មាស សុខជា ភ្នំពេញ ប៉ុស្តិ៍ Tue, 11 October 2016
បន្ទាយមានជ័យៈ ពលករខ្មែរជាង ៣០០ នាក់ដែលមកពីប្រទេសថៃត្រូវបានរារាំងមិនឲ្យចុះឈ្មោះបោះឆ្នោតនៅសង្កាត់ប៉ោយប៉ែតពីថ្ងៃអាទិត្យដោយអាជ្ញាធរលើកហេតុផលថាពួកគាត់ទាំងនោះមិនមានឯកសារបញ្ជាក់គ្រប់គ្រាន់។
លោក មាន សារិទ្ធ ប្រធានប្រតិបត្តិគណបក្សសង្គ្រោះជាតិនៅក្រុងប៉ោយប៉ែតបានឲ្យដឹងថាពលករទាំងនោះបានឆ្លងដែនមកពីប្រទេសថៃកាលពីថ្ងៃអាទិត្យប៉ុន្តែពួកគាត់មិនអាចចុះឈ្មោះបោះឆ្នោតបានទេនៅតាមការិយាល័យមួយចំនួនដោយសាតែពួកគាត់មិនមែនជាអ្នកដែលរស់នៅក្នុងខេត្តនេះហើយមិនមានសាក្សីធានាដើម្បីបញ្ជាក់ថាពួកគាត់មានលំនៅឋាននៅក្នុងក្រុងនេះ។
លោកបានថ្លែងថា៖ «អាជ្ញាធរបាននិយាយថាគាត់អាចចុះឈ្មោះបានលុះត្រាតែពួកគាត់រស់នៅក្នុងក្រុងប៉ោយប៉ែតតែបើរស់នៅក្នុងខេត្តផ្សេងនោះមិនអាច [ចុះឈ្មោះ] បានទេ»។ លោកបានបន្ថែមថាពលករប្រហែល ៦០ នាក់ត្រូវបានអនុញ្ញាតឱ្យចុះឈ្មោះបោះឆ្នោតបន្ទាប់ពីអាជ្ញាធរបានកំណត់ថាពួកគាត់ជាអ្នកដែលរស់នៅក្នុងក្រុងប៉ោយប៉ែត។
ជំទប់ឃុំប៉ោយប៉ែត និងឃុំផ្សារកណ្តាលលោកចៅ វាសនា និងលោក ឃុន ចន្ធី បានថ្លែងថាពលករ ៥០ នាក់មិនបានចុះឈ្មោះបោះឆ្នោតទេព្រោះថាពលករទាំងនោះមិនមានលក្ខណៈវិនិច្ឆ័យគ្រប់គ្រាន់ក្នុងការចុះឈ្មោះនៅក្នុងទីក្រុងនេះ។
ប៉ុន្តែទោះយ៉ាងណាអភិបាលក្រុងប៉ោយប៉ែតលោក ង៉ោ ម៉េងជ្រួន បានបដិសេធពីចំនួនដែលពលករប៉ុនប៉ងចុះឈ្មោះនោះដោយលោកថ្លែងថាមានមិនលើលពី ១០ នាក់នោះទេ។
លោក ជ្រួន បានបញ្ជាក់ថា៖ «នេះគឺជាការបំផ្លើស។ យើងមិនចុះឈ្មោះឲ្យពួកគាត់ដោយសារតែពួកគាត់មិនមានឯកសារគ្រប់គ្រាន់»។
អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា បានថ្លែងថា គជប ពុំមានការផ្តល់ជាពិសេសដល់ពលករចំណាកស្រុកឲ្យអាចចុះឈ្មោះនៅតាមព្រំដែនបានទេបើពួកគាត់មិនមានភ័ស្តុតាងបញ្ជាក់លំនៅឋានច្បាស់លាស់។
នៅក្នុងរយៈពេលនៃការចុះឈ្មោះបោះឆ្នោតនេះគណៈកម្មាធិការជាតិរៀបចំការបោះឆ្នោតបានបញ្ជាក់ច្បាស់ហើយថាអ្នកដែលមានសិទ្ធិបោះឆ្នោតត្រូវតែទៅចុះឈ្មោះនៅក្នុង ឃុំ-សង្កាត់ ដែលមាននៅលើអត្តសញ្ញាណប័ណ្ណសញ្ជាតិខ្មែរ ឬនៅក្បែរកន្លែងធ្វើការរបស់ខ្លួនប្រសិនបើពួកគេមានសាក្សីដើម្បីបញ្ជាក់ពីលំនៅឋានរបស់ពួកគេ។ គជប ក៏បានទម្លាក់ចោលការទាមទាររបស់គណបក្សប្រឆាំងដែលស្នើសុំឲ្យបង្កើតការិយាល័យចុះឈ្មោះសម្រាប់ពលករចំណាកស្រុកនៅក្នុងប្រទេសថៃផងដែរ។
លោក ពុទ្ធា ថ្លែងថា៖ «នេះគឺជាច្បាប់។ មិនថាវាត្រឹមត្រូវ ឬមួយក៏អត់នោះទេសូមឲ្យភាគី [នយោបាយ] ទាំងពីរដោះស្រាយវាដោយសារតែពួកគេជាអ្នកបង្កើតច្បាប់»។
លោកបន្ថែមថា ប្រសិនបើពលករស្នាក់នៅក្នុងកន្លែងមួយសូម្បីតែមួយថ្ងៃដើម្បីឲ្យអាជ្ញាធរមូលដ្ឋានបញ្ជាក់កន្លែងស្នាក់នៅរបស់ពួកគេហើយមន្ត្រីខេត្ត និងឃុំត្រូវបានណែនាំឱ្យចុះឈ្មោះឲ្យពួកគេក៏ពួកគេអាចចុះឈ្មោះបានដែរ។
លោក មឿន តុលា ប្រធានអង្គការសិទ្ធិកម្មករកណ្តាលបានថ្លែងថាវាមិនយុត្តិធម៌នោះទេដែលរំពឹងឲ្យពលករទាំងនោះធ្វើដំណើរត្រឡប់ទៅស្រុកកំណើតរបស់ពួកគេដើម្បីចុះឈ្មោះព្រោះធនធាន និងពេលវេលារបស់ពួកគាត់មានកំណត់។
លោកបញ្ជាក់ថា៖ «រដ្ឋាភិបាលអាចបង្កើតការិយាល័យចុះឈ្មោះចល័តចំនួន ២៥ សម្រាប់ខេត្តនីមួយៗ និងអនុញ្ញាតឱ្យពលករចំណាកស្រុកអាចឆ្លងព្រំដែនចូលមកចុះឈ្មោះនៅតាមការិយាល័យណាមួយដែលសមស្របសម្រាប់ពួកគាត់»។
លោកបន្តថាតាមមើលទៅរដ្ឋាភិបាលហាក់ដូចជាមានឆន្ទៈនយោបាយតិចតួចដើម្បីជួយដល់ពលករចំណាកស្រុកទាំងនោះ៕ NS
រាយការណ៍បន្ថែមដោយ ANANTH BALIGA