ដោយ ហង្ស សាវយុត RFA 2016-07-25
បណ្ដាញសមាគម និងអង្គការក្រៅរដ្ឋាភិបាលនៅខេត្តឧត្តរមានជ័យ បានកោះហៅសមាជិកជាង ៣០អង្គភាព ឲ្យជួបប្រជុំនៅល្ងាចថ្ងៃច័ន្ទ ទី២៥ ខែកក្កដា ដើម្បីពិភាក្សាថា តើគួរធ្វើរបាយការណ៍អំពីសកម្មភាពរបស់ខ្លួនរបៀបណា ដើម្បីដាក់ជូនទៅប៉ូលិសឲ្យបានជ្រាប។
ការកោះប្រជុំនេះ បានធ្វើឡើងបន្ទាប់ពីប៉ូលិសសន្តិសុខផ្ទៃក្នុងរបស់ស្នងការដ្ឋាននគរបាលខេត្តឧត្តរមានជ័យ ស្នើឲ្យក្រុមអង្គការក្រៅរដ្ឋាភិបាលទាំងនោះ រាយការណ៍រាល់សកម្មភាពរបស់ពួកគេទៅឲ្យសមត្ថកិច្ចជាប្រចាំ។
ក្រុមអង្គការសិទ្ធិមនុស្សមួយចំនួន បានរិះគន់ថា ប៉ូលិសនៃស្នងការដ្ឋាននគរបាលខេត្តឧត្តរមានជ័យ ហាក់មានបំណងរឹតបន្តឹងទៅលើការងាររបស់សមាគម និងអង្គការក្រៅរដ្ឋាភិបាល ច្រើនជាងការចាត់វិធានការតាមការពារសន្តិសុខនៅក្នុងខេត្តនោះ។
ការរិះគន់ បានធ្វើឡើងបន្ទាប់ពីប៉ូលិសផ្នែកសន្តិសុខផ្ទៃក្នុងរបស់ស្នងការដ្ឋាននគរបាលខេត្តឧត្តរមានជ័យ បានស្នើឲ្យសមាគម និងអង្គការក្រៅរដ្ឋាភិបាលទាំងអស់ដែលកំពុងធ្វើការងារនៅក្នុងខេត្ត ត្រូវធ្វើរបាយការណ៍អំពីសកម្មភាពការងារប្រចាំថ្ងៃជូនទៅសមត្ថកិច្ចឲ្យបានដឹង។
ប្រធានបណ្ដាញសមាគម និងអង្គការក្រៅរដ្ឋាភិបាលនៅខេត្តឧត្តរមានជ័យ គឺលោក ហេង គឹមនឿម។ លោកមានប្រសាសន៍ថា នៅរសៀលថ្ងៃច័ន្ទ ទី២៥ ខែកក្កដា គឺលោកបានជួបប្រជុំជាមួយសមាគម និងអង្គការក្រៅរដ្ឋាភិបាលជាង ៣០អង្គភាព ដើម្បីជជែកពិភាក្សាគ្នាថា តើគួរធ្វើរបាយការណ៍យ៉ាងណាអំពីសកម្មភាពការងារប្រចាំថ្ងៃ ដាក់ជូនទៅសមត្ថកិច្ចប៉ូលិសឲ្យបានដឹង។
លោក ហេង គឹម នឿម បញ្ជាក់ទៀតថា ប៉ូលិសខាងសន្តិសុខផ្ទៃក្នុងរបស់ស្នងការដ្ឋាននគរបាលខេត្តឧត្តរមានជ័យ ចង់ឲ្យសមាគម និងអង្គការទាំងអស់នៅក្នុងខេត្តនេះ ធ្វើរបាយការណ៍ប្រចាំសប្ដាហ៍អំពីសកម្មភាពរបស់អង្គការទាំងឡាយ ជូនទៅសមត្ថកិច្ចឲ្យដឹងថា តើអង្គការទាំងនោះធ្វើការងារអ្វីខ្លះ?៖ «អង្គការសមាគមខ្លះគាត់ធ្វើការនៅតំបន់ដាច់ស្រយាលឆ្ងាយ ដូច្នេះបើសិនជាប៉ូលិសពិតជាយកចិត្តទុកដាក់ទៅសុវត្ថិភាពរបស់អង្គការមែន បើទោះជាធ្វើរបាយការណ៍ជូនក៏មិនអីដែរ ប៉ុន្តែខ្លាចក្រែងតែយកទៅដើម្បីតាមដានសកម្មភាពរបស់អង្គការ»។
ខេត្តឧត្តរមានជ័យ បច្ចុប្បន្ន មានសមាគម និងអង្គការក្រៅរដ្ឋាភិបាលជាង ៣០ស្ថាប័នដែលកំពុងធ្វើការងារសកម្មពាក់ព័ន្ធនឹងវិស័យសុខាភិបាល ផ្នែកអប់រំ ផ្នែកកសិកម្ម សុខភាព ទឹកស្អាត ព្រមទាំងផ្នែកការពារសិទ្ធិមនុស្ស ជាដើម។
ទោះជាយ៉ាងណា វិទ្យុអាស៊ីសេរី មិនអាចទាក់ទងមន្ត្រីប៉ូលិសសន្តិសុខផ្ទៃក្នុងរបស់ស្នងការដ្ឋាននគរបាលខេត្តឧត្តរមានជ័យ ដើម្បីសុំការពន្យល់ជុំវិញរឿងនេះបានថាយ៉ាងណានៅឡើយ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន មានប្រសាសន៍ថា ការដែលប៉ូលិសស្នើឲ្យអង្គការក្រៅរដ្ឋាភិបាលធ្វើរបាយការណ៍អំពីសកម្មភាពការងារប្រចាំថ្ងៃ ប្រចាំខែ ដាក់ជូនសមត្ថកិច្ចនោះ គឺជារូបភាពនៃការតាមដានដោយមានបំណងរឹតបន្តឹងសេរីភាពការងារ៖ «ដូចជារឹតបន្តឹងទៅលើអង្គការសង្គមស៊ីវិលមួយចំនួនខ្លាំងពេក។ ខាងអង្គការមួយចំនួនដូចជាអាដហុក គឺមានការិយាល័យកណ្ដាលសម្រាប់ធ្វើរបាយការណ៍ដាក់ជូនទៅក្រសួងមហាផ្ទៃ ហើយ»។
មន្ត្រីស៊ើបអង្កេតជាន់ខ្ពស់របស់អង្គការសិទ្ធិមនុស្សលីកាដូ (LICADHO) លោក អំ សំអាត ក៏យល់ឃើញដូចគ្នានឹងសមាគមការពារសិទ្ធិមនុស្សអាដហុក ដែរ។ លោក អំ សំអាត មានប្រសាសន៍ថា នៅក្នុងច្បាប់ស្ដីពីសមាគម និងអង្គការមិនមែនរដ្ឋាភិបាល គឺគេនិយាយអំពីរបាយការណ៍ ត្រូវផ្ញើក្នុងខែទីពីរនៃដើមឆ្នាំនីមួយៗ មិនបានតម្រូវឲ្យផ្ញើរបាយការណ៍ប្រចាំថ្ងៃទេ។ លោកយល់ថា បញ្ហាដែលប៉ូលិសខេត្តឧត្តរមានជ័យ កំពុងឲ្យអង្គការធ្វើរបាយការណ៍ប្រចាំថ្ងៃ ប្រចាំខែដាក់ជូនសមត្ថកិច្ចនោះ វាជារូបភាពនៃការគំរាមកំហែង និងរឹតត្បិតទៅលើសកម្មភាពរបស់អង្គការក្រៅរដ្ឋាភិបាល ច្រើនជាងការតាមការពារសន្តិសុខ។
ការជួបជជែកគ្នាពេញមួយល្ងាចថ្ងៃច័ន្ទ ទី២៥ កក្កដា គឺក្រុមអង្គការក្រៅរដ្ឋាភិបាលមិនទាន់ធ្វើតាមអ្វីដែលប៉ូលិសខេត្តឧត្តរមានជ័យ ចង់បាននោះទេ គឺសមាគម និងអង្គការក្រៅរដ្ឋាភិបាលជាច្រើនបានជំរុញឲ្យសមត្ថកិច្ចមូលដ្ឋាន ត្រូវយកច្បាប់ស្ដីពីសមាគម និងអង្គការមិនមែនរដ្ឋាភិបាលមកអនុវត្ត៕