 |
| សម្តេចក្រុមព្រះ នរោត្តម រណឬទ្ធិ អតីតព្រះប្រធានគណបក្សហ្វ៊ុនស៊ិនប៉ិច។ រូប៖ ហ្វេសប៊ុក Royal du Cambodge |
ដោយ មួង ណារ៉េត RFA 2021-11-28
មន្រ្តីជាន់ខ្ពស់គណបក្សហ៊្វុនស៊ិនប៉ិច ឲ្យដឹងនៅមុននេះបន្តិច ថាព្រះសពរបស់សម្តេចក្រុមព្រះ នរោត្តម រណឫទ្ធិ នឹងត្រូវយាងមកធ្វើបុណ្យនៅកម្ពុជា។ អ្នកនាំពាក្យគណបក្សហ្វ៊ុនស៊ិនប៉ិចលោក ញឿន រ៉ាដែន បញ្ជាក់ថា គណបក្សនេះ នឹងចេញសេចក្តីថ្លែងការណ៍មួយពីករណីនេះ។
សម្តេចក្រុមព្រះ នរោត្តម រណឫទ្ធិ ទ្រង់បានសោយទិវង្គត ក្នុងព្រះជន្ម៧៧ព្រះវស្សា នៅប្រទេសបារាំង នៅថ្ងៃទី២៨ ខែវិច្ឆិកា ឆ្នាំ២០២១។ ទ្រង់ជាបុត្រាច្បងរបស់ព្រះបាទ នរោត្តម សីហនុ និងអ្នកម្នាង ផាត់ កាញ៉ុល។
សម្តេចក្រុមព្រះ បានបាត់ព្រះភ័ក្ត្រជាងបីឆ្នាំមកហើយ ក្រោយពីទ្រង់យាងទៅព្រះព្យាបាលព្រះរោគ នៅប្រទេសបារាំង បន្ទាប់ពីមានគ្រោះថ្នាក់ចរាចរណ៍មួយ នៅស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ ក្នុងគ្រោះថ្នាក់នោះ ទ្រង់បានរងរបួសធ្ងន់ និងអ្នកម្នាង អ៊ុក ផល្លា ទទួលមរណភាព៕