ដោយ អ៊ុំ រង្សី RFA 2016-05-17
ក្រុមអង្គការសង្គមស៊ីវិលដែលការពារសិទ្ធិមនុស្សនៅកម្ពុជា លើកឡើងថា ការរើសអើងជាឧបសគ្គធ្វើឲ្យអ្នកស្រឡាញ់ភេទដូចគ្នាប្រឈមនឹងបញ្ហានានា។ ទន្ទឹមគ្នានេះ សង្គមស៊ីវិលអំពាវនាវឲ្យរដ្ឋាភិបាលកម្ពុជា ចាត់វិធានការក្នុងការលើកកម្ពស់ និងការពារសិទ្ធិរបស់អ្នកស្រឡាញ់ភេទដូចគ្នាដើម្បីបញ្ឈប់រាល់ការរើសពីសង្គម។
ក្រុមអង្គការសង្គមស៊ីវិលដែលការពារសិទ្ធិមនុស្សនៅកម្ពុជា បានជំរុញឲ្យរដ្ឋាភិបាលបង្កើតគោលនយោបាយការពារសិទ្ធិអ្នកស្រឡាញ់ភេទដូចគ្នាមិនឲ្យប្រឈមនឹងឧបសគ្គផ្សេងៗក្នុងការចូលរួមក្នុងកិច្ចការសង្គម ដូចជា សេដ្ឋកិច្ច សេវាសុខភាព ការអប់រំ និងការងារ។
ការលើកឡើងរបស់ក្រុមអង្គការសង្គមស៊ីវិលដែលការពារសិទ្ធិអ្នកស្រឡាញ់ភេទដូចគ្នានៅពេលនេះ ធ្វើឡើងស្របពេលខួបលើកទី១២ ទិវាអន្តរជាតិប្រឆាំងនឹងការរើសអើងលើអ្នកស្រលាញ់ភេទដូចគ្នានៅថ្ងៃទី១៧ ខែឧសភា។
ប្រធានសម្របសម្រួលបណ្ដាញអ្នកស្រឡាញ់ភេទដូចគ្នា ដែលបានចូលរួមក្នុងសន្និសីទសារព័ត៌មានលោក គង់ ប៊ុនថន ឲ្យដឹងថា អ្នកស្រឡាញ់ភេទដូចគ្នា គឺជាធនធានមនុស្សនៅក្នុងគ្រួសារ និងសង្គមជាតិ។ ពួកគេត្រូវមានសិទ្ធិការពារ និងទទួលស្គាល់ពីមជ្ឈដ្ឋាននានា។
លោកបន្តថា រដ្ឋាភិបាលត្រូវតែមានច្បាប់ការពារអ្នកស្រឡាញ់ភេទដូចគ្នា និងបញ្ឈប់ការរើសអើងទាំងឡាយឲ្យស្របតាមច្បាប់ ដែលទទួលស្គាល់ថា មនុស្សគ្រប់រូបមានសិទ្ធិដូចគ្នា៖ «គិតថា រដ្ឋាភិបាលគួរតែពិចារណាលើចំណុចនេះ ព្រោះថា គាត់មានច្បាប់ការពារចំពោះជនពិការ ហើយគាត់មានច្បាប់ការពារចំពោះអ្នកផ្ទុកមេរោគអេដស៍ហើយ ដូច្នេះវាដល់ពេលហើយ ដែលកម្ពុជា គួរមានច្បាប់ការពារអ្នកស្រឡាញ់ភេទដូចគ្នា ដើម្បីឲ្យពួកគាត់មានសិទ្ធិដូចមនុស្សទូទៅដែរ»។
ជាមួយគ្នានេះ នាយកប្រតិបត្តិអង្គការខាណា លោក ជួប សុខចំរើន មានប្រសាសន៍ដែរថា អ្នកស្រឡាញ់ភេទដូចគ្នា នៅតែប្រឈមនឹងបញ្ហារើសអើងលើសេវាសុខភាព សេវាទទួលបានការអប់រំ ឱកាសការងារ សេវាផ្លូវច្បាប់នានា និងសិទ្ធិមិនស្មើគ្នាជាមួយមនុស្សទូទៅនៅឡើយ។
លោកបញ្ជាក់ថា បញ្ហានេះមកពីការគាំទ្រផ្នែកផ្លូវច្បាប់ចំពោះអ្នកស្រឡាញ់ភេទដូចគ្នានៅមានកម្រិត៖ «យើងឃើញថា កន្លងមកតែងមានការធ្វើទុក្ខបុកម្នេញលើពួកគាត់ ដូចជា គាត់មានដៃគូស្នេហាតែងតែរិះគន់ តិះដៀលគាត់ ហើយពេលពួកគាត់ត្រូវការការពារគិតគូរពួកគាត់ តែមិនមានច្បាប់ការពារ ហើយគ្មានអ្នកណាដោះស្រាយជូនគាត់ អ៊ីចឹងគួរតែយកចិត្តទុកដាក់លើគាត់ខ្លះទៅ»។
ចំណែកឯតំណាងអាជ្ញាធរចូលរួមសន្និសីទព័ត៌មាននោះ លោក ទេព បុរី ជំទប់ទី១ ឃុំក្រោលគោ ស្រុកស្វាយជ្រំ ខេត្តស្វាយរៀង មានប្រសាសន៍ថា ការរើសអើងអ្នកស្រឡាញ់ភេទដូចគ្នា លោកថា មិនត្រឹមតែប៉ះពាល់ដល់សុខភាពផ្លូវចិត្តអ្នកស្រឡាញ់ភេទដូចគ្នាប៉ុណ្ណោះទេ វាបន្តប៉ះពាល់ដល់ការអភិវឌ្ឍសង្គមជាតិថែមទៀត។ លោកជំរុញឲ្យរដ្ឋាភិបាលលើកកម្ពស់សិទ្ធិអ្នកស្រឡាញ់ភេទដូចគ្នា ព្រោះពួកគេក៏ជាធនធានមនុស្សដ៏សំខាន់ដែរ៖ «សំណូមពរទៅដល់រដ្ឋាភិបាល តាមកាលៈទេសៈណាអាចជួយបានគួរតែជួយទៅ សូមការប្រែច្បាប់ទៅ អាចផ្ដល់ឯកសារអាពាហ៍ពិពាហ៍ឲ្យពួកគាត់អាចរៀបការបាន ផ្ដល់អត្តសញ្ញាណប័ណ្ណ កុំរើសអើងគាត់ឲ្យគាត់មានសិទ្ធិ ទទួលបានឯកសារច្បាប់ដូចមនុស្សទូទៅដែរ»។
សេចក្ដីថ្លែងការណ៍រួមរបស់សង្គមស៊ីវិលចំនួន ២០ស្ថាប័ន ដែលបានផ្សព្វផ្សាយនៅក្នុងទិវាអន្តរជាតិប្រឆាំងនឹងការរើសអើងលើអ្នកស្រលាញ់ភេទដូចគ្នា នៅថ្ងៃទី១៧ ខែឧសភា ឆ្នាំ២០១៦ បង្ហាញដែរថា អ្នកស្រឡាញ់ភេទដូចគ្នាជាង ៨០% នៅកម្ពុជា កំពុងប្រឈមនឹងការរើសអើងអត្តសញ្ញាណយេនឌ័ររបស់ពួកគេ។ ការរើសអើងនេះ ធ្វើឲ្យប៉ះទង្គិចផ្លូវអារម្មណ៍ និងកើតមានជំងឺបាក់ទឹកចិត្ត។
សេចក្ដីថ្លែងការណ៍រួមក៏បានផ្ដល់អនុសាសន៍ទៅរដ្ឋាភិបាលកម្ពុជា ដើម្បីការពារសិទ្ធិអ្នកស្រឡាញ់ភេទដូចគ្នាគឺរដ្ឋាភិបាលត្រូវបញ្ឈប់ការរើសអើង ជំរុញការអប់រំអ្នកស្រឡាញ់ភេទដូចគ្នា ផ្ដល់ភាពស្របច្បាប់ដល់អាពាហ៍ពិពាហ៍ភេទដូចគ្នា និងការដាក់បញ្ចូលអត្ថសញ្ញាណយេនឌ័រ ក្នុងឯកសារច្បាប់ជាដើម៕