ដោយ មួង ណារ៉េត RFA 2016-10-27
មន្ត្រីរដ្ឋាភិបាលបង្ហើបប្រាប់មន្ត្រីអាមេរិកថា ដំណោះស្រាយនយោបាយរវាងគណបក្សធំៗទាំងពីរនឹងមានក្នុងពេលឆាប់ៗ។ អ្នកវិភាគ និងអង្គការសង្គមស៊ីវិល រួមទាំងមន្ត្រីគណបក្សប្រឆាំងផង គាំទ្រឲ្យមានជំនួបចរចាដើម្បីបញ្ចប់ភាពតានតឹងផ្នែកនយោបាយនេះ។
លោក ប្រាក់ សុខុន រដ្ឋមន្ត្រីក្រសួងការបរទេសសម្ដែងក្ដីសង្ឃឹមប្រាប់លោក ដានីញ៉ែល រ៉ាស្សែល (Daniel R. Russel) ឧបការីរដ្ឋមន្ត្រីក្រសួងការបរទេសអាមេរិក ទទួលបន្ទុកកិច្ចការអាស៊ី-អាគ្នេយ៍ និងប៉ាស៊ីហ្វិក ក្នុងជំនួបមួយកាលពីថ្ងៃម្សិលមិញថា លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា និងថ្នាក់ដឹកនាំគណបក្សប្រឆាំងនឹងជួបចរចាគ្នាក្នុងពេលឆាប់ៗនេះ ដើម្បីបញ្ចប់ភាពតានតឹងខាងនយោបាយរវាងបក្សទាំងពីរ។ ហេតុផលដែលលោក ប្រាក់ សុខុន រំពឹងថា វិបត្តិនយោបាយនឹងអាចដោះស្រាយបាននោះ ដោយសារតែតំណាងរាស្ត្រគណបក្សប្រឆាំងព្រមចូលរួមកិច្ចប្រជុំរដ្ឋសភាឡើងវិញ។
វិបត្តិនយោបាយនៅកម្ពុជា បានជំរុញឲ្យប្រទេសមហាអំណាចគិតគូរខ្វាយខ្វល់ និងចង់ឃើញគណបក្សដែលមានអាសនៈទាំងពីរនៅរដ្ឋសភាជជែករកដំណោះស្រាយ រួមគ្នាដើម្បីធ្វើយ៉ាងណាបង្កបរិយាកាសល្អដើម្បីធ្វើឲ្យការបោះឆ្នោតខាងមុខ មានភាពសេរីត្រឹមត្រូវ និងយុត្តិធម៌។
លោក ដានីញ៉ែល រ៉ាស្សែល ក៏បានជួបលោក កឹម សុខ ប្រធានស្ដីទីគណបក្សសង្គ្រោះជាតិ និងមន្ត្រីគណបក្សសង្គ្រោះជាតិ ផ្សេងទៀត ដោយលើកឡើងពីក្តីកង្វល់របស់សហរដ្ឋអាមេរិក ចំពោះស្ថានការណ៍នយោបាយនៅប្រទេសកម្ពុជា និងការចង់ឃើញភាពជានាគ្នាឡើងវិញរវាងបក្សទាំងពីរ។ លោក ដានីញែល រ៉ាស្សែល ឆ្លើយនឹងសំណួររបស់អ្នកកាសែតយ៉ាងខ្លីក្រោយជំនួបថា ជំនួបនេះគឺជាការសន្ទនា និងសំណេះសំណាលគ្នា។
លោក យ៉ែម បុញ្ញឫទ្ធិ ឲ្យដឹងថា លោក ដានីញែល រ៉ាស្សែល បញ្ជាក់យ៉ាងច្បាស់ថា ប្រសិនបើក្បាលម៉ាស៊ីនបក្សប្រឆាំង គឺលោក សម រង្ស៊ី អវត្តមាន និងគ្មានការឃោសនាដោយសេរីរបស់លោក កឹម សុខា មុនការបោះឆ្នោតនោះគឺជាការពិបាកក្នុងការទទួលយកលទ្ធផលនៃការបោះឆ្នោតនៅពេលខាងមុខ៖ «យើងតែងតែមានសង្ឃឹម ពីព្រោះគាត់ (ឧបការីរដ្ឋមន្ត្រីក្រសួងការបរទេសអាមេរិក លោក ដានីញែល រ៉ាស្សែល) ក៏លើកដែរថា ដំណោះស្រាយគឺការជជែកតាមវប្បធម៌សន្ទនា»។
អ្នកវិភាគនយោបាយ លោក សូ ចន្ថា យល់ស្របទៅនឹងការលើកឡើងរបស់ឧបការីរដ្ឋមន្ត្រីក្រសួងការបរទេសអាមេរិក ដែលចង់ឃើញអ្នកនយោបាយខ្មែរបញ្ចប់ជម្លោះដោយការចរចា។ លោកយល់ថា ប្រសិនបើនៅពេលនេះមិនអាចមានដំណោះស្រាយនយោបាយដើម្បីបញ្ចប់ជម្លោះនោះ នឹងធ្វើឲ្យគណបក្សប្រឆាំងរងការគំរាមកំហែងរងការបំភិតបំភ័យ និងត្រូវរឹតត្បិតសិទ្ធិសេរីភាពដែលជាហេតុធ្វើឲ្យការបោះឆ្នោតនៅពេលខាងមុខមានភាពមិនប្រក្រតី៕