ដោយ សឿង ភារៈ11/09/2016 rfi
ប្រធានគណបក្សប្រឆាំងលោកសម រង្ស៊ី បានបង្ហាញការគាំទ្ររបស់លោកចំពោះការទាមទាររបស់សហជីពឲ្យដំឡើងប្រាក់ឈ្នួលអប្បបរមាកម្មករកាត់ដេរយ៉ាងតិច១៨០ដុល្លារអាមេរិកសម្រាប់ឆ្នាំ២០១៧។ ការលើកឡើងរបស់មេបក្សប្រឆាំងនេះ ត្រូវបានអ្នកនាំពាក្យក្រសួងការងារថាលោកសម រង្ស៊ីទទួលបានព័ត៌មានតិចជាងសហជីព ដែលកំពុងធ្វើការងារនេះផ្ទាល់។
លោកសម រង្ស៊ីគាំទ្រការទាមទាររបស់សហជីពតំណាងឲ្យកម្មករនៅប្រទេសកម្ពុជា ដែលទាមទារ ឲ្យថៅកែរោងចក្រ ដំឡើងប្រាក់ឈ្នួលអប្បបរមាពី១៤០ដុល្លារ ដល់១៨០ដុល្លារយ៉ាងតិច សម្រាប់ឆ្នាំ២០១៧ខាងមុខ។ នេះបើតាមទំព័រហ្វេសប៊ុកផ្លូវការរបស់លោកនៅថ្ងៃទី១១ កញ្ញានេះ។
ប្រធានគណបក្សប្រឆាំង ដែលកំពុងតែរស់នៅក្រៅប្រទេស បានចាត់ទុកការទាមទារប្រាក់ឈ្នួលកម្មករកាត់ដេរយ៉ាងតិច១៨០ដុល្លារគឺជារឿងត្រឹមត្រូវ។ លោកថា “ប្រាក់ខែគោល ១៤០ដុល្លារ ដូចសព្វថ្ងៃ មិនអាចរស់បានទេ។មិនអាចប្រៀបធៀបប្រាក់ខែកម្មករនៅប្រទេសកម្ពុជា ទៅនឹងប្រាក់ខែកម្មករនៅប្រទេសជិតខាងបានទេ ពីព្រោះទំនិញនៅប្រទេសកម្ពុជា ថ្លៃជាងនៅប្រទេសជិតខាង ឆ្ងាយណាស់(...)។
លោកសម រង្ស៊ីបានឲ្យដឹងទៀតថា “នៅប្រទេសកម្ពុជា សេវាសាធារណៈដូចជាប្រព័ន្ធអប់រំ និងប្រព័ន្ធសុខាភិបាល តម្រូវឲ្យប្រជាពលរដ្ឋចំណាយលុយ ច្រើនជាងនៅប្រទេសជិតខាង។នៅប្រទេសកម្ពុជា មិនមានសេវាសង្គមកិច្ច ជួយទ្រទ្រង់ជីវភាពរស់នៅ របស់ប្រជាពលរដ្ឋក្រីក្រ ដូចនៅប្រទេសជិតខាងទេ។”
ការលើកឡើងរបស់លោកសម រង្ស៊ីតាមទំព័រហ្វេសប៊ុកនេះ ធ្វើឡើងស្របពេលដែលការចរចាប្រាក់ឈ្នួលក្នុងវិស័យវាយនភណ្ឌកាត់ដេរ និងផលិតស្បែកជើង កំពុងតែដំណើរការ ដើម្បីសម្រេចយកតួលេខប្រាក់ឈ្នួលអប្បបរមាមួយសម្រាប់ឆ្នាំ២០១៧ខាងមុខនេះ។ ការប្រជុំកំណត់ប្រាក់ឈ្នួលកម្មករនឹងត្រូវប្រជុំពិភាក្សាលំអិត ជាលក្ខណៈត្រីភាគីនៅថ្ងៃទី២៦ ខែកញ្ញាខាងមុខនេះជាបន្ត។
លោកហេង សួរអ្នកនាំពាក្យក្រសួងការងារបានថ្លែងប្រាប់វិទ្យុបារាំងអន្តរជាតិថាអ្វីដែលលោកសម រង្ស៊ីបានសរសេរក្នុងទំព័រហ្វេសប៊ុកនេះ គឺគ្រាន់តែជាការឆ្លៀតកេងយកអ្វីដែលជាការប្រកាសជាសាធារណៈរបស់សហជីព ដែលបានបោះឆ្នោតផ្ទៃក្នុងៗការកំណត់តួលេខប្រាក់ឈ្នួលអប្បបរមាសម្រាប់ការចរចាជាមួយភាគីរដ្ឋាភិបាល និងភាគនិយោជក។
លោកថា លោកសម រង្ស៊ីហាក់ដូចជាទទួលបានព័ត៌មានតិចជាងភាគីសហជីព ដែលជាអ្នកធ្វើកិច្ចការនេះផ្ទាល់ ដូច្នេះលោកសម រង្ស៊ីប្រហែលត្រូវមានអ្នកបច្ចេកទេសទៅពន្យល់បន្ថែមទៀត បើមិនដូច្នេះទេអ្វីដែលគាត់សរសេរមកគឺខុសពីស្ថានភាពជាក់ស្តែង។
ទោះបីជាស្ថិតក្នុងការចរចាក្តីប៉ុន្តែកាលពីថ្ងៃទី០៦ ខែកញ្ញា សមាគមរោងចក្រកាត់ដេរនៅកម្ពុជា (GMAC) បានឲ្យដឹងថាប្រាក់ឈ្នួលអប្បបរមាថ្មី គួរត្រូវកំណត់ក្នុងកម្រិតមិនលើសពី១៤៤.២ដុល្លារឡើយ។ ដោយភាគីGMAC បានលើកហេតុផលថាវិស័យកាត់ដេរ និងផលិតស្បែកជើងកំពុងស្ថិតក្នុងស្ថានភាពកាន់តែលំបាកទៅៗ។ ចំណែកខាងតំណាងសហជីពកម្មករវិញបានដាក់សំណើប្រាក់ឈ្នួលអប្បបរមាសម្រាប់កម្មករ១៧៩.៦ដុល្លារអាមេរិកសម្រាប់ឆ្នាំ២០១៧ ដើម្បីចរចា៕
យោងតាមរបាយការណ៍របស់អង្គការពលកម្មអន្តរជាតិ(ILO) កាលពីខែសីហា កម្ពុជាមានកម្មករនយោជិតផ្នែកវាយណ្ឌ កាត់ដេរ និងផលិតស្បែកជើងប្រមាណ៦៣០,០០០នាក់ ដែលបានទទួលប្រាក់ឈ្នួលអប្បបរមាពី១២៨ដុល្លារនៅឆ្នាំ២០១៥ ហើយកើនមកដល់ប្រាក់ឈ្នួលអប្បបរមា១៤០ដុល្លារក្នុងឆ្នាំ២០១៦នេះ។
ដោយឡែកការនាំចេញសម្លៀកបំពាក់ និងស្បែកជើងទៅកាន់ទីផ្សារបរទេសក៏នៅតែបន្តកើនឡើងនៅត្រីមាសទី១ នៃឆ្នាំ២០១៦ ក្នុងនោះការនាំចេញសម្លៀកបំពាក់មានការកើនឡើង១៤.៧ភាគរយ ក្នុងទំហំទឹកប្រាក់១,៦០៥លានដុល្លារអាមេរិក។ ការនាំចេញស្បែកជើងក្នុងរយៈពេលដូចគ្នានេះ បានកើនឡើង១២.៩ភាគរយ ឬក្នុងទំហំទឹកប្រាក់១៦៨លានដុល្លារអាមេរិក។ នេះបើតាមរបាយការណ៍ILO៕