 |
| រូបភាពបង្ហាញពីអគារធំស្កឹមស្កៃរបស់សណ្ឋាគារនិងកាស៊ីណូ ណាហ្គាវើលដ៍ នៅក្បែរដ្ឋសភាជាតិកម្ពុជា។ រូប៖ គេផ្ដល់ឱ្យ |
ដោយ ជី វិតា RFA 2021-12-01
ក្រុមអង្គការសង្គមស៊ីវិលដែល ធ្វើការផ្នែកសិទ្ធិមនុស្ស និងសិទ្ធិការងារចំនួន២៥ស្ថាប័ន រួមគ្នាចេញសេចក្ដីថ្លែងការណ៍មួយ ដោយបង្ហាញការសោកស្ដាយចំពោះក្រុមហ៊ុនបនល្បែង ណាហ្គាវើលដ៍ (Naga World) ដែលរំលាយថ្នាក់ដឹកនាំសហជីព និងបញ្ឈប់បុគ្គលិកជាង១ពាន់៣រយនាក់ តាមគម្រោងការរបស់ខ្លួន ក្នុងពេលមានវិបត្តិជំងឺកូវីដ-១៩។ សង្គមស៊ីវិលចាត់ទុកទង្វើរបស់ក្រុមហ៊ុននេះថា ជាការរំលោភសិទ្ធិការងារ និងសេរីភាពជាមូលដ្ឋានរបស់សហជីពយ៉ាងធ្ងន់ធ្ងរ ដែលមានការគាំពារពីច្បាប់ជាតិ និងច្បាប់អន្តរជាតិ។
ជុំវិញវិវាទការងាររវាងសហជីពជាមួយក្រុមហ៊ុនបនល្បែងដ៏ធំមួយនៅចំកណ្ដាលទីក្រុងភ្នំពេញ ដែលអូសបន្លាយជាង ៧ ខែមកនេះ ខាងក្រុមហ៊ុនណាហ្គាវើលដ៍(Naga World)ឈានដល់ការរំលាយចោលក្រុមតំណាងសហជីពពេញសិទ្ធិ ២៦ នាក់ ក្រោយពីក្រុមហ៊ុនបានបញ្ឈប់បុគ្គលិកជាង ១ពាន់ ៣រយនាក់(១៣២៩)ដែលភាគច្រើនជាសមាជិករបស់សហជីព ដោយទូរទាត់ប្រាក់សំណងឲ្យពួកគេមិនត្រឹមត្រូវ តាមច្បាប់ស្ដីពីការងាររបស់ប្រទេសកម្ពុជា។
ក្រុមអង្គការសង្គមស៊ីវិលរកឃើញថា ការសម្រេចបញ្ឈប់ថ្នាក់ដឹកនាំសហជីពនេះ ភាគីក្រុមហ៊ុន គឺធ្វើដោយឯកតោភាគី ដោយមិនមានលិខិតបញ្ជាក់ផ្លូវការណាមួយ ចេញពីមន្ទីរអធិការកិច្ចការងារនៃក្រសួងការងារ ឯកភាពឲ្យក្រុមហ៊ុនធ្វើរឿងនេះឡើយ។
អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថា ទង្វើរបស់ក្រុមហ៊ុនណាហ្គាវើលដ៍នេះ គឺឆ្លុះបញ្ចាំងឲ្យឃើញពីបំណងពិតប្រាកដរបស់ក្រុមហ៊ុន គឺចង់លុបបំបាត់សំឡេងសហជីពចេញពីកន្លែងធ្វើការ ដោយមិនខ្វាយខ្វល់នឹងច្បាប់ជាតិ ឬច្បាប់អន្តរជាតិ ដែលចែងគាំពារថ្នាក់ដឹកនាំសហជីព ក្នុងការអនុវត្តការងារដោយគ្មានកំហុសនោះទេ។
លោបន្តថា ប្រសិនបើក្រសួងការងារមិនគិតគូរដោះស្រាយវិវាទនេះស្របទៅតាមច្បាប់ទេ បញ្ហាការងារនៅក្រុមហ៊ុនណាហ្គាវើលដ៍(Naga World)នឹងក្លាយជាគំរូអាក្រក់ដល់ថៅកែក្រុមហ៊ុនផ្សេងទៀតក្នុងប្រទេសកម្ពុជា យកគំរូតាម ដែលធ្វើឲ្យកម្មករនិយោជក រងនូវអំពើអយុត្តិធម៌កាន់តែច្រើនឡើង ហើយធ្វើឲ្យប៉ះពាល់ដល់មុខមាត់រដ្ឋាភិបាលនៅលើឆាកអន្តរជាតិថែមទៀត។
មន្ត្រីផ្នែកច្បាប់រូបនេះ ស្នើសុំក្រសួងការងារ ពន្លឿនការដោះស្រាយបញ្ចប់វិវាទការងារនេះ ឲ្យបានឆាប់តាមតែអាចធ្វើទៅបាន ដោយឈរលើគោលការណ៍ច្បាប់ និងយុត្តិធម៌៖ «រដ្ឋមន្ត្រីត្រូវតែមានចំណាត់ការតាមដានរឿងនេះឡើងវិញ ហើយសើរើនីតិវិធី និងការអនុវត្តរបស់អធិការកិច្ចនៃក្រសួងការងារហ្នឹងឡើងវិញ។ ហើយរឿងទី២ នៅក្នុងករណី ដែលភាគីកើតទុក្ខមិនសុខចិត្ត អាហ្នឹងក្រសួងហ្នឹង ត្រូវដើរតួនាទីក្នុងការសម្របសម្រួល ដើម្បីឲ្យភាគីទាំងសងខាងហ្នឹង ឲ្យគាត់ចូលតុចរចាទៅ។ គាត់ធ្វើសម្បទានគ្នាទៅ គាត់អាចរកដំណោះស្រាយគ្នា ដើម្បីឲ្យវាមាននូវការចរចាមួយប្រកបដោយភាពស្មោះត្រង់។ អាហ្នឹងដែលជាគោលការណ៍នៃការលើកកម្ពស់នូវទំនាក់ទំនងវិជ្ជាជីវៈនៅកន្លែងការងារ»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍(Naga World) កញ្ញា ឈឹម ស៊ីថរ ឲ្យដឹងថា អស់រយៈពេលជាង ៧ ខែមកនេះ ខាងសហជីពប្រឹងប្រែងព្យាយាមរកដំណោះស្រាយជាមួយក្រុមហ៊ុន ទាំងនៅក្រសួងការងារ និងក្រុមប្រឹក្សាអាជ្ញាកណ្ដាល ស្របទៅតាមនីតិវិធីអស់ហើយ ប៉ុន្តែសហជីពនៅតែមិនទទួលដំណោះស្រាយណាមួយនោះទេ។
កញ្ញាបន្តថា ខាងសហជីពបានជូនដំណឹងទៅភាគីក្រុមហ៊ុន និងក្រសួងពាក់ព័ន្ធទាំងអស់ អំពីការធ្វើបាតុកម្មរបស់ក្រុមបុគ្គលិកក្រុមហ៊ុនណាហ្គាវើលដ៍ (Naga World)នៅពាក់កណ្ដាលខែធ្នូនេះហើយ។
ប្រធានសហជីពរូបនេះបញ្ជាក់ថា ការសម្រេចយកការធ្វើកូដកម្មនៅថ្ងៃទី១៨ ខែធ្នូ នៅពេលខាងមុខនេះ ពីក្រុមកម្មករនិយោជិក គឺដើម្បីដាក់សម្ពាធឲ្យភាគីក្រុមហ៊ុនឱ្យព្រមទទួលយកថ្នាក់ដឹកនាំសហជីពធ្វើការនៅក្រុមហ៊ុនវិញ ដូចដែលច្បាប់បានចែង និងទទួលយកបុគ្គលិកដែលនៅសេសសល់ជិតបួនរយនាក់ (៣៧៣) ឲ្យចូលធ្វើការវិញ៖ «ដោយសារមិនមានដំណោះស្រាយទើបឥឡូវកម្មករនិយោជិក គាត់ចាប់ផ្ដើមយល់ឃើញថា គាត់ត្រូវចេញរកដំណោះស្រាយបញ្ហាដោយខ្លួនគាត់ហើយ។ គាត់មិនអាចរង់ចាំអ្នកណាមកដោះស្រាយបញ្ហាឲ្យគាត់ទៀតទេ។ ទី២ យន្តការអន្តរជាតិ ក៏យើងប្រើដែរ គឺយើងបានរៀបចំពាក្យបណ្ដឹងដាក់ទៅអង្គការអន្តរជាតិការងារ ហៅកាត់ថា អាយឡូ អំពីការរំលោភធ្ងន់ធ្ងរទៅលើសេរីភាពសហជីព ជាពិសេសអនុសញ្ញាស្នូលលេខ ៨៧ និង ៩៨ ដែលកម្ពុជាបានផ្ដល់សច្ចាប័ន។ យើងរង់ចាំមើលបន្តទៀត ថាតើកម្ពុជាយើងនឹងដោះស្រាយបញ្ហាហ្នឹងយ៉ាងដូចម្ដេចជាមួយអន្តរជាតិ ហើយណាហ្គាវើលដ៍នឹងដោះស្រាយបញ្ហាហ្នឹងយ៉ាងម៉េចទៀត នៅពេលបុគ្គលិកចេញធ្វើកូដកម្ម»។
វិទ្យុអាស៊ីសេរី មិនអាចសុំការឆ្លើយតបរឿងនេះ ពីប្រធានប្រតិបត្តិបុគ្គលិករបស់ក្រុមហ៊ុនណាហ្គាវើលដ៍ (Naga World) លោក ម៉ៃ ង៉ៃ (Mike Ngai) និងអ្នកនាំពាក្យក្រសួងការងារលោក ហេង សួរ បានទេ នៅថ្ងៃទី១ ខែធ្នូ ដោយហៅទូរស័ព្ទចូល តែពុំមានអ្នកទទួល។
ក្រុមហ៊ុនកាស៊ីណូ ណាហ្គាវើលដ៏ (Naga World) ដែលធ្លាប់ជាប់ឈ្មោះមិនល្អ ក្នុងបញ្ជីក្រុមហ៊ុនរំលោភសិទ្ធិការងារ អះអាងថា ខ្លួនមានបញ្ហាលំបាកផ្នែកហិរញ្ញវត្ថុ ទើបឈានដល់ការបញ្ឈប់បុគ្គលិកជាង ១ពាន់ ៣រយនាក់ ឬជិត២០% នៃបុគ្គលិកក្រុមហ៊ុនបែបនេះ។
ផ្ទុយពីការអះអាងនេះ ខាងសហជីពឲ្យដឹងថា ក្រុមហ៊ុនណាហ្គាវើលដ៍(NAGA WORLD) នៅតែអាចរកបានប្រាក់ចំណូលជាង ៩០០ លានដុល្លារ ហើយចំណេញបានជាង ១០០ លាន (១០២) ដុល្លារ ក្នុងឆ្នាំ២០២០ កន្លងទៅ និងកំពុងចំណាយលុយសាងសងណាហ្គាវើលដ៍៣ថែមទៀត នៅពេលដែលប្រទេសកម្ពុជាជួបវិបត្តិនៃជំងឺកូវីដ-១៩។
សហជីពថា ការអះអាងបែបនោះ គឺជារឿងមិនសមហេតុផល និងមិនអាចទទួលយកបានឡើយ។ សហជីពយល់ថា ការបញ្ឈប់បុគ្គលិកជាសមាជិកសហជីព និងមេដឹកនាំសហជីពដែរនោះ គឹជាការរើសអើង និងមិនចង់ឲ្យមានវត្តមានសហជីពនៅក្នុងក្រុមហ៊ុនតទៅទៀត ព្រោះធ្វើឲ្យបុគ្គលិកទទួលបានប្រយោជន៍ការងារច្រើនពីក្រុមហ៊ុន។
គិតមកដល់ពេលនេះ សហជីព ឲ្យដឹងថា នៅសល់បុគ្គលិកជិត ៤រយនាក់ (៣៧៣) ក្នុងចំណោម ១ពាន់ ៣នាក់(១.៣២៩) មិនព្រមទទួលយកសំណងពីក្រុមហ៊ុនឡើយ ដោយសារតែការទូទាត់សំណងនោះ មិនត្រឹមត្រូវតាមច្បាប់ស្ដីពីការងារ។
ក្រុមអង្គការសង្គមស៊ីវិលស្នើដល់ប្រធានក្រុមហ៊ុនណាហ្គាវើលដ៍ គួរធ្វើការចរចាជាមួយតំណាងសហជីព ដើម្បីស្វែងរកដំណោះស្រាយសមស្របមួយ ដែលអាចទទួលយកបានទាំងពីភាគី ប្រកបដោយភាពស្មោះត្រង់ និងបញ្ឈប់រាល់ការរើសអើង និងធ្វើទុក្ខបុកម្នេញទៅលើសហជីព៕
