រទេសទាំងពីរនាទីក្រុងភ្នំពេញ កាលពីថ្ងៃទី២៩ ខែសីហា គីវៀតណាម យល់ព្រមទទួលយកការតវ៉ារបស់កម្ពុជា ទាក់ទងនឹងការរំលោភចូលអធិបតេយ្យភាពទឹកដីកម្ពុជា ទៅជជែកពិភាក្សាជាមួយអន្តរក្រសួងពាក់ព័ន្ធរបស់វៀតណាម៕