ដោយ អ៊ុំ រង្សី RFA 2016-07-29
អង្គការខាណា លើកឡើងថា ក្រុមងាយរងគ្រោះដោយសារជំងឺអេដស៍ នៅតែរងការមាក់ងាយមិនផ្ដល់តម្លៃ និងមិនមានឱកាសស្មើភាពគ្នាចំពោះការងារ និងការសិក្សាក្នុងសង្គម ពិសេសមិនទាន់ទទួលបានសេវាថែទាំសុខភាពបានពេញលេញនៅឡើយ។ ទន្ទឹមគ្នានេះ អង្គការខាណា ប្ដេជ្ញាជំរុញក្រុមងាយរងគ្រោះដោយសារជំងឺអេដស៍ឲ្យទទួលបានសិទ្ធិពេញលេញឲ្យសម្រេចតាមទិសដៅរបស់ខ្លួននៅឆ្នាំ២០២០។
អង្គការខាណា (Khana) ដែលជាសង្គមស៊ីវិលធ្វើការពាក់ព័ន្ធនឹងក្រុមងាយរងគ្រោះដោយសារជំងឺអេដស៍រំពឹងថា ផែនការយុទ្ធសាស្ត្ររយៈពេល ៥ឆ្នាំ គិតចាប់ពីឆ្នាំ២០១៦ ដល់ឆ្នាំ២០២០ នឹងអាចឈានទៅលុបបំបាត់ការរីករាលដាលនៃមេរោគអេដស៍ ជំងឺអេដស៍ ព្រមទាំងចូលរួមចំណែកលើកកម្ពស់សុខភាពសាធារណៈនៅកម្ពុជា។
នេះជាការលើកឡើងក្នុងកម្មវិធីសម្ពោធជាផ្លូវការផែនការយុទ្ធសាស្ត្រដែលរៀបចំឡើងនៅថ្ងៃទី២៨ ខែកក្កដា។
នាយកប្រតិបត្តិអង្គការខាណា លោក ជួប សុខចំរើន មានប្រសាសន៍ដែរថា ក្រុមងាយរងគ្រោះដោយសារជំងឺអេដស៍នៅតែប្រឈមនឹងបញ្ហារើសអើងលើសេវាសុខភាពរងការមាក់ងាយពីសង្គមគ្រួសារ គ្រូពេទ្យប្រជាពលរដ្ឋមួយចំនួនស្របពេលដែលរដ្ឋាភិបាលកម្ពុជា ហាក់មិនសូវបានយកចិត្តទុកដាក់ចំពោះពួកគាត់។
លោកបញ្ជាក់ថា បញ្ហានេះមកពីការគាំទ្រផ្នែកផ្លូវច្បាប់ចំពោះក្រុមងាយរងគ្រោះដោយសារជំងឺអេដស៍នៅមានកម្រិត។ ហេតុនេះ លោកថា អង្គការខាណា បានដាក់ផែនការយុទ្ធសាស្ត្ររយៈពេល ៥ឆ្នាំ ដើម្បីជំរុញក្រុមងាយរងគ្រោះដោយសារជំងឺអេដស៍ ឲ្យហ៊ានលើកឡើងនូវបញ្ហារបស់ខ្លួនទាមទារសិទ្ធិសេរីភាព និងភាពស្មើគ្នានៅក្នុងសង្គម៖ «ក្នុង៥ឆ្នាំទៅមុខ យើងនឹងជំរុញឲ្យមានការជជែកគ្នាឲ្យបានច្រើនរវាងអ្នកផ្ដល់ប្រឹក្សា អ្នកផ្ដល់សេវា និងអ្នកទទួលសេវា ដើម្បីមានការយល់គ្នា ហើយយើងធ្វើស្របគ្នាទៅតាមគោលនយោបាយរបស់ក្រសួងសុខាភិបាល»។
តំណាងក្រុមងាយរងគ្រោះដោយសារជំងឺអេដស៍ លោកស្រី ស៊ុន សុភារម្យ គាំទ្ររាល់ការជំរុញរបស់សង្គមស៊ីវិល។ ប៉ុន្តែអ្នកផ្ទុកមេរោគអេដស៍រូបនេះ ក៏ស្នើឲ្យរដ្ឋាភិបាលត្រូវតែមានច្បាប់ការពារក្រុមងាយរងគ្រោះ ដោយសារជំងឺអេដស៍ឲ្យទទួលបានការលើកទឹកចិត្ត និងសេវាថែទាំសុខភាពពេញលេញ៖ «កន្លងមក រដ្ឋាភិបាលគាត់ជួយដែរ តែគាត់មិនសូវបានចុះមកជួបផ្ទាល់ជាមួយអ្នកផ្ទុកមេរោគអេដស៍ នៅសហគមន៍ផ្ទាល់ ហើយក៏មិនសូវបានជួយលើកទឹកចិត្តជូនពួកគាត់ប៉ុន្មានដែរ ដូច្នេះរដ្ឋាភិបាលត្រូវតែគិតពីបញ្ហានេះផង»។
ចំណែកឯអគ្គលេខាធិការអាជ្ញាធរជាតិប្រយុទ្ធ និងជំងឺអេដស៍ លោក តែង គុន្ធី មានប្រសាសន៍ថា រដ្ឋាភិបាលបានចំណាយទៅលើការប្រយុទ្ធ និងជំងឺអេដស៍ប្រមាណជិត ៣០លានដុល្លារក្នុងមួយឆ្នាំ។ លោកបន្តថា សម្រាប់ឆ្នាំ២០១៦ នេះ ដើម្បីជំរុញក្រុមងាយរងគ្រោះដោយសារជំងឺអេដស៍ឲ្យទទួលបានសិទ្ធិពេញលេញ រដ្ឋាភិបាលនឹងពិនិត្យពង្រីកថវិកាជាតិឲ្យច្រើនជាងនេះទៀត ដើម្បីឈានទៅលុបបំបាត់ការចម្លងមេរោគអេដស៍នៅឆ្នាំ២០៣០៖ «សព្វថ្ងៃ រដ្ឋាភិបាលកំពុងតែពិនិត្យលទ្ធភាពលើថវិកាជាតិ ដើម្បីពង្រីកជួយពួកគេទាំងនោះ ហើយបន្ថែមពីនេះទៀត រដ្ឋាភិបាលក៏បានត្រៀមកញ្ចប់ថវិកាដើម្បីទិញថ្នាំជួយក្រុមរងគ្រោះ ទាំងនេះផងដែរ»។
អង្គការខាណា បញ្ជាក់ដែរថា ដើម្បីជំរុញក្រុមងាយរងគ្រោះដោយសារជំងឺអេដស៍ឲ្យទទួលបានសិទ្ធិពេញលេញ អង្គការនេះគ្រោងពង្រីកក្រុមគោលដៅច្រើនជាង ៦ម៉ឺននាក់ មកពី ២៣ខេត្តក្រុង និងត្រៀមចំណាយថវិកាជាង ៣០លានដុល្លារ ដើម្បីអនុវត្តន៍លើការងារនេះ៕