ដោយ ស៊ុន ហេង RFA 2016-10-17
តំណាងអ្នកបឹងកក់ លោកស្រី បូវ សោភា ឲ្យដឹងថា យុទ្ធនាការថ្ងៃច័ន្ទពណ៌ខ្មៅនៅសប្ដាហ៍ទី២៤ អាក់ខានមិនបានធ្វើ ដោយសារអ្នកបឹងកក់ ២នាក់ គឺលោកស្រី ម៉ៅ សុខា រស់នៅភូមិ២៣ និងលោក សំ សឹង្ហ រស់នៅភូមិ១ ត្រូវបានតុលាការកោះហៅទៅសាកសួរក្នុងនាមជាដើមបណ្ដឹង នៅថ្ងៃទី១៧ ខែតុលា។
អ្នកទាំងពីរប្ដឹងអភិបាលរងខណ្ឌដូនពេញ លោក សុខ ពេញវុធ សមាជិកក្រុមប្រឹក្សាខណ្ឌដូនពេញ លោកស្រី ពេជ្រ សុជាតា និងអធិការខណ្ឌដូនពេញ លោក សៅ ណុល ពីបទប៉ុនប៉ងមនុស្សឃាត និងបង្ករបួសស្នាមក្បែររមណីយដ្ឋានវត្តភ្នំ កាលពីយប់ថ្ងៃទី២២ ខែកញ្ញា ឆ្នាំ២០១៣៖ «ចៅក្រមស៊ើបសួរ សួរថាចង់បានអ្វី? ពួកខ្ញុំថា ចង់បានឲ្យចាប់ជនល្មើសមកផ្ដន្ទាទោស រកយុត្តិធម៌ជូនពួកខ្ញុំ។ ចំណែកសំណងសងលុយកាក់ ពួកខ្ញុំមិនចង់បានទេ»។
អ្នកបឹងកក់ផ្សេងទៀត នឹងចូលខ្លួនទៅបំភ្លឺនៅសាលាដំបូងរាជធានីភ្នំពេញជាបន្តបន្ទាប់ ក្នុងនាមជាដើមបណ្ដឹង ប្ដឹងអភិបាលរងខណ្ឌដូនពេញ និងអធិការខណ្ឌដូនពេញ ដូចគ្នា។ នៅថ្ងៃទី១៨ និងថ្ងៃទី១៩ តុលា លោកស្រី ស្រី សុខឿន និងលោក ខាញ់ ស្រស់ នឹងត្រូវចូលខ្លួនទៅបំភ្លឺនៅមុខចៅក្រមស៊ើបសួរសាលាដំបូងរាជធានីភ្នំពេញ៕