 |
| លោក កឹម សុខា ប្រធានគណបក្សសង្គ្រោះជាតិ។ រូប៖ RFA |
ដោយ មាន ឫទ្ធិ RFA 2021-11-29
ប្រជាពលរដ្ឋ និងសកម្មជនបក្សប្រឆាំងមួយចំនួន ខកចិត្តចំពោះសាររបស់លោក កឹម សុខា ប្រធានគណបក្សសង្គ្រោះជាតិ ដោយពួកគេចាត់ទុកសារនោះថាបំបាក់ទឹកចិត្តសកម្មជន និងអ្នកគាំទ្រនៅមូលដ្ឋាន និងក្រៅប្រទេសដែលកំពុងទាមទារឱ្យគោរពសិទ្ធិមនុស្ស ជួយស្ដារលទ្ធិប្រជាធិបតេយ្យនៅកម្ពុជាឡើងវិញ។ ពួកគេ បញ្ជាក់ថា ថ្នាក់ដឹកនាំ សកម្មជន និងអ្នកគាំទ្រ នៅតែចាត់ទុកលោក សម រង្ស៊ី និងលោក កឹម សុខា ជាមនុស្សតែមួយដដែល ដរាបណាលោកជាប្រធានគណបក្សតទៅទៀត។
ប្រជាពលរដ្ឋ និងសកម្មជនបក្សប្រឆាំងមួយចំនួនចាត់ទុកសាររបស់លោក កឹម សុខា មិនបានលើទឹកចិត្តអ្នកប្រជាធិបតេយ្យដូចគ្នានោះទេ។ ទោះយ៉ាងនេះក្តី ពួកគាត់ នៅតែប្តេជ្ញាចិត្តគាំទ្រមេដឹកនាំគណបក្សប្រឆាំងទាំងពីរ ហើយបន្តសកម្មភាពទាមទារយុត្តិធម៌សង្គម ដើម្បីឱ្យអាជ្ញាធរដោះលែងអ្នកនយោបាយដែលកំពុងជាប់ឃុំដោយអយុត្តិធម៌។
ចៅសង្កាត់ជាប់ឆ្នោតគណបក្សសង្គ្រោះជាតិនៅសង្កាត់អូរចា ក្រុងបាត់ដំបងកញ្ញា ស៊ិន ចាន់ពៅរ៉ូហ្សេត ថ្លែងប្រាប់វិទ្យុអាស៊ីសេរីថា បច្ចុប្បន្នសកម្មជន និងអ្នកគាំទ្រគណបក្សប្រឆាំងនៅតែរក្សាស្មារតីស្មោះត្រង់ និងចាត់ទុកលោក សម រង្ស៊ី និងលោក កឹម សុខា ជាមនុស្សតែមួយដដែល។ កញ្ញាយល់ថា សាររបស់លោក កឹម សុខា បានបំបាក់ទឹកចិត្តពលរដ្ឋខ្មែរពាក់កណ្តាលប្រទេសដែលគាំទ្រគណបក្សសង្គ្រោះជាតិ ជាពិសេសអ្នកតស៊ូនៅមូលដ្ឋាន និងក្រៅប្រទេសដែលកំពុងជួយទាមទារឱ្យគោរពសិទ្ធិមនុស្សជួយស្ដារលទ្ធិប្រជាធិបតេយ្យនៅកម្ពុជា និងរកយុត្តិធម៌ជូនពលរដ្ឋ ក្នុងនោះរួមទាំងលោក កឹម សុខា ផងដែរ។ កញ្ញាបញ្ជាក់ថា បើទោះបីលោក កឹម សុខា ចេញសារបែបនេះក្តី ក៏កញ្ញានៅតែបង្ហោះលើបណ្តាញសង្គមបង្ហាញពីភាពរឹងមាំ និងការរួបរួមរបស់មេដឹកនាំទាំងពីរនេះ លើកលែងតែលោក កឹម សុខា ប្រកាសទៅកាន់មតិជាតិ និងអន្តរជាតិថា លោកលែងជាប្រធានគណបក្សតទៅទៀត៖ «ប្រសិនបើលោក កឹម សុខា គាត់បញ្ចេញសារក្នុងន័យគំរាមកំហែង ក្នុងនាមខ្ញុំជាសកម្មជនគួរណាស់យកលោក រ៉ុង ឈុន ជាគំរូ ទោះបីគាត់មិននិយាយអ្វី មិនធ្វើអ្វី ដើរធ្វើតែបុណ្យក៏បានដែរ នៅតែស្ងៀមទៅកុំឱ្យបំបាក់ទឹកចិត្តស្មារតី ក៏ប៉ុន្តែសកម្មភាពបែបហ្នឹងទោះបីគំរាមកំហែងបែបណាក៏ដោយមិនអាចធ្វើឱ្យសកម្មជននៅមូលដ្ឋាន អ្នកស្មោះត្រង់ជាមួយសង្គ្រោះជាតិបោះបង់ការតស៊ូ បាត់បង់ភក្តីភាពជាមួយឆន្ទៈប្រជាពលរដ្ឋដាច់ខាត»។
ស្រដៀងគ្នានេះដែរ សមាជិកក្រុមស្ត្រីក្លាហានម្នាក់ដែលទើបបានចេញពីពន្ធនាគារគឺលោកស្រី លឹម សាន ខកចិត្តជាខ្លាំងពេលអានសារមេដឹកនាំបក្សប្រឆាំងលោក កឹម សុខា ដែលច្រានចោលសកម្មភាពរបស់អ្នកប្រជាធិបតេយ្យដើម្បីបុព្វហេតុយុត្តិធម៌សង្គមដូចគ្នា។ លោកស្រីចាត់ទុកសារនេះ ហាក់ផាត់ចោលការខិតខំរបស់លោកស្រី និងក្រុមស្រ្តីផ្សេងទៀត ដែលរក្សាជំហរ ទិញមិនលក់សម្លត់មិនខ្លាចកន្លងមក ដោយសុខចិត្តប្រឈមការធ្វើទុក្ខបុកម្នេញ ការគំរាមកំហែង និងអំពើហិង្សាជាបន្តបន្ទាប់ពីសំណាក់អាជ្ញាធរ ហើយលើសពីនេះពួកគេសុខចិត្តជាប់ពន្ធនាគារទៀតផង។ ស្រ្តីរូបនេះបញ្ជាក់ថា លោកស្រីនៅតែប្តេជ្ញាចិត្តនឹងបន្តការតវ៉ាដោយសន្តិវិធី ដើម្បីជួយរកយុត្តិធម៌សង្គម៖ «តាមការពិតខ្ញុំចង់ឱ្យលោក កឹម សុខា លើកទឹកចិត្តដល់ពួកខ្ញុំទាំងអស់គ្នាជាស្រ្តី ដូចជាលោកគ្រូ រ៉ុង ឈុន ចាស់ហើយចាប់ដាក់ពន្ធនាគារទាំងអយុត្តិធម៌ ប្អូនៗជាយុវជនខ្មែរថាវរៈ មាតាធម្មជាតិសុទ្ធតែអយុត្តិធម៌ទាំងគ្នា គួរគាត់លើកទឹកចិត្តពួកខ្ញុំ មិនគួរយកសារមួយនេះវាយប្រហារ ហើយជាន់ពន្លិចពួកខ្ញុំ ចា៎ខ្ញុំខកចិត្តខ្លាំងណាស់»។
ចំណែកប្រជាពលរដ្ឋរត់រម៉កនៅតំបន់ទេសចរខេត្តសៀមរាបវិញសុំមិនបញ្ចេញឈ្មោះ សង្កេតឃើញថា ពលរដ្ឋមិនសូវចាប់អារម្មណ៍សារនយោបាយលើកដំបូងរបស់ លោក កឹម សុខា នោះទេ បន្ទាប់ពីគាត់ស្ងៀមស្ងាត់ប៉ុន្មានឆ្នាំចុងក្រោយនេះ ព្រោះពលរដ្ឋកំពុងខ្វល់ខ្វាយពីជីវភាព។ លោកថា មេដឹកនាំនយោបាយតែងតែថ្លែងសារកេងចំណេញផលប្រយោជន៍ និងយកលេសរៀងៗខ្លួន ប៉ុន្តែលោកយល់ថា ស្ថានភាពនេះ លោក កឹម សុខា មិនគួរបញ្ចេញសារដែលបំបែកសម្ព័ន្ធភាពរបស់គណបក្សសង្គ្រោះជាតិនោះទេ។ លោកអំពាវនាវឱ្យដឹកនាំគណបក្សប្រឆាំង ត្រូវហ៊ានថ្លែងសារនយោបាយណា ដើម្បីផ្តល់ក្តីសង្ឃឹមដល់អ្នកគាំទ្រ និងពលរដ្ឋ៖ «ធ្វើស្អីក៏ដោយជាពិសេសខាងនយោបាយ ប្រសិនបើគ្មានការទាមទារទេ គឺមិនបានទេ ចឹងនៅសម្ងំស្ងៀមវាអត់លឺទេ ចឹងក្នុងកាលៈទេសៈហ្នឹងគួរតែរួបរួមគ្នាសិន អានេះគំនិតខ្ញុំអ្នកគាំទ្រសង្គ្រោះជាតិ កុំទាន់ខ្វែងគំនិតគ្នាឱ្យសោះ»។
ចំពោះការបង្ហោះសាររបស់លោក កឹម សុខា ក៏បានធ្វើឲ្យអ្នកប្រើប្រាស់ហ្វេសប៊ុករាប់ពាន់នាក់បានចូលទៅបញ្ចេញយោបល់ ដោយអ្នកខ្លះគាំទ្រការលើកឡើងរបស់លោក ប៉ុន្តែក៏មានអ្នកខ្លះបញ្ចេញប្រតិកម្មមិនពេញចិត្តដែរ។ ពួកគេបានទាមទារឱ្យលោក កឹម សុខា ធ្វើសន្និសីទកាសែតឬផ្ដល់សម្ភាសដល់អ្នកសារព័ត៌មានឱ្យបានច្បាស់លាស់ថា តើលោកមានជំហរដូចម្តេចចំពោះគណបក្សសង្គ្រោះជាតិ ជាពិសេសសម្ព័ន្ធភាពនយោបាយជាមួយលោក សម រង្ស៊ី។
ការលើកឡើងនេះ គឺបន្ទាប់ពីលោក កឹម សុខា ប្រធានគណបក្សសង្គ្រោះជាតិ បង្ហោះសារលើបណ្ដាញសង្គមហ្វេសប៊ុក (Facebook) កាលពីថ្ងៃទី២៨ ខែវិច្ឆិកាថាលោកមិនពាក់ព័ន្ធ និងមិនទទួលខុសត្រូវចំពោះសកម្មភាពរបស់លោក សម រង្ស៊ី និងក្រុមរបស់គាត់ឡើយ។ លោកចោទប្រកាន់ថា លោក សម រង្ស៊ី និងសហការីថា បានដើរចេញពីគោលការណ៍ និងស្មារតីដើមនៃការរួបរួម ដោយទៅបង្កើតចលនានយោបាយ និងមុខតំណែងខ្លួនឯង ជាពិសេសការត្រឡប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់ គឺគណបក្សភ្លើងទៀន។ លោកអំពាវនាវដល់លោក សម រង្ស៊ី និងសហការីឱ្យឈប់យកឈ្មោះ និងរូបថតលោកទៅប្រើប្រាស់ភ្ជាប់ជាមួយសកម្មភាពមហិច្ឆតានយោបាយរបស់ខ្លួនតទៅទៀត ព្រោះលោកថា ករណីនេះធ្វើឱ្យសាធារណមតិជាតិ និងអន្តរជាតិមានការភ័ន្តច្រឡំ។
ជុំវិញរឿងនេះ លោក សម រង្ស៊ី ប្រធានស្តីទីគណបក្សសង្គ្រោះជាតិបានបង្ហោះសារលើបណ្ដាញសង្គមហ្វេសប៊ុកកាលពីថ្ងៃ២៨ ខែវិច្ឆិកាថា សេចក្តីថ្លែងការណ៍របស់លោក កឹម សុខា គឺជាលទ្ធផលនៃការគំរាមកំហែងពីសំណាក់លោក ហ៊ុន សែន ដែលគួរឱ្យភ័យខ្លាចបំផុត ចំពោះអ្នកប្រជាធិបតេយ្យខ្មែរដោយចាប់លោក កឹម សុខា ធ្វើជាចំណាប់ខ្មាំង។
ទោះជាយ៉ាងណា អ្នកនាំពាក្យបក្សកាន់អំណាចលោក សុខ ឥសាន ថ្លែងថា ការបែកបាក់ផ្ទៃក្នុងរបស់គណបក្សសង្គ្រោះជាតិផ្ដល់ផលចំណេញដល់គណបក្សប្រជាជនកម្ពុជាមែន។ ប៉ុន្តែលោកបញ្ជាក់ថា ទោះជាលោក កឹម សុខា បែកបាក់គ្នាជាមួយលោក សម រង្ស៊ី ក៏ដោយ ក៏មិនទាន់អាចនិយាយបានថា លោក កឹម សុខា នឹងមានសិទ្ធិធ្វើនយោបាយ ដើម្បីប្រកួតប្រជែងជាមួយគណបក្សប្រជាជនកម្ពុជានោះដែរ។
អគ្គលេខាធិការសហព័ន្ធនិស្សិតបញ្ញវន្តកម្ពុជាលោក គៀន ពន្លក ថ្លែងថា បើលោក កឹម សុខា លើកឡើងពិតប្រាកដមែន បង្ហាញច្បាស់អំពីសញ្ញាបែកបាក់គ្នារវាងមេដឹកនាំគណបក្សប្រឆាំងដែលធ្វើឱ្យអ្នកគាំទ្រខកចិត្ត និងផ្ដល់ផលចំណេញសម្រាប់គណបក្សកាន់អំណាច៖ «ត្រូវតែបញ្ជាក់ថា លោក កឹម សុខា និងលោក សម រង្ស៊ី ជាមនុស្សតែមួយនោះទើបប្រជាជនមានការជឿជាក់ ហើយត្រូវបញ្ចេញសារនោះ ទោះបីខ្លួនជាប់បំរាមនយោបាយក៏ដោយ មិនគួរណានាំគ្នាស្ងាត់ហើយចោទប្រកាន់គ្នាទៅវិញទៅមក នេះបង្ហាញអំពីការបែកបាក់នៃអ្នកប្រជាធិបតេយ្យ ហើយអ្នកដែលចំណេញ គឺគណបក្សកាន់អំណាចទៅវិញទេ»។
អាជ្ញាធរកម្ពុជាបានចោទប្រកាន់លោក កឹម សុខា ពីបទក្បត់ជាតិ ប៉ុន្តែជាង ៤ឆ្នាំមកនេះ អាជ្ញាធរមិនបានបង្ហាញភស្តុតាងរឹងមាំណាមួយ ដែលបង្ហាញពីទោសកំហុសរបស់លោកនោះឡើយ។ ផ្ទុយទៅវិញ សំណុំរឿងនេះត្រូវបានផ្អឹបទុកទៅតាមការចង់បានរបស់លោកនាយករដ្ឋមន្ត្រី ហ៊ុន សែន។ ការអូសបន្លាយសំណុំរឿង បូករួមទាំងការដកហូតសិទ្ធិនយោបាយពីសំណាក់តុលាការកំពូលផងនោះ បានធ្វើឱ្យមេបក្សប្រឆាំងដែលធ្លាប់មានថ្វីមាត់រូបនេះ រក្សាភាពស្ងៀមស្ងាត់ទាក់ទងនឹងការវិវឌ្ឍស្ថានការណ៍នយោបាយនៅកម្ពុជា។ សូម្បីតែនៅពេលមានការចាប់ខ្លួន និងចោទប្រកាន់សកម្មជនបក្សប្រឆាំងកន្លងមក បូករួមទាំងខួបនៃការរំលាយបក្ស និងការរឹបអូសទីស្នាក់ការបក្ស ក៏លោក កឹម សុខា មិនបានបញ្ចេញសារណាមួយទាក់ទងនឹងបញ្ហាទាំងនេះដែរ ខណៈសហគមន៍ជាតិ និងអន្តរជាតិនៅតែទទួលស្គាល់ថា លោកជាប្រធានគណបក្សសង្គ្រោះជាតិនៅឡើយ៕
