ដោយ ឡេង ម៉ាលី RFA 2016-09-26
ស្ត្រីដែលមានទំនាស់ដីធ្លីនៅសហគមន៍បុរីកីឡា រាជធានីភ្នំពេញ ជិត ១០នាក់ នាំគ្នាបន្តធ្វើយុទ្ធនាការថ្ងៃច័ន្ទពណ៌ខ្មៅតាមគម្រោងរបស់ខ្លួន នៅថ្ងៃទី២៦ កញ្ញា នេះ។ គោលបំណងក្នុងការធ្វើយុទ្ធនាការថ្ងៃច័ន្ទពណ៌ខ្មៅរបស់ស្ត្រីទាំងនេះ គឺទាមទារឲ្យតុលាការដោះលែងមន្ត្រីសិទ្ធិមនុស្ស មន្ត្រី គ.ជ.ប និងទម្លាក់ចោលបទចោទប្រកាន់លើសកម្មជនបឹងកក់។
ការប្ដេជ្ញាធ្វើយុទ្ធនាការថ្ងៃច័ន្ទពណ៌ខ្មៅរបស់ស្ត្រីនៅសហគមន៍បុរីកីឡា បានប្រព្រឹត្តទៅមួយរយៈពេលខ្លីនៅព្រឹកថ្ងៃទី២៦ កញ្ញា មុននឹងអាជ្ញាធរដាក់កម្លាំងដកហូតសម្ភារៈធ្វើយុទ្ធនាការរបស់ពួកគាត់។
តំណាងសហគមន៍បុរីកីឡាមួយរូប ដែលធ្វើយុទ្ធនាការនេះ លោកស្រី ង៉ូវ ណារី បានហៅការរារាំងរបស់អាជ្ញាធរថាជាការបំបិទសិទ្ធិសេរីភាពរបស់ពួកគាត់។ លោកស្រីថ្លែងថា ការធ្វើយុទ្ធនាការថ្ងៃច័ន្ទពណ៌ខ្មៅដោយការស្លៀកពាក់ខ្មៅនេះ គ្រាន់តែជាការតស៊ូមតិប៉ុណ្ណោះ គឺមិនមែនជាការធ្វើបដិវត្តន៍ពណ៌ទេ។ បញ្ហាជម្លោះដីធ្លីនៅសហគមន៍បុរីកីឡា ជាជម្លោះមួយដែលបានអូសបន្លាយជាច្រើនឆ្នាំមកហើយ។
នៅថ្ងៃដដែលនេះ មជ្ឈមណ្ឌលសិទ្ធិមនុស្សកម្ពុជា ក៏ចេញរបាយការណ៍មួយស្ដីពីរបកគំហើញរបស់ខ្លួនចំពោះស្ត្រីក្នុងជម្លោះដីធ្លីចំនួន ៣៤សហគមន៍នៅកម្ពុជា។ របាយការណ៍នេះបង្ហាញថា ជម្លោះដីធ្លីធ្វើឲ្យមានសម្ពាធធ្ងន់ធ្ងរលើស្ត្រី ទាំងការធ្លាក់ចុះសេដ្ឋកិច្ច អំពើហិង្សាក្នុងគ្រួសារ និងការធ្លាក់ចុះសុខភាពផ្លូវចិត្ត។
សូមរង់ចាំស្ដាប់ព័ត៌មានពិស្ដារនៅក្នុងកម្មវិធីផ្សាយយប់នេះ!