ប៊ុន សេងគង់ and Shaun Turton ភ្នំពេញ ប៉ុស្តិ៍Tue, 13 September 2016
ភ្នំពេញៈ ពីរថ្ងៃបន្ទាប់ពីគណបក្សសង្គ្រោះជាតិបានប្រកាសពីគម្រោងធ្វើមហាបាតុកម្មអហិង្សាដើម្បីប្រឆាំងទៅនឹងអ្វីដែលគណបក្សនេះហៅថាជាការ «ដាក់សម្ពាធហួសហេតុ» តាមរយៈការប្រើប្រាស់ប្រព័ន្ធតុលាការមិនឯករាជ្យដើម្បីធ្វើទុក្ខបុកម្នេញមកលើថ្នាក់ដឹកនាំ និងសកម្មជនរបស់ខ្លួនលោកនាយករដ្ឋមន្ត្រី ហ៊ុន សែន បានធ្វើការឆ្លើយតបភ្លាមៗដោយបញ្ជាឲ្យកងកម្លាំងរបស់រដ្ឋាភិបាលត្រៀម «កម្ចាត់ចោលឲ្យអស់» នូវបាតុកម្មដែលលោកហៅថាខុសច្បាប់ដើម្បីការពារសន្តិសុខ និងសណ្តាប់ធ្នាប់សង្គម។
បន្ទាប់ពីការកាត់ទោសកាលពីថ្ងៃសុក្រទៅលើប្រធានស្តីទីគណបក្សសង្គ្រោះជាតិលោក កឹម សុខា គណៈកម្មាធិការអចិន្រៃ្តយ៍របស់គណបក្សសង្គ្រោះជាតិកាលពីម្សិលមិញបានបោះឆ្នោតផ្តល់ភ្លើងខៀវឲ្យមានការធ្វើមហាបាតុកម្មអហិង្សា និងបង្កើតគណៈកម្មាធិការមួយដើម្បីរៀបចំមហាបាតុកម្មនេះ។ នេះបើតាមសេចក្តីថ្លែងការណ៍មួយដែលចេញកាលពីល្ងាចម្សិលមិញ។
អ្នកនាំពាក្យគណបក្សលោក យឹម សុវណ្ណ បានថ្លែងថាគណបក្សចង់ចរចាជាមួយគណបក្សប្រជាជនកម្ពុជាដោយសារតែការទទួលរងការធ្វើទុក្ខបុកម្នេញជាបន្តបន្ទាប់លើសមាជិករបស់ខ្លួនហើយថាការតវ៉ាគឺធ្វើឡើងដោយសារតែ«គ្មានជម្រើស» ប៉ុន្តែត្រូវតែធ្វើការតវ៉ា។
លោក សុវណ្ណ បញ្ជាក់ថា៖ «យើងមិនអាចរង់ចាំមើលគេចាប់ខ្លួនយើងម្តងមួយៗនោះទេ»។ លោកបន្ថែមថាគណៈកម្មាធិការដែលមានសមាជិកពី ១០ ទៅ ២០ នាក់ដែលនឹងត្រូវបង្កើតនៅថ្ងៃនេះនឹងកំណត់ថ្ងៃធ្វើបាតុកម្ម។ នៅពេលសួរថាតើអ្នកគាំទ្រចំនួនប៉ុន្មាននាក់នឹងចូលរួមធ្វើបាតុកម្មលោក សុវណ្ណ ថ្លែងថា «ច្រើនតាមដែលអាចធ្វើទៅបាន»។
តំណាងរាស្រ្តគណបក្សសង្គ្រោះជាតិពីររូបបានជាប់ពន្ធនាគារបីរូបទៀតប្រឈមមុខនឹងបទព្រហ្មទណ្ឌ និងមេដឹកនាំរបស់គណបក្សគឺលោក សម រង្ស៊ី និងលោក កឹម សុខា ត្រូវបានកាត់ទោសឲ្យជាប់ពន្ធនាគារ។
លោក សម រង្ស៊ី បាននិរទេសខ្លួនឯងទៅរស់នៅបរទេសកាលពីឆ្នាំមុនខណៈលោក កឹម សុខា កំពុងស្នាក់នៅក្នុងទីស្នាក់ការគណបក្សសង្គ្រោះជាតិចាប់តាំងពីថ្ងៃទី ២៦ ខែឧសភា មកដើម្បីចៀសពីការចាប់ខ្លួនហើយកាលពីថ្ងៃសុក្រត្រូវបានតុលាការដែលមជ្ឈដ្ឋានជាច្រើនមើលឃើញថាបានរងឥទ្ធិពលនយោបាយបានកាត់ទោសឲ្យជាប់ពន្ធនាគាររយៈពេល ៥ ខែ។
លោក កឹម សុខា ត្រូវបានកាត់ទោសឲ្យជាប់ពន្ធនាគារគឺដោយសារការមិនចូលបំភ្លឺជាសាក្សីនៅក្នុងករណីសញ្ចារកម្មដែលមន្រ្តីអង្គការសិទ្ធិមនុស្សបួនរូប និងមន្រ្តីគណៈកម្មាធិការជាតិរៀបចំការបោះឆ្នោតមួយរូបត្រូវបានចាប់ឃុំខ្លួនក្នុងពន្ធនាគារផងដែរ។
នៅក្នុងសុន្ទរកថាកាលពីថ្ងៃអាទិត្យលោក កឹម សុខា បានព្រមានថាករណី «អយុត្តិធម៌» នេះដែលត្រូវបានមជ្ឈដ្ឋានជាច្រើនចាត់ទុកថាជាហេតុផលនយោបាយអាចបង្កឲ្យមានមហាបាតុកម្ម។
ថ្លែងកាលពីម្សិលមិញតំណាងរាស្រ្តគណបក្សប្រឆាំងដែលសុំមិនបញ្ចេញឈ្មោះបានបញ្ជាក់ថាគណបក្សត្រូវការបង្ហាញកម្លាំង។ ពួកគេថ្លែងថា៖ «យើងត្រូវតែដាក់សម្ពាធទៅលើគណបក្សប្រជាជនវិញ»។
ទោះយ៉ាងណាក្តីលោក យឹម សុវណ្ណ បានថ្លែងថាគណបក្សនឹងស្វែងរកការអនុញ្ញាត និងការការពារពីអាជ្ញាធរសម្រាប់សមាជិករបស់ខ្លួនដើម្បី «អនុវត្តសិទ្ធិរបស់ពួកគេ»។
នៅក្នុងបទសម្ភាសមួយជាមួយសារព័ត៌មាន Fresh News លោកនាយករដ្ឋមន្រ្តីបានបញ្ជាឲ្យរដ្ឋមន្រ្តីក្រសួងមហាផ្ទៃលោក ស ខេង និងកម្លាំងប្រដាប់អាវុធទាំងអស់ត្រៀមខ្លួនកម្ចាត់ «មហាបាតុកម្មខុសច្បាប់»។
ភ្លាមៗបន្ទាប់ពីវិលត្រឡប់មកពីប្រទេសចិនកាលពីម្សិលមិញលោក ហ៊ុន សែន ក៏បានសរសេរបង្ហោះនៅលើហ្វេសប៊ុករបស់លោកថា ពីរថ្ងៃជាប់គ្នារួចមកហើយដែលមេដឹកនាំបក្សប្រឆាំងបានគំរាមដល់ស្ថិរភាពជាតិតាមរយៈការរៀបចំធ្វើមហាបាតុកម្មដើម្បីទាមទាររបស់ដែលហៅថាដំណោះស្រាយនយោបាយ។
លោកនាយករដ្ឋមន្ត្រីបញ្ជាក់ថា៖ «ខ្ញុំសុំប្រាប់ទៅវិញថាទេ! មិនមានដំណោះស្រាយនយោបាយណាដែលអាចរកឃើញតាមរយៈបក្សនយោបាយនោះឡើយព្រោះវាជាសមត្ថកិច្ចរបស់តុលាការ។ បុគ្គលដែលធ្វើខុសកុំយកប្រទេសជាតិធ្វើជាចំណាប់ខ្មាំងកុំយកបក្សនយោបាយធ្វើជាជម្រកបិទបាំងនូវកំហុសរបស់ខ្លួន។ ខ្ញុំបញ្ជាដល់គ្រប់កម្លាំងមានសមត្ថកិច្ចត្រៀមខ្លួនកម្ចាត់ចោលនូវរាល់សកម្មភាពខុសច្បាប់ទាំងអស់ដើម្បីការពារនូវភាពសុខសាន្តរបស់ប្រជាជន។ ដោយតម្លៃណាក៏ដោយគឺត្រូវការពារស្ថិរភាពនយោបាយ សន្តិសុខសណ្តាប់ធ្នាប់សង្គមឱ្យខាងតែបានព្រោះវាជាតម្រូវការរបស់ជាតិ និងប្រជាជន»។
លោកក៏បានព្រមានខ្លាំងៗទៀតថាមេដឹកនាំបាតុកម្មកុំអាងលើសិទ្ធិបញ្ចេញមតិហើយភ្លេចគិតដល់សិទ្ធិរបស់អ្នកដទៃរាប់ទាំងសិទ្ធិរបស់រាជរដ្ឋាភិបាលផងដែរ។ «ឧទ្ទាមកម្មក្នុងទីក្រុងដើម្បីបិទបាំងជនដែលតុលាការកាត់ទោសមិនត្រូវបានអនុញ្ញាតទេ។ សុំអស់លោកលោកស្រីកុំញ៉ាម និងកុំអាងលើបាតុកម្ម។ វាយពស់ត្រូវវាយក្បាលមុន បើមិនជឿសុំសាកមើល»។
លោក ហ៊ុន សែន បញ្ជាក់ទៀតថា៖«នេះមិនមែនជាការគំរាមទេតែវាធ្ងន់ជាងគំរាមទៅទៀតព្រោះជាប្រភេទនៃបទបញ្ជាដល់កម្លាំងរបស់រាជរដ្ឋាភិបាលទាំងអស់ត្រៀមខ្លួនកម្ចាត់ចោលរាល់កម្លាំងដែលធ្វើសកម្មភាពបំផ្លាញសន្តិសុខជាតិហើយខ្ញុំមានសិទ្ឋិ និងនិយាយរបៀបនេះព្រោះវាជាសិទ្ធិអំណាចនាយករដ្ឋមន្ត្រី»។
តំណាងក្រសួងមហាផ្ទៃ និងតំណាងនគរបាលជាតិមិនអាចទាក់ទងសុំអធិប្បាយបានទេកាលពីល្ងាចម្សិលមិញ។
អ្នកនាំពាក្យក្រសួងការពារជាតិលោក ឈុំ សុជាតិ បានបញ្ជាក់ថាក្រសួងនឹងចាត់វិធានការ «ការពារសន្តិសុខសាធារណៈ» ប្រសិនបើទទួលបញ្ជាពីរដ្ឋាភិបាល។
កាលពីសប្តាហ៍មុន មុនពេលសវនាការជំនុំជម្រះករណីរបស់លោក កឹម សុខា កម្លាំងប្រដាប់អាវុធបានធ្វើការឆែកឆេរនៅតាមផ្លូវមួយចំនួនចូលក្នុងរាជធានីភ្នំពេញដើម្បីរារាំងមិនឲ្យអ្នកគាំទ្រគណបក្សសង្គ្រោះជាតិធ្វើដំណើរទៅកាន់គណបក្សនេះ។
ស្ថានទូតអង់គ្លេសប្រចាំកម្ពុជាកាលពីម្សិលមិញបានផ្តល់ការព្រមានដល់ពលរដ្ឋរបស់ខ្លួនដែលធ្វើដំណើរមកប្រទេសកម្ពុជាដោយកត់សម្គាល់ថាកម្ពុជាកំពុងមានភាពតានតឹងខាងនយោបាយ «ខ្លាំង»។
ការព្រមាននេះបន្តថា៖ «សូមចៀសពីការតវ៉ា និងបាតុកម្មទាំងអស់ព្រោះវាអាចក្លាយជាហិង្សា»៕ PS