 |
| លោក ទៀ បាញ់ រដ្ឋមន្ត្រីក្រសួងការពារជាតិកម្ពុជា រូប៖ ហ្វេសប៊ុក General Tea Banh |
ដោយ អូន ភាព RFA 2020-04-24
មន្ត្រីយោធាជាន់ខ្ពស់ថា កម្ពុជាមានគម្រោងទិញយន្តហោះចម្បាំងពីប្រទេសចិន ដើម្បីពង្រឹងសន្តិសុខក្នុងប្រទេស។ រដ្ឋមន្ត្រីក្រសួងការពារជាតិលោក ទៀ បាញ់ ប្រាប់អាស៊ីសេរី កាលពីថ្ងៃព្រហស្បតិ៍ទី២៣ ខែមេសាថា កម្ពុជាពិតជាមានគម្រោងទិញយន្តហោះចម្បាំងម៉ាក (FTC-2000G) ពីប្រទេសចិនមែន ប៉ុន្តែរដ្ឋាភិបាលមិនទាន់មានសមត្ថភាពទិញក្នុងពេលបច្ចុប្បន្ននេះនៅឡើយទេ។
លោកថា កម្ពុជាអាចនឹងទិញនៅប៉ុន្មានឆ្នាំខាងមុខទៀត នៅពេលរដ្ឋាភិបាលមានលទ្ធភាព។ លោក ទៀ បាញ់ មានប្រសាសន៍បែបនេះ បន្ទាប់ពីប្រទេសចិនបានប្រកាស កាលពីថ្ងៃ១៩ មេសា ថា ចិនរកបានអតិថិជនមួយ ជាប្រទេសមួយ ក្នុងតំបន់អាស៊ីអាគ្នេយ៍ ដែលចង់ទិញ យន្ដហោះ ចម្បាំងប្រភេទ FTC-2000G ក្រោយពីយន្តហោះនេះ បានផលិតពីរឆ្នាំរួចមក។ នេះបើតាមការផ្សាយរបស់គេហទំព័រ ឈ្មោះ Defense World ( https://www.defenseworld.net/about) កាលពីថ្ងៃទី២០ មេសា។
កាលពីខែវិច្ឆិកា ឆ្នាំ២០១៣ ប្រទេសកម្ពុជាបានទិញឧទ្ធម្ភាគចក្រចំនួន ១២គ្រឿង ប្រភេទ Zhi-9 (Z-9) ពីប្រទេសចិន។ ចិនឱ្យកម្ពុជាខ្ចី ថវិកាជិត ២រយលានដុល្លារ សម្រាប់ទិញ យន្តហោះទាំង ១២គ្រឿងនោះ៕
