ដោយ ម៉ម មុនីរតន៍ RFA 2016-10-17
អ្នកនាំពាក្យគណៈកម្មការបុណ្យសពលោកបណ្ឌិត កែម ឡី ឲ្យដឹងថា កម្មវិធីបុណ្យគម្រប់ខួប ១០០ថ្ងៃលោកបណ្ឌិត កែម ឡី បានចប់ទៅហើយ ប៉ុន្តែគណៈកម្មការនៅមានភារកិច្ចបន្តទៀតមិនទាន់បញ្ចប់បេសកកម្មរបស់ខ្លួនទេ។ តាមគម្រោង ការសាងសង់ចេតិយនេះអាចត្រូវការថវិកាក្នុងទំហំទឹកប្រាក់ប្រហែល ៦ម៉ឺនដុល្លារអាមេរិក។
សមាជិកគណៈកម្មការបុណ្យសពលោកបណ្ឌិត កែម ឡី គឺលោក សៅ កុសល។ លោកឲ្យដឹងនៅថ្ងៃទី១៧ ខែតុលា ថា កិច្ចការដែលគណៈកម្មការនេះត្រូវធ្វើបន្ទាប់ពីបុណ្យ ១០០ថ្ងៃបានបញ្ចប់ទៅនោះ គឺស្វែងរកថវិកាដើម្បីរៀបចំចេតិយឲ្យបានសមរម្យសម្រាប់លោកបណ្ឌិត កែម ឡី។ លោកបន្តថា ប្លង់ និងទម្រង់ចេតិយ គឺគណៈកម្មការបានសម្រេច និងឯកភាពរួចហើយជាមួយក្រុមគ្រួសារ គឺយកតាមលំនាំរចនាបថអង្គរ។ លោកបន្តថា «ចេតិយនេះយើងសង់មានគោលបំណងពីរធំ។ យើងយកតាមគំរូអង្គរតូច។ គំរូចេតិយតាមអង្គរតូច តាមជំនាញគេគិតពិចារណាថា គំរូនេះវាល្បីដែលពិភពលោកគេដឹងឮ គេចូលចិត្តច្រើន។ គោលបំណងទី២ យើងធ្វើយ៉ាងម៉េចឲ្យផ្នូរលោកបណ្ឌិតនៅក្នុងចេតិយហ្នឹងស្រាប់ ហើយមានទីធ្លាធំនៅពេលយើងមានកម្មវិធីអីផ្សេងៗ យើងអាចដាក់មនុស្សបានប្រហែល ៥០ ទៅ ៦០នាក់»។
គណៈកម្មការបុណ្យសពលោកបណ្ឌិត កែម ឡី បញ្ជាក់ថា គម្រោងចេតិយដែលនឹងត្រូវសាងសង់នៅក្នុងប្លង់មេនោះ គឺទទឹង ៩ម៉ែត្រ បណ្ដោយ ១៨ម៉ែត្រ និងកម្ពស់ ២០ម៉ែត្រ។ ចេតិយនេះត្រូវសាងសង់ពីលើផ្នូរសពលោកបណ្ឌិត កែម ឡី តែម្ដង។
បច្ចុប្បន្ន ប្លង់មេនៃទម្រង់ចេតិយនេះ លោក សៅ កុសល ឲ្យដឹងថា ខាងបច្ចេកទេសបានគូររួចហើយ ហើយបានបញ្ជូនទៅឲ្យលោកបណ្ឌិត មាស នី ជាអ្នកទទួលបន្ទុកក្នុងការកៀរគររកថវិកាសាងសង់។ តាមគម្រោង ចេតិយនេះអាចត្រូវការទឹកប្រាក់កសាងក្នុងទំហំប្រហែល ៦ម៉ឺនដុល្លារសហរដ្ឋអាមេរិក។ ក្រៅពីគម្រោងចេតិយនេះ គណៈកម្មការបុណ្យសពលោកបណ្ឌិត កែម ឡី ក៏កំពុងពិនិត្យលទ្ធភាព និងពិគ្រោះយោបល់ជាមួយក្រុមគ្រួសារបន្ត រកទីតាំងសមរម្យសម្រាប់សាងសង់កន្លែងតម្កល់រូបសំណាកលោកបណ្ឌិត កែម ឡី។
សេចក្ដីសម្រេចជាជំហានដំបូង លោក សៅ កុសល បញ្ជាក់ថា ទីតាំងសម្រាប់តម្កល់រូបសំណាកលោកបណ្ឌិត កែម ឡី នេះ នឹងត្រូវសាងសង់នៅពីមុខផ្ទះក្នុងបរិវេណណាមួយ។ ការកសាងទីតាំងសម្រាប់តម្កល់រូបសំណាកនៅពីមុខផ្ទះនេះ គឺដើម្បីងាយស្រួលឲ្យមហាជនបានឃើញ ពេលធ្វើដំណើរតាមផ្លូវ។
លោក កែម រិទ្ធិសិទ្ធ ប្អូនប្រុសបង្កើតរបស់លោកបណ្ឌិត កែម ឡី ឲ្យដឹងថា រូបសំណាកនេះអាចត្រូវការ ២រូប គឺរូបសំណាកទី១ ត្រូវតម្កល់នៅក្នុងចេតិយ ហើយរូបសំណាកមួយទៀត ដាក់តាំងនៅពីខាងមុខផ្ទះ។ លោកបន្តថា រូបសំណាកដែលត្រូវការតម្កល់នៅក្នុងចេតិយនោះ អាចជារូបមួយកំណាត់ខ្លួន។ លោកបន្តថា «ការគិតរបស់ខ្ញុំ ខ្ញុំថាបើនៅក្នុងចេតិយយើងអាចធ្វើមួយកំណាត់ខ្លួន ហើយនៅខាងមុខអាចបញ្ឈរសមរម្យហើយ។ ប៉ុន្តែថានេះដោយសារគេតម្រូវអ៊ីចឹង យើងធ្វើទៅតាមអ្វីដែលមានហើយ»។
លោកបណ្ឌិត កែម ឡី ត្រូវបានឃាតកបាញ់ប្រហារចំនួន ២គ្រាប់ បណ្ដាលឲ្យលោកស្លាប់ភ្លាមៗនៅនឹងកន្លែង កាលពីថ្ងៃទី១០ ខែកក្កដា។ ទាំងក្រុមគ្រួសារ និងអ្នកគាំទ្រ ទាមទារឲ្យរដ្ឋាភិបាលត្រូវបើកការស៊ើបអង្កេតឲ្យបានស៊ីជម្រៅ និងម៉ត់ចត់ ដើម្បីធានាថា អ្នកបញ្ជា និងឃាតកពិតត្រូវបានផ្ដន្ទាទោសតាមផ្លូវច្បាប់៕