ដោយ ម៉ៅ សុធានី RFA 2016-05-26
កម្ពុជា នឹងបញ្ជូនមន្ត្រីអគ្គនាយកដ្ឋានអន្តោប្រវេសន៍ ទៅជំរំជនភៀសខ្លួនប៉ាពូ ញូវហ្គីណេ (Papua New Guinea) និងកោះណាវរូ (Nauru) នៅដើមសប្ដាហ៍ខែមិថុនា ដើម្បីពិនិត្យឡើងវិញករណីជនភៀសខ្លួនស្វែងរកសិទ្ធិជ្រកកោននៅប្រទេសអូស្ត្រាលី និងជួបសម្ភាសន៍ជនភៀសខ្លួន ២នាក់ទៀតដែលស្ម័គ្រចិត្តមករស់នៅក្នុងប្រទេសកម្ពុជា។
ប្រធានអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក តាន់ សុខវិជ្ជា មានប្រសាសន៍ប្រាប់ទីភ្នាក់ងារព័ត៌មានរ៉យទ័រ (Reuters) កាលពីថ្ងៃពុធ ទី២៥ ឧសភា ថា ក្រុមរបស់លោកនឹងជួបពិភាក្សាជាមួយមន្ត្រីក្រសួងអន្តោប្រវេសន៍អូស្ត្រាលី ដើម្បីពិនិត្យកិច្ចព្រមព្រៀងទទួលជនភៀសខ្លួនឡើងវិញ។ កាលពីឆ្នាំ២០១៤ រដ្ឋាភិបាលកម្ពុជា បានចុះកិច្ចព្រមព្រៀងជាមួយរដ្ឋាភិបាលអូស្ត្រាលី យល់ព្រមទទួលជនភៀសខ្លួនពីជំរំណាវរូ ជាថ្នូរនឹងប្រាក់ចំនួន ៤០លានដុល្លារអូស្ត្រាលី ឬស្មើប្រមាណ ៣៥លានដុល្លារអាមេរិក ប៉ុន្តែក្រោយមក កម្ពុជា គំរាមដកខ្លួនពីកិច្ចព្រមព្រៀងនោះ។
រហូតមកដល់បច្ចុប្បន្ន មានជនភៀសខ្លួន ៥នាក់ បានស្ម័គ្រចិត្តមករស់នៅប្រទេសកម្ពុជា ប៉ុន្តែ ៣នាក់ ក្នុងនោះមានបុរសម្នាក់ជាជនជាតិភាគតិចរ៉ូហ៊ីងយ៉ា (Rohingya) ពីប្រទេសមីយ៉ាន់ម៉ា និងពីរនាក់ប្ដីប្រពន្ធជនជាតិអ៊ីរ៉ង់ (Iran) បានសម្រេចចិត្តវិលត្រឡប់ទៅប្រទេសកំណើតរបស់ខ្លួនវិញ។ជនភៀសខ្លួន ២នាក់ដែលកំពុងរស់នៅក្នុងក្រុងភ្នំពេញ គឺជនជាតិរ៉ូហ៊ីងយ៉ា និងអ៊ីរ៉ង់។
ក្រុមអង្គការសិទ្ធិមនុស្សជាតិ និងអន្តរជាតិ បានថ្កោលទោសទង្វើរដ្ឋាភិបាលអូស្ត្រាលី ដែលយល់ព្រមបញ្ជូនជនភៀសខ្លួនមកកម្ពុជា ដែលជាប្រទេសក្រីក្រ និងរងការរិះគន់ញឹកញាប់ជុំវិញការរំលោភសិទ្ធិមនុស្ស៕