VAYO, 08-06-2016 7:38 pm ដោយ៖ អឿន ភារ៉ា
លោកខៀវ កាញារីទ្ធ រដ្ឋមន្ដ្រីក្រសួងព័ត៌មាន បានឱ្យដឹងថា ក្រសួងបានរៀបចំបញ្ជីឈ្មោះអ្នកកាសែតដែលត្រូវចូលរួមក្នុងជំនួបរវាងសម្ដេចហ៊ុន សែន នាយករដ្ឋមន្ដ្រីនៃកម្ពុជា ដោយជ្រើសរើសយកតែសារព័ត៌មានចេញផ្សាយជាប្រចាំរួមមាន វិទ្យុ ទូរទស្សន៍ កាសែត ទស្សនាវដ្ដី និងគេហទំព័រដោយ ក្នុងមួយអង្គភាពត្រូវយកចំនួនពីរនាក់។ ហើយចំនួនអ្នកកាសែតដែលមកពីស្ថាប័នផ្សេងៗនោះ មិនឱ្យលើសពី៤០០នាក់នោះទេ។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា នាពេលថ្មីៗនេះ។
សូមបញ្ជាក់ថា សម្ដេចហ៊ុន សែន បានឯកភាពដោយក្នុងមួយឆ្នាំ ជួបជុំជាមួយអ្នកកាសែតម្ដង ហើយសម្រាប់ឆ្នាំនេះ គ្រោងធ្វើនៅខែកក្កដា ឬខែកញ្ញាខាងមុខនេះ។ ប៉ុន្ដែសម្រាប់ឆ្នាំក្រោយ និងឆ្នាំបន្ដបន្ទាប់ទៀត ការជួបជុំរវាងនាយករដ្ឋមន្ដ្រី និងអ្នកកាសែត ត្រូវជ្រើសរើសយកថ្ងៃដែលរដ្ឋសភាអនុម័តជ្រើសរើសសម្ដេចហ៊ុន សែន ឡើងធ្វើជានាយករដ្ឋមន្ដ្រី ដោយកំណត់យក ថ្ងៃនេះជារៀងរាល់ឆ្នាំ៕