លោក សម រង្ស៊ី បញ្ជាក់ថាបើយួននៅកម្ពុជាបោះឆ្នោតឲ្យគណបក្សកាន់អំណាចក៏មិនអាចឈ្នះគណបក្សសង្គ្រោះជាតិបានដែរ
ប្រភព សារព័ត៌មានមនសិការខ្មែរ The Khmer Conscience
ថ្ងៃទី០៨ ខែតុលា ២០១៦
នៅក្នុងដំណើរការបោះឆ្នោតនៅឆ្នាំ២០១៧ និងឆ្នាំ២០១៨ ខាងមុខនេះ បើទោះជាប្រជាពលរដ្ឋយួនទាំងអស់ដែលចូលមករស់នៅក្នុងប្រទេសកម្ពុជាបោះឆ្នោតឲ្យគណបក្សប្រជាជនកម្ពុជា ជាគណបក្សកាន់អំណាចក៏ដោយ ក៏មិនអាចឈ្នះគណបក្សសង្គ្រោះជាតិបានដែរ ព្រោះប្រជាពលរដ្ឋខ្មែរដែលបោះឆ្នោតឲ្យគណបក្សសង្គ្រោះជាតិមានចំនួនច្រើនជាងប្រជាពលរដ្ឋយួនឆ្ងាយណាស់ នេះជាការរំពឹងទុករបស់លោក សម រង្ស៊ី ប្រធានគណបក្សសង្គ្រោះជាតិ ហើយលោកជឿថា គណបក្សសង្គ្រោះជាតិនឹងទទួលបានជោគជ័យមិនខាន។
ប្រធានគណបក្សសង្គ្រោះជាតិ លោក សម រង្ស៊ី ថ្មីៗនេះបានសម្តែងការសោកស្តាយថាមិនគួរណារដ្ឋាភិបាលគណបក្សប្រជាជនកម្ពុជាដែលបានដឹកនាំប្រទេសកម្ពុជាជិត ៤០ឆ្នាំមកនេះ បណ្តែតបណ្តោយឲ្យជនជាតិយួនហូរចូលមករស់នៅក្នុងកម្ពុជាមានចំនួនកាន់តែច្រើនឡើងៗដែលធ្វើឲ្យប៉ះពាល់ដល់ផលប្រយោជន៍ប្រជាពលរដ្ឋកម្ពុជា និងប្រទេសកម្ពុជា ពិសេសអធិបតេយ្យភាពកម្ពុជា ដែលជាអាយុជីវិតជាតិ។ លោក សម រង្ស៊ី បានបញ្ជាក់ថា ប្រវត្តិសាស្ត្របានបង្ហាញថា វៀតណាមបានធ្វើឲ្យកម្ពុជាបាត់បង់ទឹកដី បែកបាក់ជាតិ និងមានសង្គ្រាមនៅកម្ពុជា ហើយបច្ចុប្បន្នពលរដ្ឋយួនរាប់សែននាក់កំពុងរស់នៅប្រទេសកម្ពុជា ខណៈពួកគេមានសិទ្ធិសេរីភាពដូចប្រជាពលរដ្ឋកម្ពុជា ពិសេសសិទ្ធិបោះឆ្នោតរើសមេដឹកនាំ។
លោក សម រង្ស៊ី បានពន្យល់ថា អ្នកបោះឆ្នោតតែងតែបោះឆ្នោតឲ្យគណបក្សណាដែលបម្រើផលប្រយោជន៍របស់ពួកគេដូចនេះជនជាតិយួនអាចនឹងបោះឆ្នោតឲ្យគណបក្សប្រជាជនកម្ពុជាដែលជាគណបក្សកាន់អំណាច ព្រោះគណបក្សមួយនេះមិនហ៊ានប៉ះពាល់ដល់ផលប្រយោជន៍យួនឡើយ ហើយក៏មិនបានបម្រើផលប្រយោជន៍ខ្មែរឲ្យបានពេញលេញផងដែរ។ លោក សម រង្ស៊ី បានសង្កត់ធ្ងន់ថា គណបក្សសង្គ្រោះជាតិ ជាគណបក្សជំទាស់គ្មានគោលនយោបាយរើសអើងជាតិសាសន៍ ឬជ្រុលនិយមឡើយ តែយើងចាំបាច់ត្រូវការពារផលប្រយោជន៍ខ្មែរ ហើយវាជាការគួរឲ្យបារម្ភខ្លាំងណាស់នៅពេលដែលបរទេសជិតខាងកម្ពុជាធ្លាប់ឈ្លានពានកម្ពុជាអាចបន្លំធ្វើជាខ្មែរ ហើយមានសិទ្ធិសម្រេចជោគវាសនាប្រទេសកម្ពុជា៕