ដោយ ដែន អយុធ្យា RFA 2016-07-30
ក្រសួងពាណិជ្ជកម្មបង្កើតព្រឹត្តិការណ៍តាំងពិព័រណ៍ផលិតផលទំនិញខ្មែរ និងស្នើដល់ប្រជាពលរដ្ឋនៅទូទាំងប្រទេសកម្ពុជា ឲ្យងាកមកចាប់អារម្មណ៍ និងគាំទ្រផលិតក្នុងស្រុកឲ្យបានច្រើន ដើម្បីលើកទឹកចិត្តអ្នកផលិតឈានដល់រួមចំណែកលើកស្ទួយចំណូលសេដ្ឋកិច្ចគ្រួសាររបស់ពលរដ្ឋខ្មែរ និងកាត់បន្ថយការធ្វើចំណាកស្រុក។
ផលិតករក្នុងស្រុកគាំទ្រក្រសួងពាណិជ្ជកម្មដែលបង្កើតឲ្យមានព្រឹត្តិការណ៍ទិញទំនិញខ្មែរផលិតដោយស្នាដៃពលរដ្ឋខ្មែរ និងប្រកាសឲ្យអ្នកប្រើប្រាស់ចូលរួមគាំទ្រទំនិញក្នុងស្រុកនៅពេលនេះ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ អំពាវនាវឲ្យប្រជាពលរដ្ឋចូលរួមគាំទ្រផលិតផលផ្សេងៗ ដែលជាស្នាដៃផលិតដោយប្រជាពលរដ្ឋខ្មែរឲ្យបានច្រើនផុលផុស វាប្រសើរជាងទៅលើកស្ទួយ ឬគាំទ្រទំនិញ ឬផលិតផលនាំចូលពីបរទេស។ លោកបន្ថែមថា ដើម្បីបំផុសឲ្យប្រជាពលរដ្ឋនៅទូទាំងប្រទេសចូលរួមគាំទ្រផលិតផល ឬទិញទំនិញដែលកូនខ្មែរផលិតក្នុងស្រុកយកទៅប្រើប្រាស់ឲ្យបានផុលផុស ក្រសួងពាណិជ្ជកម្មបានបើកយុទ្ធនាការ "ទិញផលិតផលខ្មែរ"នៅតាមរាជធានី-ខេត្តមួយចំនួន ដោយតាំងពិព័រណ៍បង្ហាញផលិតផលខ្មែរជូនប្រជាពលរដ្ឋ និងភ្ញៀវទេសចរជាតិអន្តរជាតិបានទស្សនា។
សារអំពាវនាវរបស់រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ដូច្នេះនៅក្នុងឱកាសលោកចូលរួមបើកសម្ពោធពិព័រណ៍ "ផលិតផលខ្មែរ"ក្នុងយុទ្ធនាការទិញផលិតផលក្នុងស្រុកនាឆ្នេរអូរឈើទាល ខេត្តព្រះសីហនុ ចាប់ពីថ្ងៃទី២៨ ដល់ថ្ងៃទី៣១ ខែកក្កដា ឆ្នាំ២០១៦៖ «យុទ្ធនាការទិញផលិតផលខ្មែរ គឺជាការពញ្ញាក់ស្មារតីអ្នកប្រើប្រាស់ទាំងឡាយឲ្យងាកមកគាំទ្រ ឬទិញផលិតផលខ្មែរក្នុងស្រុក និងកាត់បន្ថយទំនិញហូរចូលពីក្រៅប្រទេស។ ជំរុញការនាំចេញការនាំចេញទៅកាន់ទីផ្សារក្រៅប្រទេស លើកស្ទួយបច្ចេកទេសដល់អ្នកផលិត និងកាត់បន្ថយចំណាកស្រុកជាដើម»។
ថ្លែងបើកសម្ពោធពិព័រណ៍ពាណិជ្ជកម្មកាលពីល្ងាចថ្ងៃទី២៨ ខែកក្កដា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចាត់ទុកព្រឹត្តិការណ៍នេះថាដ៏មានសារសំខាន់ ហើយស្នើដល់ប្រជាពលរដ្ឋទូទាំងប្រទេស ឲ្យចូលរួមគាំទ្រផលិតផលខ្មែរដើម្បីចូលរួមចំណែកលើកស្ទួយសេដ្ឋកិច្ចគ្រួសារខ្មែរ ក៏ដូចជាសេដ្ឋកិច្ចជាតិខ្មែរឲ្យរីកចម្រើនថែមទៀត។
ពិព័រណ៍ពាណិជ្ជកម្មដែលដាក់តាំងលក់ទំនិញស្នាដៃផលិតដោយកូនខ្មែរ ឬទំនិញផលិតក្នុងស្រុក នាខេត្តព្រះសីហនុ នៅពេលនេះ មានជិត ១០០ស្តង់ ហើយព្រឹត្តិការនេះ ក្រសួងពាណិជ្ជកម្មបានបង្កើតឲ្យមានការប្រគំតន្ត្រី និងមានតារាចម្រៀង និងក្រុមកំប្លែងល្បីៗ ចូលរួមសម្ដែងជូនភ្ញៀវជាតិអន្តរជាតិទស្សនាផង។
លោកបន្ថែមថា យុទ្ធនាការនេះអាចជាសំឡេងជួង ឬស្នូរពញ្ញាក់ស្មារតីដល់អ្នកប្រើប្រាស់ទំនិញទាំងឡាយឲ្យងាកមកចាប់អារម្មណ៍ ឬចូលរួមគាំទ្រទំនិញផលិតបានក្នុងស្រុកផលិតដោយស្នាដៃខ្មែរ។ ថ្លែងក្នុងសន្ទរកថាដែលឆ្លៀតកោតសរសើរភាពឆ្លាតវៃនៃការនាំដ៏ល្អរបស់លោកនាយករដ្ឋមន្ត្រី ហ៊ុន សែន ជាប់មិនដាច់ពីមាត់ផងនោះ លោក សូរស័ក្តិ ឲ្យដឹងដែរថា ចាប់ពីពេលនេះតទៅ ក្រសួងពាណិជ្ជកម្ម មានគោលបំណងកាត់បន្ថយការនាំចូលទំនិញពីក្រៅប្រទេស និងជំរុញឲ្យមានការនាំចេញផលិតផលខ្មែរទៅកាន់បរទេសឲ្យបានច្រើន ដើម្បីរួមចំណែកជួយពង្រឹងសមត្ថភាពផលិត និងបង្កើនការងារជូនប្រជាពលរដ្ឋខ្មែរ មានការងារបានកាន់តែច្រើនឈានដល់កាត់បន្ថយពលរដ្ឋធ្វើចំណាកស្រុកដែលប្រឈមនឹងគ្រោះថ្នាក់ខ្ពស់។
លោករដ្ឋមន្ត្រីក្រសួងពាណិជ្ជកម្ម ក៏បានឲ្យដឹងថា យុទ្ធនាការពិព័រណ៍ទិញផលិតផលខ្មែរនេះ ក្រសួងក៏បានរៀបចំជាសិក្ខាសាលាបញ្ជ្រាបការយល់ដឹងដល់ផលិតករក្នុងស្រុកអំពីបច្ចេកទេស ឬអនាម័យក្នុងការផលិតមុខទំនិញនានា ឲ្យមានគុណភាព មានអនាម័យ ដើម្បីធានាសុវត្ថិភាពអ្នកប្រើប្រាស់ ព្រមទាំងឲ្យមានសោភណភាពទាក់ទាញ មានតម្លៃសមរម្យ និងអាចឈានដល់ប្រកួតប្រជែងទៅលើទីផ្សារជាមួយទំនិញនាំចូលពីក្រៅប្រទេស៖ «តាមរយៈការតាំងពិព័រណ៍ពាណិជ្ជកម្មនេះ គឺមានគោលដៅឲ្យអ្នកប្រើប្រាស់គាំទ្រទំនិញក្នុងស្រុកដែលមានគុណភាព នាំមកពីតាមបណ្តារាជធានី ខេត្តទូទាំងប្រទេសកម្ពុជា»។
នាយកសាលាស្តង់ដារជាតិ-អន្តរជាតិ ឬហៅកាត់ អាយឌា ស៊ស (Idea Source) ប្រចាំខេត្តព្រះសីហនុ លោក វ៉ាន់ សុខហេង ដែលមានស្តង់បង្ហាញជូនភ្ញៀវទស្សនា និងបានដឹកនាំកុមារីតូចៗ មកសម្តែងរបាំប្រពៃណីខ្មែរជូនពរភ្ញៀវកិត្តិយសនៅក្នុងពិធីបើកសម្ពោធ ការតាំងពិព័រណ៍ទំនិញផលិតផលខ្មែរនាឆ្នេរអូរឈើទាល ល្ងាចថ្ងៃទី២៨ ខែកក្កដា។ លោកចាត់ទុកយុទ្ធនាការនេះ ថាអាចនឹងជួយបង្កបរិយាកាស ឬជាការលើកទឹកចិត្តដល់អ្នកផលិតក្នុងស្រុក មានទឹកចិត្តបង្កើនលទ្ធភាពផលិតកម្ម និងបង្កើនគុណតម្លៃ ឬគុណភាពបន្ថែមទៀតទៅលើផលិតផលរបស់ខ្លួន ព្រមទាំងបង្កើនការផលិតប្រភេទមុខទំនិញថ្មីៗ ដែលមានគុណភាព និងអនាម័យសម្រាប់បម្រើសេចក្ដីត្រូវការដល់អ្នកប្រើប្រាស់ទាំងក្នុងស្រុក និងឈានដល់នាំចេញទៅកាន់ទីផ្សារក្រៅប្រទេស ហើយអាចកាត់បន្ថយការនាំចូលទំនិញពីបរទេសស្របតាមការចង់បានរបស់ក្រសួងពាណិជ្ជកម្ម។
លោក វ៉ាន់ សុខហេង គាំទ្រពេញទំហឹងទៅលើយុទ្ធនាការរបស់ក្រសួងពាណិជ្ជកម្ម ហើយមានជំនឿថា ក្រសួងនឹងសម្រេចគោលបំណងលើកស្ទួយផលិតផលក្នុងស្រុកដែលជាស្នាដៃកូនខ្មែរផលិតបាននឹងទទួលបានជោគជ័យ។ ជាងនេះទៀត នៅថ្ងៃអនាគតកម្ពុជា នឹងមានលទ្ធភាពកាន់តែច្រើនដើម្បីចូលរួមប្រកួតប្រជែងមុខទំនិញផ្សេងៗ ដែលមានគុណភាពទាំងទីផ្សារក្នុងស្រុក និងទីផ្សារនៅលើពិភពលោក និងអាចបង្កើតការងារជូនប្រជាពលរដ្ឋបង្កើនប្រាក់ចំណូលគ្រួសារ និងឈានដល់ជួយទប់ស្កាត់ការធ្វើចំណាកស្រុកស្របតាមយុទ្ធសាស្ត្ររបស់រាជរដ្ឋាភិបាល។
នាយកអង្គការដុន បូស្កូ (Don Bosco) ប្រចាំខេត្តព្រះសីហនុ លោក រ៉ូបឺតតូ (Roberto) ដែលបានបណ្ដុះបណ្ដាលជំនាញផ្សេងៗ ដល់កុមារកំព្រា ឬកុមារក្នុងគ្រួសារក្រីក្រ ពិសេសជួយបណ្ដុះបណ្ដាលជំនាញផលិតនំ និងការ៉េម មានអនាម័យ និងមានរសជាតិឈ្ងុយឆ្ងាញ់ បានស្វាគមន៍ និងគាំទ្រសកម្មភាពរបស់ក្រសួងពាណិជ្ជកម្មដែលបង្កើតឲ្យមានព្រឹត្តិការណ៍តាំងពិព័រណ៍ផលិតផលខ្មែរនៅឱកាសនេះ។
ចំណែកម្ចាស់កសិដ្ឋានឫស្សី ឬចំការឫស្សី រាប់សិបហិកតារនៅស្រុកព្រៃនប់ ខេត្តព្រះសីហនុ លោក ឈុន សារុំ ដែលមានស្តង់តាំងដើមឫស្សី ឬពូជឫស្សីផ្អែម ទំពាំងស្ងួត ទំពាំងស្រស់ និងសម្ភារៈប្រើប្រាស់ផលិតពីឫស្សីជាច្រើនប្រភេទទៀត ក៏គាំទ្រក្រសួងពាណិជ្ជកម្ម បង្កើតព្រឹត្តិការណ៍តាំងពិព័រណ៍ផលិតផលខ្មែរ និងបំផុសឲ្យពលរដ្ឋចូលរួមគាំទ្រនេះដែរ។ លោកឲ្យដឹងថា កសិដ្ឋានចំការឫស្សីផ្អែមរបស់លោកមានបម្រើសេវាដល់អតិថិជនដែលមានបំណងដាំឫស្សី ហើយទទួលផលក្នុងរយៈពេល ១ឆ្នាំ មានទីតាំងនៅអាហារដ្ឋានភូមិឫស្សី ស្ថិតនៅគល់ស្ពានទឹកសាប ស្ថិតក្នុងឃុំរាម ស្រុកព្រៃនប់។
ងាកមកម្ចាស់កសិដ្ឋានដាំបន្លែធម្មជាតិ ឬបន្លែគ្មានសារធាតុគីមី ឈ្មោះ ដេលី ហ្វ្រែស (Daily Fresh Farm) ប្រចាំខេត្តព្រះសីហនុ លោកស្រី សេង គឹមលៀង ក៏ប្រកាសគាំទ្រថ្នាក់ដឹកនាំក្រសួងពាណិជ្ជកម្ម និងថ្នាក់ដឹកនាំស្ថាប័នពាក់ព័ន្ធខេត្តជាប់ឆ្នេរសមុទ្រមួយនេះដែរ។ លោកស្រីអំពាវនាវឲ្យពលរដ្ឋខ្មែរចូលរួមគាំទ្រមុខម្ហូប ឬបន្លែស្រស់ៗគ្មានជាតិគីមីផលិតចេញកសិដ្ឋានដេលី ហ្វ្រែស នៅស្តង់តាំងពិព័រណ៍លេខ ៧២ នាឆ្នេរអូរឈើទាល។ លោកស្រីឲ្យដឹងថា កសិដ្ឋាននេះក៏មានជួយសាងសង់កសិដ្ឋានដាំបន្លែគ្មានជាតិគីមី ឬបន្លែធម្មជាតិ ទាំងបច្ចេកទេស និងមានលក់ពូជបន្លែ ដូចជាសាឡាត់ជាដើម ជូនអតិថិជនដែលចាប់អារម្មណ៍ចង់បង្កើតមុខរបរនេះ។
ទាក់ទិនការតាំងពិព័រណ៍ផលិតផលខ្មែរនេះដែរ លោក យន្ត មីន អភិបាលខេត្តព្រះសីហនុ ថ្លែងចាត់ទុកព្រឹត្តិការណ៍ពាណិជ្ជកម្មនេះ ថាមានគោលដៅពិតប្រាកដក្នុងការជួយដល់អ្នកផលិតទំនិញក្នុងស្រុកឈានដល់មានទីផ្សារលក់ទំនិញបានទូលំទូលាយទាំងទីផ្សារក្នុងស្រុក និងទីផ្សារក្រៅស្រុក។ លោកស្នើដល់ប្រជាពលរដ្ឋខ្មែរ ឬអ្នកប្រើប្រាស់ ឲ្យចូលរួមគាំទ្រផលិតផល ឬទំនិញផលិតក្នុងស្រុកដែលមានគុណភាពដើម្បីរួមចំណែកលើកកម្ពស់សេដ្ឋកិច្ចគ្រួសារខ្មែរ និងសង្គមជាតិខ្មែរឲ្យមានការរីកចម្រើនថែមទៀត។
លោក យន្ត មីន ឲ្យដឹងទៀតថា ទំនិញដែលផលិតបានដោយស្នាដៃប្រជាពលរដ្ឋខ្មែរដែលដាក់តាំងក្នុងពិព័រណ៍ពាណិជ្ជកម្មរយៈពេល ៤ថ្ងៃ ចាប់ពីថ្ងៃទី២៨ ដល់ថ្ងៃទី៣១ ខែកក្កដា នៅឆ្នេរអូរឈើទាល ខេត្តព្រះសីហនុ ក្នុងឱកាសនេះគឺមកពី ២៥ រាជធានី-ខេត្ត នៅទូទាំងប្រទេសកម្ពុជា។ លោកគាំទ្រក្រសួងពាណិជ្ជកម្មដែលបានបង្កើតព្រឹត្តិការណ៍តាំងពិព័រណ៍ផលិតផលខ្មែរ និងការរៀបចំសិក្ខាសាលាស្ដីពី "ការកសាងទំនុកចិត្តលើផលិតផលខ្មែរ"នៅថ្ងៃសុក្រ ទី២៩ ខែកក្កដា នេះថា ជាការលើកទឹកចិត្តដល់អ្នកផលិតក្នុងស្រុកមានកម្លាំងចិត្ត ឬទំនុកចិត្ត និងឈានដល់បង្កើនការផលិតរបស់ខ្លួននៅថ្ងៃខាងមុខ៕