ដោយ អ៊ុំ រង្សី RFA 2016-10-19
អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លើកឡើងថា រាជរដ្ឋាភិបាលកម្ពុជា បានផ្ដល់ថវិកាចំនួនជិត ៤០០លានរៀល សម្រាប់បង្កើតសមាគមមនុស្សចាស់ចំនួនជិត ៤០០កន្លែង នៅទូទាំងប្រទេសនៅក្នុងឆ្នាំ២០១៦ នេះ។ ករណីនេះ សង្គមស៊ីវិល និងមនុស្សចាស់បង្ហាញការគាំទ្រ តែចង់ឃើញរដ្ឋាភិបាលយកចិត្តទុកដាក់បន្ថែមទៀតដល់មនុស្សឲ្យមានជម្រក និងការរស់នៅសមរម្យ។
ក្រសួងសង្គមកិច្ច អតីតយុទ្ធជន និងយុវនីតិសម្បទា រំពឹងថា មនុស្សចាស់ដែលមកពីឃុំចំនួន ៣៩៤ឃុំ ទូទាំង ២៥រាជធានី/ខេត្ត នៅក្នុងប្រទេសកម្ពុជា នឹងមានទំនាក់ទំនងល្អរវាងគ្នា និងគ្នា ពិសេសអាចទទួលបានការងារធ្វើតាមរយៈសមាគមមនុស្សចាស់នៅក្នុងឆ្នាំ២០១៦។
ការលើកឡើងរបស់អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា នៅពេលនេះ ធ្វើឡើងនាឱកាសក្នុងខួបលើកទី១៨ ទិវាមនុស្សចាស់កម្ពុជា និងទិវាមនុស្សចាស់អន្តរជាតិ ០១ តុលា ក្រោមប្រធានបទ «សមាគមមនុស្សចាស់ ដែលជាយន្តការដ៏សំខាន់ក្នុងការជួយអភិវឌ្ឍន៍សុខុមាលភាពមនុស្សចាស់ក្នុងសហគមន៍ និងសង្គមជាតិ» នៅថ្ងៃទី១៨ ខែតុលា។
អ្នកនាំពាក្យក្រសួងសង្គមកិច្ច និងអតីតយុទ្ធជន នីតិសម្បទា លោក ឯម ច័ន្ទមករា បានប្រាប់អាស៊ីសេរី នៅថ្ងៃទី១៨ ខែតុលា ថា បច្ចុប្បន្នកម្ពុជា មានសមាគមមនុស្សចាស់ ៥១០សមាគម តែស្ថិតនៅក្នុងកម្រិតភូមិនៅឡើយ។ ហេតុនេះ ការបង្កើតសមាគមចំនួន ៣៩៤នៅក្នុងឆ្នាំ២០១៦ ទៀតនោះ គឺជាសមាគមដែលអាចជួយមនុស្សចាស់ថ្នាក់ឃុំវិញ ដើម្បីងាយស្រួលគ្រប់គ្រង និងមានប្រសិទ្ធភាពជាងមុន៖ «ជាគោលដៅរបស់យើងនៅក្នុងឆ្នាំ២០១៦នេះ គឺចង់ឲ្យមានការគ្រប់គ្រងនៅក្នុងសមាគមកម្រិតថ្នាក់ឃុំ ដើម្បីឲ្យមានភាពងាយស្រួលជាង ហេតុនេះបានជារដ្ឋាភិបាលយើងបញ្ចេញថវិកាចំនួន ៣៩៤លានរៀលនេះ ដើម្បីបង្កើតសមាគមនេះ»។
អ្នកនាំពាក្យក្រសួងសង្គមកិច្ចរូបនេះអះអាងថា សមាគមនេះ មិនរើសអើងចំពោះមនុស្សចាស់ណាម្នាក់នោះទេ។ លោកអះអាងថា សមាគមនឹងអាចឲ្យមនុស្សចាស់បង្កើនការទំនាក់ទំនង ទាំងការប្រឹក្សាយោបល់ និងការសន្សំប្រាក់រួមគ្នាដើម្បីជួយគ្នាទៅវិញទៅមកជាដើម៖ «អ្វីដែលជាការរំពឹងទុករបស់រដ្ឋាភិបាល គឺយើងសង្ឃឹមថា មនុស្សចាស់ទាំងនោះនឹងមានភាពកក់ក្ដៅចំពោះរដ្ឋាភិបាលដែលយកចិត្តទុកដាក់នេះ»។
ចំណែកឯទីប្រឹក្សាសមាគមមនុស្សចាស់នៅកំពង់ធំ លោក កង សាអ៊ុំ លើកឡើងថា ទោះជាកម្ពុជា មានអនុសញ្ញាស្ដីពីសិទ្ធិមនុស្សចាស់ក្ដី ប៉ុន្តែសព្វថ្ងៃមនុស្សចាស់នៅកម្ពុជា នៅតែមានបញ្ហាប្រឈមច្រើនដែលទាមទារឲ្យរដ្ឋាភិបាល និងស្ថាប័នពាក់ព័ន្ធត្រូវតែជួយទំនុកបម្រុងមនុស្សចាស់ទាំងនោះ។ ហេតុនេះលោកគាំទ្រចំពោះការបង្កើតនេះ ប៉ុន្តែចង់ឃើញសមាគម អនុវត្តការងារឲ្យមានប្រសិទ្ធភាព និងស្មោះត្រង់។
ការស្រាវជ្រាវកាលពីឆ្នាំ២០១៣ របស់ក្រសួងសង្គមកិច្ច ឲ្យដឹងថា មនុស្សចាស់ចាប់ពីអាយុ ៦០ឆ្នាំឡើងមានចំនួនប្រមាណ ១,១លាននាក់ ស្មើនឹង ៧,៦ភាគរយ នៃចំនួនប្រជាជនសរុប ហើយនៅឆ្នាំ២០៣០ មនុស្សចាស់នៅកម្ពុជា នឹងកើនឡើងប្រមាណ ១,៧លាននាក់ ស្មើនឹង ១១ភាគរយ នៃចំនួនប្រជាជនសរុប។
កាលពីពេលកន្លងទៅ ប្រមុខរដ្ឋាភិបាល លោកនាយករដ្ឋមន្ត្រី ហ៊ុន សែន ធ្លាប់ជំរុញឲ្យស្ថាប័នពាក់ព័ន្ធយកចិត្តទុកដាក់លើមនុស្សចាស់នៅកម្ពុជា យ៉ាងនេះក្តី មនុស្សចាស់យល់ថា ការអំពាវនាវរបស់នាយករដ្ឋមន្ត្រីនៅតែគ្មានប្រសិទ្ធភាព ហើយពួកគាត់នៅតែរស់នៅក្រោមបន្ទាត់ភាពក្រីក្រ។ មនុស្សចាស់នៅតែទទូចឲ្យរដ្ឋាភិបាលគិតគូរដល់ជីវភាពរស់នៅរបស់ពួកគាត់ ដើម្បីឲ្យមនុស្សចាស់មានសកម្មភាព និងសំឡេងក្នុងកិច្ចការអភិវឌ្ឍន៍សង្គម។
បើទោះយ៉ាងណាក្ដី អ្នកនាំពាក្យក្រសួងសង្គមកិច្ច លោក ឯម ច័ន្ទមករា អះអាងថា ដើម្បីឲ្យសមាគមមនុស្សចាស់ អនុវត្តការងារមានប្រសិទ្ធភាព និងឆ្លើយតបតម្រូវការមនុស្សចាស់ ក្រសួងបានបង្កើតគណៈកម្មការជាតិកម្ពុជា ដើម្បីមនុស្សចាស់ ឲ្យធ្វើការជាមួយមន្ទីរសង្គមកិច្ចរាជធានី/ខេត្ត ដើម្បីជួយសមាគមតាមរយៈការបណ្ដុះបណ្ដាលផ្នែកបច្ចេកទេស និងផ្ដល់ការងារដែលមនុស្សចាស់អាចធ្វើបាន៕