មន្ត្រីសិទ្ធិមនុស្សដែលត្រូវក្រុមសន្តិសុខខណ្ឌវ៉ៃ ដាក់ពាក្យប្តឹង
ទូច សុខា ភ្នំពេញ ប៉ុស្តិ៍ Tue, 11 October 2016
ភ្នំពេញៈ លោក អំ សំអាត មន្ត្រីជាន់ខ្ពស់អង្គការសិទ្ធិមនុស្សលីកាដូបានដាក់ពាក្យប្តឹងក្រុមសន្តិសុខខណ្ឌដូនពេញដែលបានវាយលោកឲ្យរងរបួសនៅក្នុងការប៉ះទង្គិចគ្នាមួយរវាងក្រុមសន្តិសុខ និងប្រជាពលរដ្ឋដែលរងគ្រោះដោយសារបញ្ហាដីធ្លីប្រមាណ ៣០០ នាក់នៅក្នុងទិវាសិទ្ធិលំនៅឋានពិភពលោកដែលបានប្រារព្ធធ្វើឡើងទាំងកណ្តាលភ្លៀងកាលពីព្រឹកម្សិលមិញ។
កាលពីម្សិលមិញគឺជាខួបទី ៣១ នៃទិវាសិទ្ធិលំនៅឋានពិភពលោកហើយប្រជាពលរដ្ឋដែលរងផលប៉ះពាល់ពីការបណ្តេញចេញពីលំនៅឋានក្រោមហេតុផលអភិវឌ្ឍរបស់រដ្ឋាភិបាលចំនួន ៩៩ សហគមន៍មកពីទូទាំងប្រទេសប្រហែលជា ៣០០ នាក់បានចូលរួមក្នុងទិវានេះ។
ក្បួនដង្ហែបានធ្វើឡើងនៅពេលព្រឹកក្រោមតំណក់ទឹកភ្លៀងដោយចាប់ផ្តើមចេញពីម្តុំសាលមហោស្រពចតុមុខតាមវិថីព្រះស៊ីសុវត្ថិ។ ដំបូងឡើយក្បួនដង្ហែមានសន្តិសុខខណ្ឌដូនពេញជួយសម្រួលចរាចរណ៍ដោយថាហែទៅកាន់ទីលានប្រជាធិបតេយ្យ។ ប៉ុន្តែពេលទៅដល់សួនច្បារព្រះគម្លង់មុខវត្តឧណ្ណាលោម ក្បួនក៏បានបែរទិសដៅហែឡើងមកតាមផ្លូវព្រះសុធារសវិញក្នុងបំណងយកញត្តិទៅកាន់ក្រសួងរៀបចំដែនដី។
នៅពេលក្បួនហែបានបន្តិចដល់កែងផ្លូវលេខ ១៧៨ ត្រូវកម្លាំងសន្តិសុខខណ្ឌដូនពេញបង្វែរទិសដៅឲ្យទៅតាមផ្លូវ ១៧៨ វិញ។
ក្បួនបានបន្តដំណើរទៅមុខទៅដល់ចំណុចផ្លូវកែងរវាងផ្លូវលេខ ១៩ និង ១៧៨ ក្រុមសន្តិសុខខណ្ឌដែលបានរង់ចាំស្រាប់បានចូលរឹបអូសស្គរឆៃយ៉ាំពីក្រុមហែក្បួន និងនាំឲ្យមានអំពើហិង្សាកើតឡើង។
អ្នកសារព័ត៌មាន Freeland ម្នាក់គឺលោក សារឹម សារុន រងរបួសក្បាលចំណែកអ្នកចូលរួមហែក្បួនមួយចំនួនរួមនឹងលោក អំ សំអាត មន្ត្រីជាន់ខ្ពស់អង្គការលីកាដូរងរបួសស្រាល។
អតីតស្រ្តីបឹងកក់អ្នកស្រី សាត ផា ដែលបានចូលរួមដង្ហែក្បួននេះបានថ្លែងថាអ្នកស្រីត្រូវកងសន្តិសុខវាយចំមាត់ និងស្មាខណៈអ្នកស្រីបានព្យាយាមចូលជួយអ្នកបឹងកក់ម្នាក់ទៀតដែលត្រូវសន្តិសុខវាយ។ អ្នកស្រីចាត់ទុកទង្វើរបស់សន្តិសុខនេះថាជាការខ្វះចន្លោះរបស់រដ្ឋាភិបាលក្នុងការគាំពារប្រជាពលរដ្ឋពីការរំលោភបំពានសិទ្ធិសេរីភាព។
អ្នកស្រីបន្ថែមថា៖ «អម្បាញ់មិញហ្នឹងវាដាក់កម្លាំងមកហ្នឹងវាយយកៗវាមកវ៉ៃយើងតែម្តងអត់មាននិយាយអ្វីទេ...រដ្ឋាភិបាលអត់ដែលគិតពីផលប្រយោជន៍ពលរដ្ឋខ្លួនឯងផង គិតតែផលប្រយោជន៍ខ្លួនគាត់...ពលរដ្ឋវេទនារងគ្រោះមកទាមទារយុត្តិធម៌គាត់ធ្វើបាបអ៊ីចឹងគាត់គិតម៉េចវិញ»។
ចំណែកឯពលរដ្ឋរងគ្រោះដោយជម្លោះដីធ្លីម្នាក់ទៀតគឺលោក ស្ងួន ញឿន មកពីភូមិឡពាង ខេត្តកំពង់ឆ្នាំងដែលស្ថិតក្នុងហេតុការប៉ះទង្គិចគ្នានោះដែរបានថ្លែងថាសកម្មភាពរបស់សន្តិសុខខណ្ឌនេះជាទង្វើរំលោភលើសិទ្ធិប្រជាពលរដ្ឋដោយថាពួកគាត់គ្រាន់តែចង់បានសិទ្ធិមានលំនៅឋាន និងការរស់នៅដោយគ្មានការបណ្តេញចេញប៉ុណ្ណោះ។ «ទង្វើនេះធ្វើខុសច្បាប់ទាំងស្រុងព្រោះប្រជាពលរដ្ឋធ្វើការហែក្បួនដើម្បីសិទ្ធិរំឭកខួបបាត់បង់ដីធ្លីរបស់យើងតែត្រូវអាជ្ញាធរវាយពួកយើងយ៉ាងចាស់ដៃ ពលរដ្ឋដៃទទេសោះតែអាជ្ញាធរវាយពួកយើងសុទ្ធតែអាយកូមអាជ្ញាធរធ្វើខុសច្បាប់ទាំងស្រុង»។
ចំណែកអ្នកឃ្លាំមើលសិទ្ធិមនុស្សអង្គការលីកាដូលោក អំ សំអាត ដែលបានតាមឃ្លាំមើលការដង្ហែក្បួននេះ និងជាអ្នកត្រូវគេវាយដែរនោះបានថ្លែងថាលោកត្រូវសន្តិសុខវាយត្រូវត្រង់ផ្ទៃមុខដែលខណៈលោកបានព្យាយាមរារាំងកុំឲ្យមានអំពើហិង្សាកើតឡើង។
លោកថា ទង្វើនេះជាចេតនារបស់ក្រុមសន្តិសុខដែលចង់វាយលោកតែម្តងពីព្រោះលោកបានពាក់អាវអង្គការសិទ្ធិមនុស្សដោយមានអក្សររំលេចយ៉ាងច្បាស់។ លោកចាត់ទុកទង្វើរបស់ក្រុមសន្តិសុខនេះថាបានធ្វើឲ្យបាក់មុខរដ្ឋាភិបាលស្របពេលដែលអ្នករាយការណ៍ពិសេសអង្គការសហប្រជាជាតិលោកស្រី រ៉ូណា ស្មីត កំពុងបំពេញទស្សនកិច្ចនៅកម្ពុជា។
លោកបន្ថែមថា៖ «រឿងនេះខ្ញុំគិតថាមិនមែនជាការបញ្ជាពីឯកឧត្តមអភិបាលខណ្ឌ ឬអភិបាលក្រុងទេតែសន្តិសុខប៉ុន្មាននាក់ហ្នឹងដែលជាអ្នកបង្កហើយជាចេតនាចង់បំបាក់មុខថ្នាក់ដឹកនាំក្រុងក៏ដូចសម្តេចប្រមុខថ្នាក់ដឹកនាំទៅវិញ»។
ក្រោយមានអំពើហិង្សាលើរូបលោកនេះ លោក អំ សំអាត បានដាក់ពាក្យបណ្តឹងនៅប៉ុស្តិ៍នគរបាលជ័យជំនះក្នុងខណ្ឌដូនពេញ ដើម្បីឲ្យសមត្ថកិច្ចមានវិធានការផ្លូវច្បាប់លើសន្តិសុខដែលបានវាយរូបលោក។
ក្រោយមានអំពើហិង្សាកើតឡើងក្រុមប្រជាពលរដ្ឋបានបំបែកគ្នាដើរទៅកាន់ទីលានប្រជាធិបតេយ្យដោយមិនមានការរំខានពីកងសន្តិសុខទៀតឡើយ។ ពលរដ្ឋមានជម្លោះដីធ្លីទាំងនោះបានជួបជុំគ្នានៅទីលានប្រជាធិបតេយ្យបន្តទៀតដោយបន្តស្រែកទាមទារឲ្យរដ្ឋាភិបាលជាពិសេសក្រសួងរៀបចំដែនដីការពារសេចក្តីថ្លៃថ្នូរបស់ពួកគាត់ក្នុងនាមជាជនរងគ្រោះពីជម្លោះដីធ្លី និងថាឲ្យពួកគាត់ទទួលបានការអភិវឌ្ឍនៅនឹងកន្លែង។
នៅម៉ោងប្រហែលជា ១១ និង ៣០ នាទីថ្ងៃត្រង់តំណាងមកពីក្រសួងរៀបចំដែនដីគឺលោក ហ៊ឺ ចិន្តា ដែលជាអគ្គលេខាធិការរងនៃគណ:កម្មាធិការជាតិនគរូបនីយកម្មនៃក្រសួងរៀបចំដែនដីបានមកទទួលញត្តិពីប្រជាពលរដ្ឋទាំងនោះនៅទីលានប្រជាធិបតេយ្យ។
លោក ចិន្តា ថ្លែងទៅកាន់ប្រជាពលរដ្ឋទាំងនោះថា ក្រសួងបានព្យាយាមដោះស្រាយជម្លោះដីធ្លីជាបន្តបន្ទាប់។
ទោះយ៉ាងណា លោកថា ក្រសួងមិនអាចដោះស្រាយបានទាន់ពេលវេលាតាមចិត្តចង់របស់ប្រជាពលរដ្ឋនោះទេ។ «ខ្ញុំទទួលញត្តិនេះដើម្បី(ដាក់) ជូនដល់ថា្នក់ដឹកនាំដើម្បីពិចារណាដោះស្រាយ (បញ្ហា) ជូនប្រជាពលរដ្ឋបន្តទៀត...ដូច្នេះសូមបងប្អូនជឿជាក់លើរដ្ឋាភិបាលពិសេសក្រសួងរៀបចំដែនដី...បងប្អូនប្រជាពលរដ្ឋធ្វើចិត្តឲ្យបានល្អបើកាលណាយើងគិតអាក្រក់យល់សប្តិអាក្រក់ហើយ»។
នាយកលេខាធិការដ្ឋានក្រុមការងារពិសេសសិទ្ធិលំនៅឋានលោក សៀ ភារម្យ សង្កេតឃើញថាការអភិវឌ្ឍនៅកម្ពុជាសព្វថ្ងៃមិនមានតម្លាភាព និងមិនមានការទទួលខុសត្រូវនោះទេទើបបញ្ហាជម្លោះដីធ្លីកើតមានដូចជាជំងឺ «មហារីក»។
លោកថា សព្វថ្ងៃក្រសួងរៀបចំដែនដីមានការប្តេជ្ញាចិត្តខ្ពស់ក្នុងការដោះស្រាយជម្លោះដីធ្លីនេះ ប៉ុន្តែការដោះស្រាយនៅមានភាពយឺតយ៉ាវនៅឡើយ៕