ដោយ ម៉ម មុនីរតន៍ RFA 2016-09-17
ប្រធានស្ដីទីគណបក្សប្រឆាំងចោទប្រកាន់ថា គណបក្សប្រជាជនកម្ពុជា តែងប្រើល្បិចរាល់ពេលក្នុងការប្រកួតប្រជែងតាមផ្លូវនយោបាយជាមួយបក្សប្រឆាំង។ លោក កឹម សុខា ចាត់ទុកថា បក្សកាន់អំណាចតែងយកប្រៀបលើបក្សសង្គ្រោះជាតិ ដោយរំលោភគោលការណ៍ច្បាប់ជាដរាប បើទោះជាត្រូវរងភាពអាម៉ាស់បែបណាក៏ដោយ។ ប៉ុន្តែមន្ត្រីនាំពាក្យរបស់បក្សកាន់អំណាចវិញយល់ឃើញថា បញ្ហារបស់លោក កឹម សុខា នេះ គឺជាទំនាស់បុគ្គលសុទ្ធសាធ ពុំមែនជាវិវាទនយោបាយឡើយ។
មន្ត្រីជាន់ខ្ពស់គណបក្សដែលគ្រប់គ្រងរដ្ឋាភិបាល ប្រតិកម្មភ្លាមៗចំពោះការរិះគន់ពីប្រមុខដឹកនាំបក្សប្រឆាំងថា បក្សប្រជាជនកម្ពុជា ប្រើល្បិចកល និងមិនដែលបង្ហាញពីភាពស្មោះត្រង់ចំពោះការប្រកួតប្រជែងតាមផ្លូវនយោបាយម្ដងណានោះ។
ការឆ្លើយតបបែបនេះរបស់លោក សុខ ឥសាន បន្ទាប់ពីប្រធានស្ដីទីលោក កឹម សុខា ប្រាប់ទៅយុវជនបក្សប្រមាណ ៧០០នាក់ នៅទីស្នាក់ការកណ្ដាលសង្កាត់ចាក់អង្រែលើ កាលពីព្រឹកថ្ងៃទី១៧ ខែកញ្ញា។
ថ្លែងនៅចំពោះមុខយុវជន លោក កឹម សុខា ដែលធ្លាប់តែពួនសម្ងំនៅក្នុងទីស្នាក់ការអស់ពេលជាច្រើនខែមកហើយ ដើម្បីគេចចេញពីការតាមប្រមាញ់ដោយតុលាការនោះ បានចោទប្រកាន់គណបក្សដែលគ្របគ្រងរដ្ឋាភិបាលថា តែងធ្វើនយោបាយមិនស្មោះត្រង់ ជាពិសេសបក្សកាន់អំណាច ជាញឹកញាប់តែងអនុវត្តផ្ទុយពីច្បាប់ជានិច្ច។ ជាងនេះទៀត ប្រមុខដឹកនាំបក្សប្រឆាំងបានពេបជ្រាយឲ្យគណបក្សប្រជាជនកម្ពុជាថា តែងយកឈ្នះលើគូរប្រកួតដោយប្រើប្រាស់ឥទ្ធិពលនៃអំណាចតែរហូតមក ដូចជាប្រើប្រាស់តុលាការជាឧបករណ៍ដ៏មានប្រសិទ្ធភាពរបស់ខ្លួន និងជម្រើសបន្ទាប់គឺកម្លាំងយោធា៖ «ដើម្បីឲ្យការបោះឆ្នោតសេរី ត្រឹមត្រូវ និងយុត្តិធម៌ហើយបក្សពីរប្រកួតគ្នាដើម្បីឲ្យមានការផ្លាស់ប្ដូរហ្នឹងទៅជាកាត់ក្បាលបក្សមួយបាត់ ចងជើង ចងដៃបក្សមួយបាត់ ហៅថាការប្រកួតដោយស្មើភាពទេ? ហៅថាការបោះឆ្នោតដោយសេរី ត្រឹមត្រូវ និងយុត្តិធម៌បានទេ?។ កុំយកលេសថា រឿងតុលាការ ទៅជារឿងបុគ្គល តែកូនក្មេងក៏វាដឹងដែរ»។
ឆ្លើយតបការចោទប្រកាន់នេះ មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ប្រតិកម្មដោយចាត់ទុកថា រឿងអាស្រូវរបស់លោក កឹម សុខា វាពុំមែនជាទំនាស់ផ្នែកនយោបាយទេ។ ផ្ទុយទៅវិញ បញ្ហានេះគឺផ្ដើមចេញពីរឿងបុគ្គលលោក កឹម សុខា ផ្ទាល់។ម្យ៉ាងវិញទៀត គណបក្សប្រឆាំងតែងព្យាយាមទាញហេតុផលនេះ ថាជាទំនាស់ផ្លូវនយោបាយទៅវិញ។ ស្ថិតក្នុងអាការៈជំងឺផ្ដាសាយផង លោក សុខ ឥសាន បញ្ជាក់ថា រដ្ឋាភិបាលពុំដែលបានបិទសិទ្ធិសេរីភាពបក្សនយោបាយណាមួយតាមរយៈការប្រើប្រាស់តុលាការម្ដងណាឡើយ៖ «ឯកឧត្ដម កឹម សុខា គ្មានអ្នកណាទៅបញ្ចុះបញ្ចូលឲ្យទាក់ទងកញ្ញា ខុម ចាន់តារាទី វាជារឿងផ្ទាល់ខ្លួនរបស់គាត់ បានទទួលបណ្ដឹងពីកញ្ញា ខុម ចាន់តារាទី និងកញ្ញា ធី សុវណ្ណថា ផង។ វាស្របទៅតាមខ្លឹមសារនៃរដ្ឋធម្មនុញ្ញចែងថា ពេលណាប្រជាពលរដ្ឋកើតទុក្ខមិនសុខចិត្ត ស្ថាប័នរដ្ឋត្រូវតែយកចិត្តទុកដាក់ក្នុងការដោះស្រាយ»។
រដ្ឋធម្មនុញ្ញមាត្រា៥១ ថ្មីចែងថា ប្រទេសកម្ពុជា អនុវត្តនយោបាយប្រជាធិបតេយ្យ និងសេរីពហុបក្ស។ ប្រជាពលរដ្ឋខ្មែរគឺជាម្ចាស់វាសនានៃប្រទេសជាតិរបស់ខ្លួន។
ការបង្ហាញវត្តមានជាថ្មីរបស់ប្រធានស្ដីទីបក្សប្រឆាំងនេះ ស្របពេលប្រទេសចំនួន ៣៦ នៅក្រុមប្រឹក្សាសិទ្ធិមនុស្ស អង្គការសហប្រជាជាតិ បញ្ចេញប្រតិកម្ម និងថ្កោលទោសដោយចោទប្រកាន់កាលពីថ្ងៃទី១៤ ខែកញ្ញា ថា រដ្ឋាភិបាលកំពុងធ្វើឲ្យសិទ្ធិមនុស្សនៅកម្ពុជា ត្រូវដាំក្បាលចុះ។ លោក កឹម សុខា អះអាងថា ការពិតអ្វីដែលរដ្ឋាភិបាលតែងបង្ហាញពីភាពស្អាតស្អំថា អន្តរជាតិមិនអាចលូកដៃចូលកិច្ចការផ្ទៃក្នុងរបស់កម្ពុជា បាននោះ វាពុំមែនជាការពិតទេ។ ម្យ៉ាងទៀតបើផ្អែកឧបករណ៍ច្បាប់អន្តរជាតិ កម្ពុជាចៀសមិនផុតពីការអន្តរាគមន៍របស់សាកលលោកឡើយ ជាពិសេសប្រទេសដែលផ្ចុងផ្ដើមនាំឲ្យមានកិច្ចព្រមព្រៀងទីក្រុងប៉ារីស ស្ដីពីកម្ពុជា៖ «ចង់បញ្ជាក់ជូនហេតុអីបានបរទេសឈឺឆ្អាលរឿងខ្មែរហ្នឹង។ តើគេចង់លូកដៃចូលកិច្ចការផ្ទៃក្នុងយើង និងគេចង់រំលោភលើអធិបតេយ្យភាពយើង ឬយ៉ាងណា? មិនមែនទេបងប្អូន! ជាកាតព្វកិច្ចរបស់គេ ហើយក៏ជាកាតព្វកិច្ចរបស់រដ្ឋាភិបាលខ្មែរយើងផងដែរ»។
បដិសេធនឹងការលើកឡើងនេះ ត្រូវបានលោក សុខ ឥសាន ថ្លែងថា ច្បាប់ និងកាតព្វកិច្ចជាសាកលនេះនឹងពុំមានឥទ្ធិពលណាមួយ និងជាប់កាតព្វកិច្ចអ្វីទាល់តែសោះលើប្រទេសកម្ពុជា បានទេ ស្របពេលដែលកម្ពុជា មានអធិបតេយ្យភាព និងបូរណភាពពេញលេញរបស់ខ្លួនរួចទៅហើយ៖ «ខ្ញុំយល់ថា ប្រទេសកម្ពុជា ជាប្រទេសឯករាជ្យ មានអធិបតេយ្យ។ អ៊ីចឹងទេមិនមែនអន្តរជាតិចេះតែលូកបានទេ។ ដូចកិច្ចព្រមព្រៀងទីក្រុងប៉ារីស អ៊ីចឹងគេបាននិយាយហើយគឺថានៅពេលមានការឈ្លានពានធ្ងន់ធ្ងរដែលប៉ះពាល់ដល់ឯករាជភាព អធិបតេយ្យភាព ភាពមិនអាចបំបែកបាននៃព្រះរាជាណាចក្រកម្ពុជា គឺសហប្រធានហត្ថលេខីក្នុងចំណោមប្រទេសទាំង ១៨កោះជាបន្ទាន់»។
អ្នកវិភាគសង្គម និងនយោបាយ លោក មាស នី យល់ឃើញថា កម្ពុជានឹងនៅតែជាប្រទេសដែលដើរយឺតជាងគេទាំងនៅក្នុងតំបន់ និងពិភពលោក ប្រសិនបើមេដឹកនាំនៃប្រទេសដ៏ក្រីក្រមួយនេះ នៅតែធ្វើនយោបាយដើម្បីតែអំណាចតទៅមុខទៀត៕