Sam Rainsy | ២៦ ឧសភា ២០១៦ / 26 May 2016, 12:00 - Police forces investigating CNRP headquarters (*)
ថ្ងៃត្រង់នេះ កម្លាំងអន្តរាគមន៍អគ្គស្នងការនគរបាលជាតិ បានមកឡោមព័ទ្ធស្នាក់ការកណ្តាលគណបក្សសង្គ្រោះជាតិ បន្ទាប់ពីបានឃាត់រថយន្ត លោក កឹម សុខា នៅលើផ្លូវនរោត្តម ក្បែរសាលាពញាហុក។ តែពួកគេបានដកថយទៅវិញ។
(*) At noon government security forces surrounded and penetrated en force into the CNRP Phnom Penh headquarters in an apparent attempt to arrest Kem Sokha. They finally withdrew after a while.
ដោយ ឡេង ម៉ាលី RFA 2016-05-26
សមត្ថកិច្ចប្រដាប់ដោយអាវុធគ្រប់ដៃប្រមាណ២០នាក់ សម្រុកចូលទីស្នាក់ការកណ្ដាលបក្សសង្គ្រោះជាតិ ចាក់អង្រែលើ នៅថ្ងៃទី២៦ ឧសភា នាម៉ោងប្រមាណ១២កន្លះ ដោយមិនបញ្ជាក់ពីមូលហេតុអ្វីឡើយ។
តែកងកម្លាំងប្រដាប់អាវុធទាំងនោះ បានចេញមកវិញភ្លាមៗក្រោយមន្ត្រីបក្សសង្គ្រោះជាតិ សួរនាំពីលិខិតអនុញ្ញាតចូលផ្ទះរបស់ពលរដ្ឋ និងធ្វើសកម្មភាពអ្វីមួយនោះ។
មុនសកម្មភាពសម្រុកចូលទីស្នាក់ការបក្សនេះ រថយន្តរបស់លោក កឹម សុខា ប្រធានស្ដីទីគណបក្សសង្គ្រោះជាតិ ត្រូវបានសមត្ថកិច្ចប្រដាប់ដោយអាវុធ ស្ទាក់ឃាត់នៅលើផ្លូវនរោត្តម ក្បែរសាលាពញាហុក។ ក្រោយមកសមត្ថកិច្ចក៏បានអនុញ្ញាតឲ្យរថយន្តទៅដោយធម្មតា ក្រោយពិនិត្យក្នុងរថយន្តនោះ មិនឃើញលោក កឹម សុខា។
មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ប្រាប់វិទ្យុអាស៊ីសេរី ថា ក្នុងរថយន្តដែលសមត្ថកិច្ចឃាត់នោះ គឺមានប្រពន្ធលោក កឹម សុខា ខណៈលោក កឹម សុខា នៅទីស្នាក់ការកណ្ដាលបក្សនៅឡើយ។ភ្លាមៗនេះ គណបក្សសង្គ្រោះជាតិចេញប្រកាសព័ត៌មានមួយស្ដីពីការឃាត់រថយន្តរបស់លោក កឹម សុខា ផងដែរ។
លោក កឹម សុខា មិនបានចូលបំភ្លឺនៅតុលាការក្រុងភ្នំពេញ ចំនួន៣លើកហើយ ដោយ២លើកត្រូវបំភ្លឺក្នុងនាមជាសាក្សី នៃបណ្ដឹងសញ្ចារកម្មលើអ្នកនាង ខុម ចាន់តារាទី ហៅស្រីមុំ និងមួយករណីទៀតទាក់ទងនឹងបណ្ដឹងរបស់កញ្ញា ធី សុវណ្ណថា ពាក់ព័ន្ធនឹងបទបរិហារកេរ្តិ៍។
សូមស្ដាប់អ្នកយកព័ត៌មាននៃវិទ្យុអាស៊ីសេរី លោក ឡេង ម៉ាលី រាយការណ៍អំពីព័ត៌មាននេះពិស្ដារ!
