CNRP កំពុងរងគ្រោះដូចហ៊្វុនស៊ិនប៉ិច តែរឹងមាំជាង
| Image may be NSFW. Clik here to view.  |
| Photo source Thmey Thmey |
តំណាងរាស្ត្រ និងសកម្មជនគណបក្សសង្គ្រោះជាតិ បានរងការចាប់ខ្លួនជាបន្តបន្ទាប់។ ចំណែកមេដឹកនាំគណបក្សវិញ ក៏កំពុងរងទុកម្នេញដោយម្នាក់កំពុងគេចពីការចាប់ខ្លួនដែលកំពុងរស់នៅក្រៅប្រទេស និងម្នាក់ទៀតប្រឈមរងការស៊ើបអង្កេតរឿងអាស្រូវស្នេហា និងបទចោទបរិហាកេរ្តិ៍។ អ្នកវិភាគមើលឃើញថា គណបក្សសង្គ្រោះជាតិ កំពុងរងគ្រោះដូចគណបក្សហ្វ៊ុនស៊ិនប៉ិច តែគណបក្សប្រឆាំងមួយនេះ មិនទាន់អាចវាសនាដូចគណបក្សហ្វ៊ុនស៊ិនប៉ិចឡើយ។ លោក មាស នី អ្នកវិភាគនយោបាយ មើលឃើញថា គំនាបនយោបាយដែលគណបក្សសង្គ្រោះជាតិកំពុងទទួលរងរយៈពេលជាង២ឆ្នាំមកនេះ គឺជារូបភាពរងគ្រោះដែលធ្លាប់បានកើតឡើងលើគណបក្សហ្វ៊ុនស៊ិនប៉ិច ។ លោកថា ការវាយបំបាក់ក្បាលម៉ាស៊ីនគណបក្សសង្គ្រោះជាតិ គឺស្ដែងចេញមកជាស្ទីលតែមួយ តែរូបភាពផ្សេងខុសគ្នាខុសគ្នាប៉ុណ្ណោះ ។ សម្រាប់លោក មាស នី គណបក្សសង្គ្រោះជាតិមិនទាន់មានវាសនាដូចគណបក្សហ្វ៊ុនស៊ិនប៉ិចឡើយ។
ថ្លែងប្រាប់សារព័ត៌មានថ្មីៗ អ្នកវិភាគរូបនេះបានបញ្ជាក់ដូច្នេះថា៖«ចាប់តាំងពីពេលចូលសភាមក គណបក្សសង្គ្រោះជាតិកំពុងរងគ្រោះមិនខុសពីគណបក្សហ្វ៊ុនស៊ិនប៉ិច ដូចអាណត្តិមុនឡើយ ដោយគេគ្រាន់តែប្ដូរសាច់រឿងប្លែកៗគ្នា ផ្សេងៗគ្នាដែលធ្វើឲ្យខូចខាត់ បែកបាក់ក្បាលម៉ាស៊ីនដឹកនាំបក្ស។ តែគណបក្សសង្គ្រោះជាតិមិនដឹងថា អាចទ្រាំបានប៉ុណ្ណា មានលទ្ធភាពបានប៉ុណ្ណាទេ។ ដូចនេះគណបក្សនេះគួរតែត្រៀមក្បាលម៉ាស៊ីនដឹកនាំ ជាក្រុមឲ្យបានល្អដើម្បីឲ្យពួកគេចេះធ្វើការរួមគ្នា កុំរៀបចំបង្គោលតែមួយដូចលោក កឹម សុខា និងលោក សម រង្ស៊ី»។ ទាំងលោក មាស នី ទាំងលោក រស់ រ៉ាវុធ មើលឃើញថា ទោះជាគណបក្សសង្គ្រោះជាតិកំពុងរងគ្រោះដូចគណបក្សហ្វ៊ុនស៊ិនប៉ិច ក្តី តែគណបក្សសង្គ្រោះជាតិ មានភាពរឹងមាំនិងមិនទន់ជ្រាយដូចគណបក្សហ្វ៊ុនស៊ិនប៉ិចនេះទេ។ លោក រស់ រ៉ាវុធ មើលឃើញថា មូលហេតុដែលគណបក្សសង្គ្រោះជាតិមានភាពរឹងមាំ មិនងាយចាញ់ច្រាបដៃគូរប្រជែងខ្លួននេះ ព្រោះគណបក្សនេះមានគោលនយោបាយច្បាស់លាស់ និងចេះគ្រប់គ្រងកសាងអំណាចមូលដ្ឋានបានត្រឹមត្រូវ ដែលមិនងាយបែកបាក់គ្នាឡើយ។ បើតាមអ្នកវិភាគរូបនេះ អ្វីដែលធ្វើឲ្យគណបក្សសង្គ្រោះជាតិ មិនទន់ជ្រាយ និងមិនអាចត្រូវគេវាយបំបាក់បានដូចគណបក្សហ្វ៊ុនស៊ិនប៉ិចនោះ គឺគណបក្សប្រឆាំងមួយនេះជ្រើសរើសផ្លូវត្រូវ ដោយចូលក្នុងរដ្ឋសភា មិនចូលរដ្ឋាភិបាល ។
លោក រស់ រ៉ាវុធ បានបញ្ជាក់ដូច្នេះថា៖«គណបក្សសង្គ្រោះជាតិនៅរឹងមាំជាងហ្វ៊ុនស៊ិនប៉ិច ដោយរឹងមាំខុសគ្នាទាំងពេលវេលា ទាំងអ្នកគាំទ្រ ទាំងគោលនយោបាយ និងការចូលរួម។ ចំណុចខ្លាំងគណបក្សសង្គ្រោះជាតិ គឺការកសាងគោលនយោបាយរួមគ្នារបស់លោក សម រង្ស៊ី លោក កឹម សុខា សមាជិកគណបក្សមានការប្ដេជ្ញា លើកលែងមនុស្សតិចតួចចាកចេញកន្លងមក ហើយគណបក្សនេះចេះកសាងអំណាចមូលដ្ឋានរឹងមាំ។ ហើយគណប្រឆាំងនេះ ចូលតែក្នុងរដ្ឋសភា មិនដូចគណបក្សហ្វ៊ុនស៊ិនប៉ិច ដែលចូលក្នុងរដ្ឋាភិបាលតែមួយ»។ តែយ៉ាងណាលោក អ៊ូ វីរៈ មើលឃើញថា គណបក្សសង្គ្រោះជាតិមិនទាន់មានភាពរឹងមាំឡើយ។ អ្នកវិភាគរូបនេះ ធ្លាប់ប្រាប់សារព័ត៌មានតាមការមើលឃើញរបស់លោកថា គណបក្សសង្គ្រោះជាតិអាចនឹងបាក់បែកផ្ទៃក្នុងដូចគណបក្សហ្វ៊ុនស៊ិនប៉ិចដែរ បើសិនជាគណបក្សនេះចាញ់ឆ្នោតនៅអាណត្តិក្រោយទៀត។ ក្នុងរយៈពេលជាង២ឆ្នាំមកនេះ បញ្ហានយោបាយនៅតែបន្តមានភាពតានតឹងដដែល ហើយតំណាងរាស្ត្រ និងសកម្មជនគណបក្សសង្គ្រោះជាតិ បន្តជាប់ឃុំ និងចាប់ខ្លួន ។ប្រធានគណបក្សសង្គ្រោះជាតិឯកឧត្តម សម រង្ស៊ី កំពុងគេចខ្លួននៅក្រៅប្រទេសអស់រយៈពេលជិត៦ខែមកហើយ ក្រោយពីមានរឿងក្តីក្តាំជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ហើយត្រូវតុលាការ សម្រេចឲ្យជាប់ពន្ធនាគារ ២ ឆ្នាំ ។ ចំណែកឯកឧត្តម កឹម សុខា អនុប្រធានគណបក្សសង្គ្រោះជាតិ ក៏កំពុងប្រឈមមុខនឹងបញ្ហាចម្រូងសម្រាស់ដែលគេចោទថា មានរឿងអាស្រូវស្នេហា និងរងបណ្ដឹងចោទពីបទ បរិហាកេរ្តិ៍ ផងដែរ៕
