ដោយ ហង្ស សាវយុត RFA 2016-10-02
ឃុំត្រពាំងធំ នៃស្រុកប្រាសាទបាគង ដែលស្ថិតនៅចម្ងាយជាង ២៥គីឡូម៉ែត្រភាគខាងកើតពីទីរួមខេត្តសៀមរាប គឺមានប្រជាពលរដ្ឋចាកចោលផ្ទះសម្បែងទៅរកការងារធ្វើនៅប្រទេសថៃ ជាច្រើនរយនាក់ក្នុងពេលបច្ចុប្បន្ន។ ចាប់តាំងតែពីថ្ងៃទី១ ខែកញ្ញា ជាពេលដែលគណៈកម្មាធិការជាតិរៀបចំការបោះឆ្នោត (គ.ជ.ប) បានដំណើរការចុះឈ្មោះអ្នកបោះឆ្នោតទៅក្នុងបញ្ជីថ្មីមក គេមិនទាន់ឃើញពលរដ្ឋភាគច្រើនដែលចេញទៅធ្វើការនៅប្រទេសថៃ ទាំងនោះ វិលត្រឡប់មកចុះឈ្មោះបោះឆ្នោតនៅឡើយទេ។
មន្ត្រីក្រុមប្រឹក្សាឃុំត្រពាំងធំ នៃស្រុកប្រាសាទបាគង ព្រួយបារម្ភថា ពលរដ្ឋរបស់ឃុំនេះដែលចំណាកស្រុកទៅធ្វើការនៅឯប្រទេសថៃ ច្រើនរយនាក់ អាចនឹងបាត់សិទ្ធិបោះឆ្នោតសម្រាប់ពេលខាងមុខ។ ការព្រួយបារម្ភនេះ បានកើតឡើងបន្ទាប់ពីគណៈកម្មាធិការជាតិរៀបចំការបោះឆ្នោត បានឲ្យក្រុមចុះឈ្មោះបោះឆ្នោតទៅក្នុងបញ្ជីថ្មី ចាប់ដំណើរការរយៈពេល ៣២ថ្ងៃមកហើយគិតមកដល់ថ្ងៃអាទិត្យ ទី២ ខែតុលា ក៏ប៉ុន្តែគេនៅមិនឃើញពលករចំណាកស្រុកទាំងនោះវិលមកចុះឈ្មោះបោះឆ្នោតនៅឡើយ។
ជំទប់ទី២ ឃុំត្រពាំងធំ គឺលោក សយ សីហា។ លោកមានប្រសាសន៍នៅព្រឹកថ្ងៃអាទិត្យ ទី២ ខែតុលា ថា លោកបានសង្កេតមើលជាច្រើនថ្ងៃតាំងពីថ្ងៃបុណ្យភ្ជុំបិណ្ឌរហូតមកដល់ពេលនេះ មិនទាន់ឃើញប្រជាពលរដ្ឋដែលទៅធ្វើការនៅឯប្រទេសថៃ ណាម្នាក់បានវិលត្រឡប់មកជួបជុំគ្រួសារ និងមកចុះឈ្មោះបោះឆ្នោតទៅក្នុងបញ្ជីថ្មីនៅឡើយទេ។
លោក សយ សីហា បញ្ជាក់ថា នៅព្រឹកថ្ងៃអាទិត្យ ទី២ ខែតុលា បន្ទាប់ពីពិធីបុណ្យភ្ជុំបិណ្ឌបានកន្លងផុតទៅ ១ថ្ងៃហើយ គឺលោកបានអង្គុយនៅកន្លែងចុះឈ្មោះអ្នកបោះឆ្នោត ក៏ប៉ុន្តែវាមានស្ថានភាពស្ងាត់ជ្រងំ ដោយសារតែមិនមានពលរដ្ឋទៅចុះឈ្មោះបោះឆ្នោត៖ «ចំណាកស្រុកអត់មានមកសោះ នៅតាមវត្តអារាមអី ក៏មិនឃើញទៅធ្វើបុណ្យ ហើយការចុះឈ្មោះបោះឆ្នោតទៀតសោត ប្រហែលជាអត់ទេមើលទៅ»។
អាជ្ញាធរឃុំត្រពាំងធំ ឲ្យដឹងថា ពេលបច្ចុប្បន្ននៅទូទាំងឃុំនេះ មានពលរដ្ឋប្រហែល ២០០នាក់បានធ្វើចំណាកស្រុកទៅធ្វើការនៅឯប្រទេសថៃ។
ស្ត្រីឈ្មោះ តូច នាន នៅភូមិស្វាយជ័យ ឲ្យដឹងថា កូនប្រុសរបស់គាត់ម្នាក់ និងកូនស្រី ២នាក់បានទៅធ្វើការនៅឯប្រទេសថៃ រយៈពេល ៣ឆ្នាំហើយ។ មុនពេលភ្ជុំបិណ្ឌ កូនស្រីរបស់គាត់ម្នាក់បានមកយកចៅតូចម្នាក់ពីគាត់ទៅនៅប្រទេសថៃ ដែរ។
ស្ត្រីដដែលបញ្ជាក់ថា គាត់បានទូរស័ព្ទប្រាប់ទៅកូនៗដែលកំពុងធ្វើការនៅឯប្រទេសថៃ ឲ្យឆ្លៀតពេលមកចុះឈ្មោះបោះឆ្នោតនៅក្នុងបញ្ជីថ្មី ក៏ប៉ុន្តែពួកគេហាក់មិនសូវចាប់អារម្មណ៍ទេ៖ «ពួកគេមិនបានមកទេ ពីព្រោះនៅមុនបិណ្ឌគេមកម្ដងហើយ។ ខ្ញុំបានហៅគេឲ្យមកចុះឈ្មោះបោះឆ្នោតដែរ ប៉ុន្តែគេថាគ្មានប្រាក់ថ្លៃធ្វើដំណើរទេ»។
ប្រជាពលរដ្ឋខ្លះទាំងអ្នកដែលកំពុងធ្វើការនៅប្រទេសថៃ និងអ្នកដែលកំពុងរស់នៅក្នុងស្រុក ហាក់ដូចជាជិនណាយចំពោះការបោះឆ្នោតជ្រើសរើសអ្នកដឹកនាំនៅពេលខាងមុខ។ ពួកគេនិយាយថា រយៈពេល ៥អាណត្តិមកហើយដែលពួកគេបានទៅបោះឆ្នោត ដើម្បីជ្រើសរើសអ្នកដឹកនាំរដ្ឋាភិបាលឲ្យបានល្អ ក៏ប៉ុន្តែផ្ទុយទៅវិញ វាហាក់ដូចជាមិនមានអ្វីផ្លាស់ប្ដូរ និងជួយដល់ជីវភាពរបស់ពួកគេឲ្យប្រសើរសោះ ដូចជាពួកគេក្រីក្រ គឺនៅតែក្រីក្រ ព្រមទាំងគ្មានការងារធ្វើនៅក្នុងស្រុក ជាហេតុបង្ខំឲ្យពួកគេត្រូវចាកចោលផ្ទះសម្បែង និងក្រុមគ្រួសារទៅរកការងារធ្វើនៅឯប្រទេសថៃ ម៉ាឡេស៊ី និងប្រទេសកូរ៉េ ជាដើម៕